Watchtower ONLINE L̦ÃIBRÃRE
Watchtower
ONLINE L̦ÃIBRÃRE
Kajin M̦ajel̦
O̦
  • N̦
  • n̦
  • M̦
  • m̦
  • L̦
  • l̦
  • O̦
  • o̦
  • BAIBÕL̦
  • BOK IM KEIN KATAK
  • KWEILO̦K KO
  • w23 Juun p. 14-19
  • Etke Jej Aikuj Mijak Jeova?

Ejjañin wõr pija in ilo tõre in.

Jol̦o̦k bõd, ewõr juon problem ej kõm̦m̦an an jab jo̦ pija in.

  • Etke Jej Aikuj Mijak Jeova?
  • Naan in Keeañ Kõn Aelõñ eo an Jeova (Kein Katak)—2023
  • Unin Tõl Jidikdik Ko
  • Katak ko Jet
  • TA MEL̦EL̦EIN ÑAN MIJAK ANIJ?
  • KATAK ÑAN MIJAK ANIJ
  • ÃINWÕT OBADAIA ME EAR MIJAK ANIJ, KWÕN PERAN
  • ÃINWÕT BŨRIJ L̦APL̦AP JIHOIADA ME EAR MIJAK ANIJ, KWÕN TILJEK
  • JEN JAB ÃINWÕT KIIÑ JOASH
  • Joash Ear Ilok jen Jeova kin Kõmao ko Renana
    Imõniaroñroñ Ej Kwalok kin Ailiñ eo an Jeova—2009
  • Jihoiada Ej Kwal̦o̦k An Peran
    Katak jãn Bwebwenato ko ilo Baibõl̦
  • Jeova Ej Kõjeraam̦m̦an Ro rej Kwal̦o̦k Aer Peran
    Jerbal eo Ad im Wãween Ad Mour—Kein Katak—2023
  • Jo̦dikdik Ro​—Kain Rot Mour eo Kokõn̦aan?
    Naan in Keeañ Kõn Aelõñ eo an Jeova (Kein Katak)—2023
Ebar Wõr
Naan in Keeañ Kõn Aelõñ eo an Jeova (Kein Katak)—2023
w23 Juun p. 14-19

KATAK 27

Etke Jej Aikuj Mijak Jeova?

“Pepe ettino an Jeova ippãn ro rej mijak E.”—SAM 25:14.

AL 8 Jeova Ej Ad Likõpejñak

KÕMEL̦EL̦E EO ÑAN KATAK INa

1-2. Ekkar ñan Sam 25:14, ta eo jej aikuj in kõm̦m̦ane el̦aññe jekõn̦aan juon jem̦jerã epaak ippãn Jeova?

ILO am̦ l̦õmn̦ak, kadkad ta ko relukkuun aorõk bwe en wõr ikõtaan ro me rekõn̦aan bwe en epaak wõt jem̦jerã eo aer ippãn doon? Ejjel̦o̦k pere kwõj errã bwe ro relukkuun epaake doon rej aikuj yokwe im rejetake doon. Bõlen kwoban kar l̦õmn̦ak bwe mijak ej juon iaan kadkad ko raorõk ikõtaan ruo armej bwe ren maroñ epaake doon. Meñe ãindein, ak ãinwõt an eoon eo an katak in kaalikkar, ro rekõn̦aan juon jem̦jerã epaak ippãn Jeova, rej aikuj “mijak E.”—Riit Sam 25:14.

2 Jekdo̦o̦n ewi toon ad karejar ñan Jeova, ak kõj aolep jej aikuj wõnm̦aanl̦o̦k wõt im mijake. Bõtab, ta mel̦el̦ein ñan mijake Anij? Ewi wãween jemaroñ katak ñan mijak Jeova? Im ta eo jemaroñ katak kõn mijak Anij jãn eo ear loloodjake m̦weo im̦õn kiiñ eo etan Obadaia, Bũrij L̦apl̦ap eo Jihoiada, im Kiiñ Joash?

TA MEL̦EL̦EIN ÑAN MIJAK ANIJ?

3. Kõmel̦el̦e wãween an mijak maroñ kõjparok kõj.

3 Jemaroñ mijak ñe jej l̦õmn̦ak bwe jenaaj iioon jorrããn. Kain mijak rot in emaroñ em̦m̦an im emaroñ kõm̦akũt kõj ñan em̦m̦akũt ilo mãlõtlõt. Ñan waanjoñak, ad mijak in wõtlo̦k, emaroñ bõbraik kõj jãn ad kepaake tõrerein juon tol̦ ak juon jikin eutiej. Ad mijak in iioon jorrããn, emaroñ kõm̦akũt kõj ñan ko jãn juon wãween ekauwõtata. Ad mijak in ko̦kkure jem̦jerã eo ad ippãn juon eo jej yokwe, ej bõbraik kõj jãn ad ba ak kõm̦m̦ane juon men ejjab jouj.

4. Setan ekõn̦aan bwe jen mijake Jeova ilo wãween et?

4 Setan ekõn̦aan bwe jen mijake Jeova ilo wãween eo ejjab jim̦we. Setan ej kowõnm̦aanl̦o̦k mel̦el̦e in me Elipaz ear kwal̦o̦k kake—bwe Jeova ej juon Anij eobrak kõn illu im aolep iien ekõn̦aan kaje kõj im epen ñan kabuñbũruon. (Job 4:18, 19) Setan ekõn̦aan bwe jen lukkuun mijake Jeova ñan joñan eo me ekõm̦m̦an ad bõjrak jãn ad karejar ñan E. Bwe jen jab l̦orak ilo aujiid in, jej aikuj ejaak kain mijak rot eo ñan Anij me ejim̦we.

5. Ta mel̦el̦ein ñan mijak Anij?

5 Armej eo me ej mijake Anij ilo wãween eo ejim̦we, ej yokwe E im ejjab kõn̦aan kõm̦m̦ane jabdewõt men me enaaj ko̦kkure jem̦jerã eo an ippãn Jeova. Jesus ear “mijak Anij” ilo wãween in. (Hib. 5:7) Ear jab lõl̦ño̦ñ kõn Jeova. (Ais. 11:2, 3) Ijoke, ear lukkuun m̦wilal̦ yokwe eo an ñan Jeova im ear kõn̦aan pokake E. (Jon 14:21, 31) Ãinwõt Jesus, el̦ap ad kautiej im bwilõñ kõn Jeova kõn an juon eo el̦ap yokwe ippãn, emãlõtlõt, ej ekajet jim̦we, im el̦ap an kajoor. Jebar jel̦ã bwe el̦ap an Jeova yokwe kõj im wãween ad em̦m̦akũt ñan naanin tõl ko an, ej jelõte. Alikkar bwe ewõr ad maroñ ñan kõm̦m̦an bwe Jeova en lañlõñ ak bwe en bũrom̦õj im metak.​—Sam 78:41; JK. 27:11.

KATAK ÑAN MIJAK ANIJ

6. Ta juon iaan men ko jemaroñ kõm̦m̦ane ñan katak ñan mijak Anij? (Sam 34:11)

6 Jejjab l̦otaktok im ekajju wõr ad mijak ñan Jeova; ej juon men jej aikuj in ejaake. (Riit Sam 34:11.) Juon wãween jemaroñ kõm̦m̦ane men in ej ilo ad etale menin kõm̦anm̦an ko an. El̦ak l̦apl̦o̦k ad lo mãlõtlõt eo an, kajoor eo an, im yokwe eo an el̦ap ñan kõj me ej alikkar ilo “menin kõm̦anm̦an ko an,” enaaj l̦apl̦o̦k ad kautieje im yokwe E. (Rom 1:20) Juon jeid im jatid kõrã etan Adrienne ej ba, “Ñe ij kalimjeke aolep menin kõm̦anm̦an ko an Jeova im lo joñan an mãlõtlõt, men in ekõm̦m̦an aõ bwilõñ im ej jipañ eõ ñan kile bwe ejel̦ã ta eo em̦m̦antata ñan ña.” Ke Adrienne ear kõl̦mãnl̦o̦kjen̦ kõn men in, ear l̦õmn̦ak im ba, “Ijaam̦ kõn̦aan kõm̦m̦ane jabdewõt men me enaaj ko̦kkure kõtaan eo aõ ippãn Jeova, eo ej Wũnjãn mour e aõ?” Kwõmaroñ ke jol̦o̦k jidik iien ilo wiik in im kõl̦mãnl̦o̦kjen̦ kõn juon iaan menin kõm̦anm̦an ko an Jeova? Am̦ kõm̦m̦ane men in enaaj kal̦apl̦o̦k am̦ kautiej im yokwe Jeova.​—Sam 111:2, 3.

7. Ewi wãween an jar maroñ jipañ kõj ñan mijak Jeova ilo wãween eo ejim̦we?

7 Juon wãween jemaroñ bar ejaak mijak ñan Anij ej ilo ad ekkeini ad jar. El̦ak ikkutkutl̦o̦k ad jar ñan Jeova, enaaj l̦apl̦o̦k an m̦ool ñan kõj. Kajjojo iien jej kajjitõk bwe en letok ad kajoor ñan kijenmej ium̦win juon wãween epen, jej kwal̦o̦k ad keememej kajoor eo an el̦ap. Ñe jej kam̦m̦oolole kõn menin letok eo kõn eo Nejin, men in ej kakeememej kõj kõn yokwe eo an ñan kõj. Im ñe jej akwel̦ap ñan Jeova im kajjitõk bwe en jipañ kõj kõn juon apañ, men in ej jipañ kõj ñan keememej joñan an mãlõtlõt. Jar rot kein rej kal̦apl̦o̦k ad kautiej Jeova, im rekõm̦m̦an bwe en l̦apl̦o̦k ad jek ippãd make ñan jab kõm̦m̦an jabdewõt men me enaaj ko̦kkure jem̦jerã eo ad ippãn.

8. Ta eo jemaroñ kõm̦m̦ane ñan wõnm̦aanl̦o̦k wõt im mijake Anij?

8 Ñe jekõn̦aan wõnm̦aanl̦o̦k wõt im mijake Anij, jej aikuj katak Baibõl̦ im katak jãn waanjoñak ko rem̦m̦an im renana. Jen kõnono kõn ruo iaan ro ri-karejeran Jeova me rar tiljek—eo ear loloodjake m̦weo im̦õn Kiiñ Ehab etan Obadaia im Bũrij L̦apl̦ap Jihoiada. Innem jenaaj lale ta ko jemaroñ katak jãn Kiiñ Joash, eo ear pokake Jeova ilo jinoin bõtab tokãlik ear ilo̦k jãn E.

ÃINWÕT OBADAIA ME EAR MIJAK ANIJ, KWÕN PERAN

9. Ewi wãween an kar mijak Anij jipañ Obadaia? (1 Kiiñ 18:3, 12)

9 Baibõl̦ eo ej jino kwal̦o̦k kajjien Obadaiab ilo an ba: “Obadaia ej kanooj mijak Jeova.” (Riit 1 Kiiñ 18:3, 12.) Ewi wãween an kar mijak Anij jelõte Obadaia? Juon wãween ear jelõte ej ekar kõm̦m̦an bwe en juon eo ej kwal̦o̦k m̦ool im ro jet remaroñ lõke; eñin unin kiiñ eo ear kõm̦m̦an bwe en bõk eddon m̦weo im̦õn. (Keidi Nihimaia 7:2.) Kõnke Obadaia ear mijak Anij, men in ear bar kõm̦m̦an bwe en lukkuun peran. Ear aorõk bwe en wõr ippãn kadkad in kõnke ear jokwe ilo tõre eo me kiiñ eo enana etan Ehab ear irooj. Kiiñ in ear “kõm̦m̦an nana im̦aan mejãn Jeova jãn ro otemjej m̦okta jãne.” (1 Kñ. 16:30) Bareinwõt, kõrã eo pãleen Ehab me ear kabuñ ñan Beal etan Jezebel, ear lukkuun dike Jeova, joñan ear kajjioñ jol̦o̦k kabuñ eo em̦ool ilo bwij ko joñoul an aelõñ ko ituiõñin Israel. Ear bar m̦ane elõñ iaan ri-kanaan ro an Anij. (1 Kñ. 18:4) Alikkar bwe Obadaia ear kabuñ ñan Jeova ilo juon tõre ekanooj in pen.

10. Ewi wãween an kar Obadaia kwal̦o̦k an lukkuun peran?

10 Ewi wãween an kar Obadaia kwal̦o̦k an lukkuun peran? Ke Jezebel ear pukote ri-kanaan ro an Jeova bwe en m̦ane er, Obadaia ear bõk “jibukwi iaaer im ajeji er ilo ruo kumi im n̦ooj er ilo ro̦ñin tol̦ ko, im [ear] bõkl̦o̦k kijeer im limeer.” (1 Kñ. 18:13, 14, UBS) Ñe Jezebel en kar jibwe Obadaia, ejjel̦o̦k pere enaaj kar m̦ane ñan mej. Alikkar bwe Obadaia emaroñ kar mijak, im ear jab kõn̦aan mej. Bõtab el̦apl̦o̦k an kar Obadaia kaorõk Jeova im aolep ro rej karejar ñan E jãn mour eo an make.

Juon jeid im jatid likao ej del̦o̦ñ ilowaan m̦weo im̦õn ruo rippãlele me rej rũttõmak ro m̦õttan. Ej lel̦o̦k ñan l̦al̦l̦ap eo juon iaan bok ko ad, im lel̦l̦ap eo pãleen l̦al̦l̦ap eo ej reitok-reitak im waje jikin del̦o̦ñ eo aerro.

Meñe em̦õj kõmo̦ jerbal eo ad, ak juon jeid im jatid likao ej leto-letak ekkan ko ilo jetõb ñan rũttõmak ro jein im jatin (Lale pãrokõrããp 11)d

11. Ewi wãween an ri-karejar ro an Jeova ilo raan kein ãinwõt Obadaia? (Bar lale pija eo.)

11 Ilo raan kein, elõñ iaan ri-karejar ro an Jeova rej jokwe ilo jikin ko me em̦õj kõmo̦ jerbal eo ad. Rej kwal̦o̦k kautiej ñan ri-utiej ro ilo kien, bõtab ãinwõt Obadaia, rein jeid im jatid rejitõnbõro rej lel̦o̦k ñan Jeova men eo ej tõllo̦kun ñan an bõke—aer kabuñ ñane kõn aolepen bũrueer. (Matu 22:21) Rej kwal̦o̦k aer mijake Anij ikijjeen aer pokake E im jab armej. (Jrb. 5:29) Rej kõm̦m̦ane men in ilo aer wõnm̦aanl̦o̦k wõt im kwal̦o̦k naan kõn ennaan eo em̦m̦an im kweilo̦k ippãn doon ilo ettino. (Matu 10:16, 28) Rej kate er ñan lale bwe ro jeier im jatier ren bõk ekkan ko ilo jetõb me rej aikuji. L̦õmn̦ak kõn waanjoñak eo an Henri, eo ej jokwe ilo juon jikin ilo Africa me kar kõmo̦ jerbal eo ad ium̦win jet iien. Ilo kar tõre in, Henri ear jipañ bõkl̦o̦k ekkan ko ilo jetõb ñan ro jein im jatin. Ej ba: “Ña kaine me ejjookok. Innem il̦ak lale, unin aõ kar peran ej kõnke el̦ap aõ kautiej Jeova.” Kwõmaroñ ke lo am̦ kwal̦o̦k kain peran rot in ãinwõt kar Henri? Kwõmaroñ, el̦aññe kwõnaaj ejaak kain mijak rot eo ñan Anij me ejim̦we.

ÃINWÕT BŨRIJ L̦APL̦AP JIHOIADA ME EAR MIJAK ANIJ, KWÕN TILJEK

12. Ewi wãween an kar Bũrij L̦apl̦ap Jihoiada im kõrã eo pãleen kwal̦o̦k aer lukkuun tiljek ñan Jeova?

12 Bũrij L̦apl̦ap Jihoiada ear mijak Jeova, im men in ear kõm̦akũti bwe en tiljek wõt ñan Jeova im kowõnm̦aanl̦o̦k kabuñ eo em̦ool. Ear alikkar men in ke lio nejin Jezebel etan Atalaia, ear nibiji tũroon eo ilo Juda. Ewõr unin an kar armej ro mijake Atalaia kõnke ear lukkuun lãj, im joñan an kar kõn̦aan bwe en lerooj ear kajjioñ m̦ane aolep ro rar pãd ilo l̦ain eo an kiiñ in Juda—mel̦el̦ein aolep l̦adik ro jibwin! (2 Kro. 22:10, 11, UBS) Juon iaan ajri rein—Joash—ear jab mej jãn pein Atalaia kõnke lio pãleen Jihoiada etan Jihoshebeat, ear lo̦mo̦o̦rene. Jihoiada im Jihoshebeat rar n̦ooje ajri in im rar lale im kõjparoke. Ilo aerro kar kõm̦m̦ane men in, erro ar jipañ kowõnm̦aanl̦o̦k l̦ain eo an Devid. Jihoiada ear tiljek wõt ñan Jeova im ear jab kõtl̦o̦k bwe an mijake Atalaia en kabõjrake jãn an kõm̦m̦ane men eo ejim̦we.​—JK. 29:25.

13. Ke ear jimjuon an Joash iiõ, ewi wãween an kar Jihoiada bar kwal̦o̦k an tiljek?

13 Ke Joash ear jimjuon an iiõ, Jihoiada ear bar kam̦ool an tiljek ñan Jeova. Jihoiada ear kõm̦m̦ane juon bũl̦ããn ak karõk. El̦aññe karõk in enaaj tõprak, Joash enaaj erom kiiñ, im ear tõllo̦kun kõnke ej itok jãn l̦ain eo an Devid. Ijoke el̦aññe ejab tõprak karõk in an, Jihoiada emaroñ luuji mour eo an. Bõtab kõn wõt jipañ eo an Jeova, ear lo tõprak. Ikijjeen jipañ eo an kapen ro im ri-Livai ro, Jihoiada ear kõm̦m̦an bwe Joash en kiiñ im bwe ren m̦ane Atalaia. (2 Kro. 23:1-5, 11, 12, 15, UBS; 24:1) Innem Jihoiada ear “kõm̦m̦an bujen ikõtaan Jeova im kiiñ eo im armej ro, bwe ren ri-aelõñ an Jeova.” (2 Kñ. 11:17) Jihoiada “ear bareinwõt likũt ri-baar ro n̦a ilo kõjãm ko ilo Tampel̦ bwe ren jab kadel̦o̦ñ jabdewõt eo ejjab erreo ekkar ñan m̦antin kabuñ.”—2 Kro. 23:19, UBS.

14. Ewi wãween kar kautiej Jihoiada kõn an kar kautieje Jeova?

14 M̦oktal̦o̦k Jeova ear ba: “Ro rej kautiej Eõ Inaaj kautiej er.” Im eñin men eo ear kõm̦m̦ane. Jeova ear kõjeraam̦m̦ane Jihoiada. (1 Sa. 2:30) Ñan waanjoñak, ear likũt bwebwenato eo an Jihoiada ilo Baibõl̦ bwe jen maroñ katak jãne. (Rom 15:4) Im ke Jihoiada ear mej, kar lel̦o̦k ñane juon jeraam̦m̦an ejejuwaan. Kar kalibwini “ilo jikin kweilo̦k an Devid ippãn kiiñ ro, kõn an kar kõm̦m̦an em̦m̦an ñan Israel, im ñan Anij im m̦weo im̦õn.”—2 Kro. 24:15, 16.

Ãinwõt Bũrij L̦apl̦ap Jihoiada, ad mijak Anij emaroñ kõm̦akũt kõj ñan tiljek ilo ad jipañ ro jeid im jatid ilo tõmak (Lale pãrokõrããp 15)e

15. Ta ko jemaroñ katak jãn bwebwenato eo an Jihoiada? (Bar lale pija eo.)

15 Bwebwenato eo an Jihoiada emaroñ jipañ kõj aolep bwe jen mijak Anij. Em̦m̦aan ro rej lale eklejia remaroñ anõke Jihoiada ilo aer ekkõl wõt im tiljek ilo aer kõjparoke jiip ko an Anij. (Jrb. 20:28) Men eo ro rerũtto remaroñ katak jãn Jihoiada ej bwe ñe rej mijak Jeova im tiljek wõt ñane, Emaroñ kõjerbale er ñan kajejjete ankilaan. Ejjab kõjekdo̦o̦n er. Ro reddik remaroñ katak kõn wãween an kar Jeova kõm̦m̦an ñan Jihoiada im anõke ilo aer kautiej ro rerũtto, el̦aptata ro eto aer tiljek ilo aer jerbal ñan Jeova. (JK. 16:31) Im ãliktata, kõj aolep jemaroñ bar katak jãn kapen ro im ri-Livai ro me rar jipañ im rejetake Jihoiada. Jen aolep tiljek ilo ad rejetake “ro rej tõl” ikijjeen ad pokake er.​—Hib. 13:17.

JEN JAB ÃINWÕT KIIÑ JOASH

16. Ta eo ear kaalikkar bwe Kiiñ Joash ear m̦õjn̦o̦ ilo tõmak?

16 Jihoiada ear jipañ Kiiñ Joash bwe en juon armej em̦m̦an. (2 Kñ. 12:2) Tokjãn men in, ke kiiñ in ear dik wõt ear kõn̦aan kabuñbũruon Jeova. Bõtab, ãlikin an kar Jihoiada mej, Joash ear roñjake irooj ro me rar jum̦ae Jeova. Ta ko rar wal̦o̦k jãn an ãindein? E im armej ro doon rar “jino kabuñ ñan ekjab ko im annañ ko.” (2 Kro. 24:4, 17, 18, UBS) Meñe Jeova ear lukkuun bũrom̦õj im metak, ak elõñ alen an kar “jilkinl̦o̦k ro ri-kanaan ñan er, bwe ren bar kõjepl̦aaktok er . . . , a rem̦akoko in eo̦roñ” ak roñjake ri-kanaan ro An. Rar bareinwõt jab roñjake l̦eo nejin Jihoiada etan Zekaraia, eo me ekar juon ri-kanaan im bũrij an Jeova. Ejjab men in wõt ak ear nukũn Joash (erro ej cousin). Bareinwõt Kiiñ Joash ear karõk bwe ren m̦ane Zekaraia, meñe baam̦le eo an Zekaraia rar lo̦mo̦o̦rene Joash im el̦ap aer kar jipañe.​—2 Kro. 22:11; 24:19-22.

17. Ta ko rar wal̦o̦k ñan Joash?

17 Joash ear jab wõnm̦aanl̦o̦k wõt im mijake Jeova, kõn men in ear iioon jorrããn. Jeova ear ba: “Ro rej kõjekdo̦o̦n Eõ, Inaaj kõjekdo̦o̦n er.” (1 Sa. 2:30) Juon jarin tarin̦ae an ri-Siria ro me ejjab lõñ uwaaer rar bõk anjo̦ ioon jarin tarin̦ae eo “ekanooj l̦ap” an Joash, im ear ‘l̦ap an kinejnej’ ak jorrããn jãn er. Ãlikin an kar ri-Siria ro etal jãn ijo, ri-jerbal ro an make rar m̦ane ñan mej kõn an kar m̦ane Zekaraia.c Joñan an kar armej ro watõk e bwe ej juon kiiñ enana, rar jab kalibwini ãnbwinnin “ilo lõb ko libõn kiiñ ro.”—2 Kro. 24:23-25.

18. Ekkar ñan Jeremaia 17:7, 8, ewi wãween ad maroñ lukkuun kõjparok bwe jen jab ãinwõt Joash?

18 Ta ko jemaroñ katak jãn Joash? Ear ãinwõt juon wõjke me ejjab lukkuun pen okran me ear aikuj juon joor ñan jipañe jutak. Ke joor eo—Jihoiada—ear jako im kõto ko ilo kõkkar ak ro me rar jum̦ae Jeova rar itok im kapoe, Joash ear okjak im buñ. Men in ej lukkuun kaalikkar bwe ad mijak Anij ejjab aikuj pedped wõt ioon ad l̦oori joñak ko rem̦m̦an an Kũrjin ro m̦õttad, ekoba baam̦le ko ad. El̦aññe jekõn̦aan bwe jen lukkuun kajoor ilo tõmak, jej aikuj kõkajoore yokwe eo ad ñan Jeova im mijake ikijjeen ad ekkeini ad katak, kõl̦mãnl̦o̦kjen̦, im jar.​—Riit Jeremaia 17:7, 8; Kol. 2:6, 7.

19. Ta eo Jeova ej kajjitõk jãn kõj?

19 Ejjab lõñ men en̦ Jeova ej kajjitõk jãn kõj. Ekklisiastis 12:13 (UBS) ej ba ilo tukadu ta eo ej kajjitõk jãn kõj, ej ba: “Kwõn [mijak, WGM] Anij . . . im kwõn pokake kien ko an, kõnke eñin unin an kar Anij kõm̦anm̦an kõj armej.” Ñe jej mijak Anij, jenaaj maroñ jelm̦ae mãlejjoñ ko ilju im jekl̦aj im jutak pen ãinwõt kar Obadaia im Jihoiada. Ejjel̦o̦k men en̦ enaaj ko̦kkure jem̦jerã eo ad ippãn Jeova.

KWÕJ KEEMEMEJ KE?

  • Ta mel̦el̦ein ñan mijak Jeova?

  • Ta ko jemaroñ katak jãn eo ear loloodjake im̦õn kiiñ eo etan Obadaia, im Bũrij L̦apl̦ap eo Jihoiada?

  • Ewi wãween ad maroñ lukkuun kõjparok bwe jen jab ãinwõt Kiiñ Joash?

AL 3 Kwõj Kaperan im Kõkajoor Kõm

a Ñe Baibõl̦ eo ej kõjerbale naan in “mijak,” elukkuun lõñ mel̦el̦ein. Ekkar ñan men ko eoon ko ipel̦aakin ej kõnono kaki, emaroñ mel̦el̦ein lõl̦ño̦ñ, kautiej, ak bwilõñ. Katak in enaaj jipañ kõj ñan kaddekl̦o̦k kain mijak rot eo me emaroñ kõm̦akũt kõj ñan kwal̦o̦k peran im ñan tiljek ilo ad jerbal ñan Jemãdwõj ilañ.

b Obadaia in eoktak jãn ri-kanaan eo Obadaia, eo me ear mour elõñ bukwi iiõ ko tokãlik im ear je bok eo ilo Baibõl̦ me ej bõk etan.

c Matu 23:35 ej ba bwe Zekaraia ej l̦eo nejin Barekaia. Kar ba bwe emaroñ kar wõr ruo etan Jihoiada, ãinwõt an kar wõr ruo etan ro jet ilo Baibõl̦ (keidi Matu 9:9 ippãn Mark 2:14), ak bwe Barekaia ear jim̦m̦aan Zekaraia ak juon iaan ro jim̦m̦aan jãn epepen ko m̦oktal̦o̦k.

d KÕMEL̦EL̦E KO KÕN PIJA KO: Ilo pija in me ej juon waanjoñak wõt, juon jeid im jatid likao ej bõkl̦o̦k ekkan ko ilo jetõb ñan ro jeid im jatid meñe em̦õj kõmo̦ jerbal eo ad ilo jikin eo rej pãd ie.

e KÕMEL̦EL̦E KO KÕN PIJA KO: Juon jeid im jatid jiroñ ej katak kilen kwal̦o̦k naan ilo talboon jãn juon jeid im jatid lel̦l̦ap; juon jeid im jatid l̦al̦l̦ap ej likũt juon joñak em̦m̦an ilo an peran in kwal̦o̦k naan ilo̦bwilej; juon jeid im jatid l̦al̦l̦ap me el̦ap imminene ippãn ej jipañ im kammineneik ro jet ilo iien aer kakõm̦anm̦ane juon Im̦õn Kweilo̦k.

    Bok im Kein Katak ilo Kajin M̦ajel̦ (1983-2026)
    Log Out
    Log In
    • Kajin M̦ajel̦
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Kilen Kõjerbale
    • Privacy Policy
    • Privacy Settings
    • JW.ORG
    • Log In
    Share