Jeova Enaaj Ke Uwaake Jar ko Aõ?

1-2. Etke jemaroñ l̦õmn̦ak bwe Jeova ejjab uwaaki jar ko ad?

“KWÕN bareinwõt lañlõñ ilo Jeova, im Enaaj lewaj menin kajjitõk ko an bũruom̦.” (Sam 37:4) Men in ej juon kallim̦ur ekanooj in em̦m̦an! Bõtab ejim̦we ke ñan bõk l̦õmn̦ak eo bwe Jeova enaaj m̦õkaj im letok aolep men ko jej kajjitõk ippãn kaki? Etke eaorõk bwe jen jel̦ã uwaakin kajjitõk in? L̦õmn̦ak kõn waanjoñak kein. Juon jeid im jatid kõrã me ejjel̦o̦k pãleen ej jar bwe en etal ñan Jikuul̦ eo ñan Ri-Kwal̦o̦k Naan ro an Aelõñ Eo. Bõtab em̦õj de an mootl̦o̦k jejjo iiõ im rejjañin kũri bwe en kobal̦o̦k ilo jikuul̦ in. Juon jeid im jatid likao ej jar im kajjitõk bwe Jeova en kõmouri jãn nañinmej eo an el̦ap bwe en maroñ kal̦apl̦o̦k ijo kun̦aan ilo eklejia eo. Bõtab ejjañin em̦m̦anl̦o̦k ãjmour eo an. Juon jemãn im jinen rej jar bwe ajri eo nejier en pãdwõt ilo m̦ool eo. Bõtab ajri eo nejier ej pepe bwe enaaj bõjrak jãn an karejar ñan Jeova.

² Bõlen em̦õj am̦ bareinwõt kajjitõk juon men jãn Jeova, bõtab ejjañin uwaake jar eo am̦. Kõn men in, kwõmaroñ l̦õmn̦ak bwe Jeova ej uwaaki jar ko an ro jet, ak ejjab uwaaki jar ko am̦. Ak kwõmaroñ l̦õmn̦ak bwe bõlen kwaar kõm̦m̦ane juon men ebõd. Juon jeid im jatid kõrã etan Janiceb ear bõk l̦õmn̦ak in. Erro l̦eo pãleen rar jar kõn aerro kõn̦aan etal im jerbal ilo Betel̦. Ej ba: “Iar lukkuun tõmak bwe m̦õttan jidik kõm̦ro enaaj etal ñan Betel̦.” Bõtab elõñ iiõ ko rar mootl̦o̦k im rar jab kũr erro ñan Betel̦. Janice ej ba: “Iar lukkuun bũrom̦õj im iar jab mel̦el̦e etke rar jab kũr kõm̦ro. Iar l̦õmn̦ak ñe ewõr men en̦ iar kõm̦m̦ane ñan kabũrom̦õje Jeova. Iar lukkuun buul̦ jar bwe in etal ñan Betel̦. Innem etke Jeova ear jab uwaake jar eo aõ?”

3. Ta ko jenaaj kõnono kaki ilo katak in?

³ Ewõr iien ko jemaroñ l̦õmn̦ak el̦aññe Jeova ej roñjake jar ko ad. Jet iaan ri-karejar ro retiljek an Jeova ilo iien ko etto rar bar bõk l̦õmn̦ak in. (Job 30:20; Sam 22:2; Hab. 1:​2, UBS) Ta eo emaroñ jipañ eok ñan lõke bwe Jeova eban kõjekdo̦o̦ni jar ko am̦? (Sam 65:2) Bwe jen jel̦ã uwaakin kajjitõk in, jenaaj m̦okta etali kajjitõk kein jilu: (1) Ta ko jemaroñ kõtmãne bwe Jeova enaaj kõm̦m̦ani? (2) Ta ko Jeova ej kõtmãne bwe jen kõm̦m̦ani? (3) Etke jemaroñ aikuj kõm̦m̦an oktak ilo jet iaan men ko jej jar kaki?

TA KO JEMAROÑ KÕTMÃNE BWE JEOVA ENAAJ KÕM̦M̦ANI?

4. Ekkar ñan Jeremaia 29:​12, ta eo Jeova ej kallim̦ur bwe enaaj kõm̦m̦ane?

⁴ Jeova ej kallim̦ur bwe enaaj roñjake jar ko ad. (Riit Jeremaia 29:12.) Anij eo ad ej yokwe ri-karejar ro an retiljek, innem eban kõjekdo̦o̦ni jar ko aer. (Sam 10:17; 37:28) Ijoke, men in ejjab mel̦el̦ein bwe enaaj letok aolep men ko jej kajjitõk ippãn kaki. Jemaroñ aikuj kõttar ñan lal̦ eo ekããl bwe Jeova en uwaaki jet iaan men ko jej jar kaki.

5. Ta eo Jeova ej l̦õmn̦ak kake ñe ej roñjake jar ko ad? Jouj im kõmel̦el̦e.

⁵ Jeova ej lale wãween an jar ko ad ekkejell̦o̦k ippãn karõk ko an. (Ais. 55:​8, 9) Juon iaan karõk kein ej bwe lal̦ in en obrak kõn em̦m̦aan im kõrã ro me rej lañlõñ ilo aer bõrokuk ippãn doon ium̦win tõl eo an. Bõtab Setan ej ba bwe armej ro renaaj m̦õn̦õn̦õl̦o̦k ñe renaaj irooj ioer make. (Jen. 3:​1-5) Bwe Jeova en maroñ kariab naan kein an Tepil̦ eo, Ear kõtl̦o̦k bwe armej ro ren irooj ioer make. Ijoke, kõn an armej ro tõl, men in ej kõm̦m̦an bwe en wal̦o̦k elõñ iaan apañ ko jej iiooni ilo raan kein. (Ekl. 8:9) Jemel̦el̦e bwe Jeova eban jol̦o̦k aolep apañ kein ilo tõre in. Kõnke el̦aññe en kar ãindein, jet remaroñ l̦õmn̦ak bwe ewõr an armej ro maroñ ñan n̦amejal̦an apañ ko ilo lal̦ in im bwe rej lo tõprak ilo aer tõl er make.

6. Etke eaorõk bwe jen lõke bwe aolep men ko Jeova ej kõm̦m̦ani rej ilo jim̦we im yokwe?

⁶ Jeova emaroñ uwaake jar ko rej ãinl̦o̦kwõt juon ilo wãween ko reoktak jãn doon. Ñan waanjoñak, ke Kiiñ Hezekaia ear lukkuun nañinmej, ear akwel̦ap ñan Jeova bwe En jol̦o̦k nañinmej eo an. Tokãlik, Jeova ear kõmouri. (2 Kñ. 20:​1-6) Ijoke, ke rijjilõk Paul ear akwel̦ap ñan Jeova bwe en jol̦o̦k juon “kãlõklõk ilo kanniõk,” bõlen juon an nañinmej ilo ãnbwin, Jeova ear jab kõmouri. (2 Kor. 12:​7-9) Bar l̦õmn̦ak kõn waanjoñak eo an rijjilõk Jemes im Piter. Ke Kiiñ Herod ear kõn̦aan m̦an erro jim̦or, eklejia eo ear jar kake Piter im ejjel̦o̦k pere bwe rar bar jar kake Jemes. Bõtab kar m̦an Jemes, im juon enjel̦ ear karõl̦o̦k Piter. (Jrb. 12:​1-11) Jemaroñ l̦õmn̦ak im ba, ‘Etke Jeova ear lo̦mo̦o̦rene Piter im jab Jemes?’ Baibõl̦ eo ejjab kwal̦o̦k unin.c Bõtab men eo jemaroñ lõke ej bwe “ejjel̦o̦k nana ippãn” Jeova. (Dut. 32:4) Im jejel̦ã bwe Jeova ear yokwe Piter im Jemes. (Rev. 21:14) Jet iien, Jeova emaroñ jab uwaaki jar ko ad ilo wãween eo jaar kõtmãne. Meñe ãindein, ak kõn ad lõke bwe aolep iien Jeova ej uwaake jar ko ad ilo juon wãween ejim̦we im ej kwal̦o̦k yokwe, jeban ellotaane kõn wãween an uwaake jar ko ad.—Job 33:13.

7. Ta eo jej kate kõj ñan jab kõm̦m̦ane, im etke?

⁷ Jej kate kõj ñan jab keidi wãween ko jej iiooni ñan wãween ko ro jet rej iiooni. Ñan waanjoñak, jemaroñ jar im kajjitõk ippãn Jeova bwe en kõm̦m̦ane juon men, ijoke ejab tõprak men eo jaar kajjitõke. Tokãlik, jej roñ bwe juon armej ear bar jar kake ejja men eo wõt, im ej ãinwõt ñe em̦õj an Jeova uwaake jar eo an. Juon jeid im jatid kõrã etan Anna ear iioone wãween in. Ear jar bwe en jako kããnjer eo an l̦eo pãleen etan Matthew. Ilo ejja iien eo wõt, ear bar wõr an ruo jeid im jatid lel̦l̦ap nañinmejin kããnjer. Anna ear lukkuun buul̦ jar kõn Matthew im lel̦l̦ap rein jeid im jatid. Tokãlik, lel̦l̦ap rein jeid im jatid rar mour jãn kããnjer eo aer, ak Matthew ear jako ilo mej. Ilo jinoin, Anna ear l̦õmn̦ak el̦aññe Jeova ear kãjmour lel̦l̦ap rein jeid im jatid. El̦aññe aet, innem etke Jeova ear jab uwaake jar ko an bwe l̦eo pãleen en ãjmour? Em̦ool bwe jejjab jel̦ã unin an kar jako kããnjer eo an lel̦l̦ap rein jeid im jatid. Ijoke, men eo jejel̦ã ej bwe Jeova enaaj jol̦o̦k aolep men ko me rej kõm̦m̦an ad eñtaan, im ekijooror in kõjerkakpejeik aolep ro m̦õttan me em̦õj aer jako ilo mej.—Job 14:15.

8. (1) Ekkar ñan Aiseia 43:​2, ewi wãween an Jeova jipañ kõj? (2) Ewi wãween an jar jipañ kõj ñe jej iiooni wãween ko reppen? (Lale pijain alwõj eo etan Prayer Helps Us to Cope.)

⁸ Jeova enaaj aolep iien jipañ kõj. Jeova ej eo Jemãd ilañ me el̦ap yokwe ippãn im ejjab kõn̦aan bwe jen eñtaan. (Ais. 63:9) Meñe ãindein, ak ejjab bõbrae an wal̦o̦k apañ ko ad, me remaroñ ãinwõt kijeek ak reba ko. (Riit Aiseia 43:2.) Ijoke, ej kallim̦ur bwe enaaj jipañ kõj ñan ‘deblo̦ki’ apañ kein. Im jekdo̦o̦n apañ ta ko jej iiooni kiiõ, ak enaaj jipañ kõj bwe jen maroñ wõnm̦aanl̦o̦k wõt im karejar ñane. Jeova ej bar letok jetõb kwõjarjar eo an ekajoor ñan jipañ kõj kijenmej wõt. (Luk 11:13; Pil. 4:13) Kõn men in, jemaroñ lõke bwe Jeova enaaj aolep iien letok men ko jej aikuji bwe jen maroñ kijenmej wõt im dãpij wõt ad tiljek ñane.d

TA KO JEOVA EJ KÕTMÃNE BWE JEN KÕM̦M̦ANI?

9. Ekkejell̦o̦k ippãn Jemes 1:​6, 7, etke jej aikuj lõke bwe Jeova enaaj jipañ kõj?

⁹ Jeova ej kõtmãne bwe jen lõke E. (Hib. 11:6) Ewõr iien ko jemaroñ lukkuun eddodo kõn apañ ko jej iiooni. Joñan, jemaroñ jino pere el̦aññe Jeova enaaj jipañ kõj. Bõtab Baibõl̦ eo ej kaalikkar ñan kõj bwe kajoor eo an Anij emaroñ jipañ kõj ñan “uwe ilõñin [ak tallõñe] juon wõrwõr.” (Sam 18:29) Kõn men in, ijello̦kun ad ebbweer, jej aikuj jar ilo ad lukkuun tõmak im lõke bwe Jeova enaaj uwaaki jar ko ad.—Riit Jemes 1:​6, 7.

10. Kwal̦o̦k juon waanjoñak kõn wãween ad maroñ jerbali jar ko ad.

¹⁰ Jeova ej kõtmãne bwe jen jerbali jar ko ad. Ñan waanjoñak, juon jeid im jatid em̦m̦aan emaroñ jar im kajjitõk bwe Jeova en jipañe ñan kajjitõk an raanin kakkije jãn jikin jerbal eo an bwe en maroñ etal ñan juon kweilo̦k el̦ap. Ewi wãween an Jeova maroñ uwaake jar eo an? Emaroñ lel̦o̦k ñan eo jeid im jatid peran bwe en maroñ kepaake bo̦o̦j eo an. Meñe ãindein, ak in jeid im jatid enaaj baj aikuj etal ippãn bo̦o̦j eo an im kwal̦o̦k kajjitõk eo an ñane. Bõlen enaaj aikuj kajjitõk elõñ alen. Emaroñ bareinwõt ba bwe em̦õn̦õn̦õ in jerbal ilo bar juon raan. Im ñe menin aikuj, emaroñ ba bwe emaroñ bõk raanin kakkije ko an im rejjab aikuj kõl̦l̦ãiki.

11. Etke jej aikuj keini ad jar kõn men ko jej inepata kaki?

¹¹ Jeova ej kõtmãne bwe jen keini ad jar kõn men ko jej inepata kaki. (1 Tes. 5:17) Ikijjeen naan ko an Jesus, jej lo bwe jeban kajju lo uwaakin jet iaan men ko jej jar kaki. (Luk 11:9) Kõn men in, kwõn jab ebbweer! Buul̦ jar im ekkeini am̦ kõm̦m̦ane men in. (Luk 18:​1-7) Ñe jej wõnm̦aanl̦o̦k wõt im jar kake juon men, jej kwal̦o̦k ñan Jeova bwe ej juon men el̦ap an aorõk ippãd. Jej bareinwõt kwal̦o̦k ad tõmak bwe ewõr an maroñ ñan jipañ kõj.

ETKE JEMAROÑ AIKUJ KÕM̦M̦AN OKTAK ILO JET IAAN MEN KO JEJ JAR KAKI?

12. (1) Ta eo jemaroñ kajjitõk ippãd make ikijjeen men ko jej jar kaki, im etke? (2) Ewi wãween ad maroñ lale el̦aññe jej kwal̦o̦k kautiej ñe jej jar ñan Jeova? (Lale bo̦o̦k eo etan “Ij Ke Kwal̦o̦k Kautiej ñan Jeova Ikijjeen Men ko Ij Jar Kaki?”)

¹² Ñe jejjab lo uwaakin men ko jaar jar kaki, jemaroñ kajjitõk ippãd make jilu kajjitõk ko. Kein kajuon, ‘Ejim̦we ke men e ij jar kake?’ Ekkã ad l̦õmn̦ak bwe jejel̦ã ta eo em̦m̦antata ñan kõj. Bõtab, men ko jej kajjitõk kaki remaroñ jab ñan tokjãn eo ad. Ñe jej jar kõn juon apañ, emaroñ wõr juon wãween em̦m̦anl̦o̦k ñan kõm̦adm̦õde apañ eo jãn men eo jej kajjitõk kake. Im jet iaan men ko jej kajjitõk kaki remaroñ jab ekkar ñan ankilaan Jeova. (1 Jon 5:14) Ñan waanjoñak, l̦õmn̦ak kõn waanjoñak eo an rũtto ro jemãn im jinen me jaar kõnono kake m̦oktal̦o̦k. Rar kajjitõk ippãn Jeova bwe en kõm̦m̦an bwe ajri eo nejierro en pãdwõt ilo m̦ool eo. Jel̦ak lale ejjab nana men in erro ej kajjitõk kake. Ijoke, Jeova eban iuuni jabdewõt iaad bwe jen karejar ñane. Ekõn̦aan bwe kõj aolep, ekoba ajri ro nejid, jen make kããlõt ñan kabuñ ñane. (Dut. 10:​12, 13; 30:​19, 20) Kõn men in, rũtto rein remaroñ kõm̦m̦an oktak ilo jar ko aer im kajjitõk bwe Jeova en jipañ er ñan tõpar bũruon ajri eo nejier bwe en maroñ yokwe Jeova im erom jeran.—JK. 22:6; Eps. 6:4.

13. Ekkar ñan Hibru 4:​16, ñããt eo Jeova enaaj jipañ kõj? Jouj im kõmel̦el̦e.

¹³ Kajjitõk eo kein karuo ej, ‘Ekkar ñan Jeova, ejejjet ke iien in ñan uwaake jar eo aõ?’ Jemaroñ l̦õmn̦ak bwe jej aikuj in lo uwaakin jar ko ad kiiõ wõt. Ijoke ilo m̦ool, Jeova ejel̦ã iien ta eo ejejjet ñan letok jipañ. (Riit Hibru 4:16.) Ñe jejjab m̦õkaj im lo uwaakin jar ko ad, jemaroñ l̦õmn̦ak bwe uwaak eo an Jeova ej ‘Jaab.’ Bõtab ilo m̦ool, uwaak eo an emaroñ ‘Ejjab kiiõ.’ Ñan waanjoñak, l̦õmn̦ak kõn likao eo jeid im jatid me ear jar im kajjitõk bwe en mour jãn nañinmej eo an. El̦aññe Jeova en kar kõm̦m̦an menin bwilõñ im kõmouri jãn nañinmej eo an, Setan emaroñ kar ba bwe unin an likao in jeid im jatid karejar wõt ñan Jeova ej kõnke Ear kõmouri jãn nañinmej eo an. (Job 1:​9-11; 2:4) Kobal̦o̦k ippãn men in, em̦õj an Jeova karõk juon iien ñan kõm̦ouri armej ro jãn aolep nañinmej ko aer. (Ais. 33:24; Rev. 21:​3, 4) M̦ae iien in, jejjab maroñ kõtmãne bwe Jeova enaaj kõm̦m̦an juon menin bwilõñ im kõmouri kõj jãn nañinmej ko ad. Kõn men in, likao in jeid im jatid emaroñ kõm̦m̦an oktak ilo jar eo an im kajjitõk bwe Jeova en lel̦o̦k kajoor im aenõm̦m̦an bwe en maroñ kijenmej wõt meñe enañinmej, im bwe en maroñ tiljek wõt ilo an karejar ñan Anij.—Sam 29:11.

14. Ta eo kwõj katak jãn waanjoñak eo an Janice?

¹⁴ L̦õmn̦ak kõn waanjoñak eo an Janice, eo me ear jar im kajjitõk bwe en jerbal ilo Betel̦. Ãlikin an mootl̦o̦k l̦alem iiõ, ej kab kile bwe Jeova ear uwaake jar eo an ak ilo wãween ko ear jab kõtmãne. Ej ba: “Jeova ear kõjerbale iien in ñan katakin eõ im kakõm̦anm̦an eõ. Iar aikuj in kal̦apl̦o̦k aõ lõke E. Iar aikuj kakõm̦anm̦an aõ katak ippa make. Im iar aikuj katak ñan lañlõñ wõt jekdo̦o̦n ia eo ij jerbal ie ñan Jeova.” Tokãlik, kar kũr Janice im l̦eo pãleen bwe ren pãd ilo jerbalin lol̦o̦k eklejia ko. El̦ak reilikl̦o̦k, Janice ej ba: “Jeova ear uwaaki jar ko aõ, bõtab ilo wãween ko iar jab kõtmãne kake. Ekar bõk iien ñan aõ lo bwe uwaak eo Jeova ear letok ñan ña ear juon menin letok eaiboojoj. El̦ap aõ kam̦m̦oolol kõnke iar maroñ lo an kwal̦o̦k yokwe im jouj ñan eõ ilo wãween in.”

15. Etke jet iien em̦m̦an ñe jejjab lukkuun kaalikkar jet men ilo jar ko ad? (Bar lale pija ko.)

¹⁵ Kajjitõk eo kein kajilu ej, ‘Ewõr ke men en̦ ij aikuj in bar jar kake?’ Meñe em̦m̦an ñan kaalikkar ta ko jej jar kaki, ak jet iien em̦m̦an ñe jejjab lukkuun kaalikkar jet men ilo jar ko ad bwe jen maroñ jel̦ã ta eo Jeova ekõn̦aan ñan kõj. L̦õmn̦ak kõn waanjoñak eo an kõrã eo jeid im jatid me ejjel̦o̦k pãleen im ear jar bwe en pãd ilo Jikuul̦ eo ñan Ri-Kwal̦o̦k Naan ro an Aelõñ Eo. Ekõn̦aan pãd ilo jikuul̦ in bwe en maroñ jipañ ilo jikin ko rej aikuj jipañ ie. Kõn men in, ilo an wõnm̦aanl̦o̦k wõt im jar bwe en pãd ilo jikuul̦ in, emaroñ bar jar ñan Jeova bwe en jipañe lo wãween ko jet emaroñ kal̦apl̦o̦k ijo kun̦aan. (Jrb. 16:​9, 10) Innem emaroñ jerbale jar in ikijjeen an kajjitõk ippãn eo ej lol̦o̦k eklejia el̦aññe eklejia ko repaak rej aikuj aer bainier. Ak emaroñ jeje ñan juon ra im kajjitõk el̦aññe ewõr jikin ko el̦ap aer aikuj ri-kwal̦o̦k naan ro ie.e

16. Ta eo jemaroñ lõke?

¹⁶ Ãinwõt ad kar katak, jemaroñ lõke bwe Jeova enaaj uwaaki jar ko ad ilo juon wãween ejim̦we im ej kwal̦o̦k yokwe. (Sam 4:3; Ais. 30:18) Jet iien Jeova ej uwaaki jar ko ad ilo wãween ko jaar jab kõtmãne kake. Bõtab Jeova eban kõjekdo̦o̦ni jar ko ad. Ej lukkuun yokwe kõj. Im eban kõjoole kõj. (Sam 9:​10, UBS) Kõn men in, wõnm̦aanl̦o̦k wõt im “lõke E iien otemjej,” im lutõkl̦o̦k bũruom̦ ilo am̦ jar ñane.—Sam 62:8.