“Men Ko Relap An Anij” Ren Lujur Kij

“Jej roñ air konono ilo ar in nan men ko relap an Anij.”​—JERBAL 2:​11.

1, 2. Ta men in bwilõñ eo ear walok ilo Jerusalem ilo Pentecost 33 C.E.?

JUÕN jibboñ ilo ien maan rak ilo yiõ eo 33 C.E., juõn men ekabwilõñlõñ ear walok ñan juõn jar in maan im kõrã ro, ri kalor ro an Jesus Christ ke rar kweloklok ilo juõn em ilo Jerusalem. “Im emõkaj an juõn ainiken itok jen lõñ, einwõt aire, im ej kobrõk aolepen mweo ijo rej jijõt ie. Im lo ko romiõñe einwõt urur, rej weaktok ñõn ibeir . . . , im ir otemjej rej obrõk kin Jitõb Kwojarjar, im jino air konono kin bar jet loir.”​—Jerbal 2:​2-4, 15.

² Juõn jar elap rar kweloklok iman mweo. Ibwiljiir kar wõr Ri Jew ro rar lotak ilo ailiñ ko ilikin, “ri kabuñ lõmaro” rar wanliñtak ñan Jerusalem ñan air bed ilo kwojkwoj in Pentecost eo. Rar bwilõñ kinke kajjojo iair rar roñ ri kalor ro konono ilo kajin ko air kin “men ko relap an Anij.” Ekijkan an walok men in ke ro rar konono rar ri Galilee?​—Jerbal 2:​5-8, 11.

3. Ta ennan eo ri jilek Peter ear kwalok ñan jar eo ilo Pentecost eo?

³ Juõn ian ri Galilee rein kar ri jilek Peter. Ear kamelele bwe jejjo week ko lok iman, ri nana ro rar urõt Jesus Christ. Bõtab, Anij ear kajerkakbijeik Nejin jen mij. Elikin, Jesus ear weaktok iman elõñ ri kalor ro an, ekoba Peter im ro jet. Joñoul wõt ran ko lok iman, Jesus ear wanliñlok ñan lañ. E eo ear lutõktok jitõb kwojarjar eo ion ri kalor ro an. Men in ear wõr ke melelen ñan ri kwojkwoj ro ilo Pentecost eo? Aet, ear wõr. Mij eo an Jesus ear keboje juõn ial ñan jolok bwid ko air im bõk “men in letok eo, Jitõb Kwojarjar” elañe rar jerbale tõmak eo air ilo e. (Jerbal 2:​22-​24, 32, 33, 38) Inem ewi wãwen an “men ko relap an Anij” jelet aolep ri kwelok ro rar roñjake? Im ewi wãwen an bwebwenato in maroñ jibañ kij ñan etale jerbal eo ad ñan Jehovah?

Emmakit ñan Jerbal!

4. Ta nan in kanan eo an Joel ear jejjet kitien ilo ran in Pentecost 33 C.E.?

⁴ Elikin air bõk jitõb kwojarjar eo, ri kalor ro ilo Jerusalem rar jab kañ ien ak rar etal wõt im kwalok nan kin news eo emõn ñan lomoren armij ro jet, im rar jino kwalok ibben jar in armij eo rar kweloklok ilo jibboñ in Pentecost eo 33 C.E. Jerbal kwalok nan eo air ear jejjet kitien juõn kanan eo ekabwilõñlõñ, Joel, nejin Pethuel, ear kanan kake rualitõk ebeben ko lok iman: “Inaj lutõklok jitõb eo aõ ion kanniek otemjej, im likao ro im jiroñ ro nejim renaj kanan. Lõllab ro, renaj ettõnak. Lõmaro emõn ded, renaj lo vision ko. Bareinwõt inaj lutõklok jitõb eo aõ ion ri karejar maan ro im kõrã ro ilo ran ko. Al eo enaj marok im aliñ enaj erom bõtõktõk, mokta jen an ran eo elap im ekamijak an Jehovah itok.”​—Joel 1:1; 2:​28, 29, 31, NW; Jerbal 2:​17, 18, 20.

5. Ilo wãwen et eo Ri Christian ro ilo ebeben eo kein kajuõn rar dikanij? (Lale footnote.)

⁵ Men in ear melelen ke bwe Anij enaj kar ejaake juõn dolul in ri kanan ro, maan im kõrã, einlok wõt David, Joel, im Deborah, im kajerbal ir ñan kanan kin men ko renaj waloktok? Jaab. Christian ‘likao im jiroñ ro, ri karejar maan ro im kõrã ro’ renaj kar kanan ilo juõn wãwen bwe jitõbõn Jehovah enaj kamakit ir ñan kwalok nan kin “men ko relap” Jehovah ear kõmmani im enaj kõmmani. Inem rar jerbal einwõt ri konono ro an Anij eo Eutiejtata.a Bõtab, kar ewi lemnak eo an jar eo?​—Dri Hibru 1:​1, 2.

6. Ke rar roñjake katak eo an Peter, ta eo elõñ ian armij ro rar kõmmane?

⁶ Elikin an jar eo roñjake kamelele eo an Peter, elõñ iair rar emmakit im jerbal. Rar “bõk nan eo an kin aolepen burueir” im “rar baptais, im ilo ran eo enañin jilu thousand armij rar koba ibbeir.” (Acts 2:​41, NW) Einwõt ke rej lukkun Ri Jew ro im ri ailiñ ro rar ukwelok, rar jelã kadede kin irinekatak ko ilo Bible eo. Jelãlokjen in, ekoba tõmak eo rar bõk jen men ko rar katak kake jen Peter, kar bwe ñan air baptais “ilo etan Jema im Nejin im Jitõb Kwojarjar.” (Matthew 28:19) Elikin air baptais rar “ber im bin ilo katak im kamao iben dron an ro dri jilik.” Ilo ejjab ien eo wõt, rar jino jaketo jaketak tõmak eo air rej kab bõke ibben ro jet. Emol, “ilo ran otemjej rej ber im bin, im burueir wõt juõn, iloan tempel, . . . im wijtake Anij im kabuñburuen armij otemjej.” Tokjen jerbal in kwalok nan in bwe, “Iroij ej kobaik na ibeir ro re naj mour, ilo ran otemjej.” (Jerbal 2:​42, 46, 47) Congregation ko an Christian rar orlok wõt ilo mõkaj ilo elõñ ene ko ri tõmak ro rar jokwe ie. Ejelok bere bwe mõttan un ko unin an orlok in ear waloktok kin air kijejeto wõt ilo air kwalok nan in “gospel eo” ke rar jeblak ñan kabijukneir.​—Dri Kolosse 1:​23.

Nan in Anij Ej Jerbal Wõt

7. (a) Ta eo ej kareel armij ro ñan dolul eo an Jehovah ilo ran kein? (b) Bar ta men ko kwoj loe ibelakin lal im ilo bukwon eo am rej tellokin air laplok im orlok wõt? (Lale footnote.)

⁷ Ta kin ro im rej kõnan erom ri karejar ro an Anij ilo ran kein? Rej aikwij bareinwõt lukkun katak im etale Nan in Anij. Ñe rej kõmman eindein, renaj jelã kajjen Jehovah einwõt juõn Anij eo ej “tiriamokake, im e joij, e rumij an illu, im elap an tiriamokake im mol.” (Exodus 34:6; Jerbal 13:48) Rej katak kin men in letok in joij eo an Jehovah binmour eo ikijen Jesus Christ, eo ear katorlok bõtõktõkin ñan karreoik jerawiwi otemjej jen ir. (1 John 1:7) Bareinwõt rar kamolol kin air jelã kin karõk eo an Anij ñan kajerkakbijeik “ro remõn im ro re nana.” (Jerbal 24:15) Yokwe Unjen “men [kein] relap” ej kobrak burueir, im kamakit ir ñan kwalok nan kin mol kein raorõk. Inem rej erom ri karejar ro an Anij emwij wujleplok air mour im baptais im rej wõnmanlok im “edreklok ilo jela Anij.”b​—Dri Kolosse 1:​10b; 2 Dri Korint 5:​14.

8-10. (a) Ewi wãwen an bwebwenato eo an juõn Christian kõrã kamol bwe Nan in Anij ej “jerbal wõt”? (b) Ta eo bwebwenato in ear katakin yuk kin Jehovah im jerbal ko an ibben ri karejar ro an? (Exodus 4:​12)

⁸ Jelãlokjen eo ri karejar ro an Anij rar bõk jen air katak Bible eo ejjab juõn men itulikiir. Kain jelãlokjen rot in ej kamakit burueir, ukõt wãwen air lemnak kin men ko, im bedwõt ilo burueir. (Dri Hibru 4:​12) Ñan wanjoñok, juõn kõrã etan Camille ear jerbal einwõt eo ej kejbãrok ritto ro. Juõn ian ro ear lale kar Martha, juõn ian Ri Kennan ro an Jehovah. Kinke an Martha bõk nañinmij in dementia juõn kain nañinmij ej kajorrãn kamelij, ear aikwij wõr juõn ri lale bwe en bed ibben aolep ien. Ear aikwij kakememej e bwe en mõñã​—im ñan wõrañlok mõñã ko kijen bareinwõt. Bõtab, juõn men ear bedwõt ilo lemnak eo an Martha, im jenaj lale.

⁹ Juõn ran, Martha ear lo Camille ear mõtato kin an buromõj kin jet abañ ko an. Martha ear atbõkwõje Camille im kajitõkin e bwe en katak Bible ibben. Ak juõn armij eo ej bõk kain nañinmij in an Martha emaroñ ke katakin juõn armij kin Bible eo? Aet, emaroñ! Meñe enañin kar meloklok aolep men, Martha ear jab meloklok kin aibujuij eo an Anij; bareinwõt ear jab meloklok kin mol ko raorõk ear katak jen Bible eo. Ke rar katak, Martha ear jiroñ Camille bwe en readi kajjojo paragraph, readi eon ko ilo paragraph ko, readi kajitõk ko itulal in page ko, im uaki. Kar eindein air kõmmane iumin juõn ien eaetok, im meñe joñan maroñ eo an Martha ear jab kanuij lap, Camille ear wõnmanlok wõt ilo an katak kin Bible. Martha ear kile bwe Camille ear aikwij kobalok ibben ro rej itoklimo in karejar ñan Anij. Kin men in, ear lelok ñan e juõn an nuknuk im juj, bwe Camille en karbõb ñe enaj bed ilo kwelok eo an kein kajuõn ilo Kingdom Hall eo.

¹⁰ Camille ear lukkun mõnõnõ kin wãwen an kar Martha kwalok an itoklimo, joñok, im tõmak eo an. Ear lo bwe men eo Martha ear katakin e kake jen Bible eo ear lukkun aorõk, kinke ear meloklok enañin aolep men ak ear kememej wõt kin ta eo ear katak kake jen Jeje ko. Tokelik, ke Camille ear ilok ñan bar juõn imõn ritto ro, ear kile bwe kiõ ear ien eo ñan an kõmman men eo ear aikwij in kõmmane. Ilo ien eo emõn, ear etal ñan imõn kwelok Kingdom Hall eo, ear kõnak nuknuk eo ekkar im juj ko Martha ear lelok ñan e, im ear kajitõk bwe juõn en katak Bible ibben. Camille ear wõnmanlok ilo mol eo im baptais.

Emmakit ñan Kalikar Kien ko an Jehovah

11. Ijellokin ad kijejeto wõt ilo jerbal in kwalok nan, ewi wãwen ad maroñ kwalok bwe ennan in Ailiñ eo ear kamakit kij?

¹¹ Ran kein, elõñlok jen jiljino million Ri Kennan ro, rej einwõt Martha im Camille, rej kwalok nan kin “gospel an ailiñ eo” ibelakin lal. (Matu 24:14; 28:19, 20) Einwõt Christian ro ilo ebeben eo kein kajuõn, burueir rej lukkun mõnõnõ kin “men ko relap an Anij.” Rej kamolol kin jerammõn eo ñan kwalok nan kin ãt eo etan Jehovah im bwe ear lutõklok jitõb eo an ioir. Kin men in, rej kate wõt ir ñan etetal ilo juõn wãwen an “tellokin Iroij im kabuñburuen ilo men otemjej,” im jerbale kien ko an ilo wãwen otemjej air mour. Ijellokin men kein, men in ekoba air kautiej kien ko an Anij ilo ballir im baotokid.​—Dri Kolosse 1:​10a; Taitõs 2:​10.

12. Ta nan in kakabilek eo ejejjet ikijen balled im iled jej loe ilo 1 Timote 2:​9, 10?

¹² Aet, Jehovah ear likit kien ko ikijen baotokid im iled. Ri jilek Paul ear kalikar jet ian men in aikwij ko Anij ekõnan kake kin men in. “Kõra ren kõnõk nuknuk ko re karbõp, im ren kõkõmõnmwin im jejairunoij, im jab kanuij karlip birõkrik in bõrair, im jab kanuij kãlitlit ir kin gold im bõr ko im nuknuk ko re kanuij aibujuij. A eo ekar ñõn kõra ro rej kwalok air tõmak kin air jerbal remõn.”c Ta eo jej katak kake jen nan kein?​—1 Timote 2:​9, 10.

13. (a) Ta melelen “nuknuk ko re karbõp”? (b) Etke jemaroñ ba bwe ejjab bin ñan bokake kien ko an Jehovah?

¹³ Nan ko an Paul rej kwalok bwe Ri Christian ro rej aikwij “kõnõk nuknuk ko re karbõp.” Ilir en jab jabdetak. Enañin aolep armij, ekoba ro rejeramel, remaroñ tõbar kien kein rekõmmanwa ilo air kõnak nuknuk ko rekarbõb, erreo, im emõn baotokin. Ñan wanjoñok, ilo yiõ otemjej Ri Kennan ro ilo juõn ailiñ in South America rej etetal iumin elõñ mile ilujen bulen wijki ko inem rar etal kin kõrkõr iumin elõñ awa ko bwe ren bed ilo kwelok in district convention eo air. Emakijkij an juõn armij wõtlok ilo river eo ak kijek nuknuk ko an ilo mar ko ilo ien itoitak eo. Inem ke ri kwelok ro rar tõbartok ñan jikin eo convention eo air ear walok ie, bõlen ilir im nuknuk ko air rar jab kanuij karbõp. Inem rar aikwij keke nuknuk ko air, im kõmmane, kwale im iron nuknuk ko air renaj kar kajerbali ilo convention eo. Rar kaorõk nan in kir eo ñan mõñã iturin table eo an Jehovah, im rar kõnan kõnak nuknuk ko rekkar ilo ien eo.

14. (a) Ta melelen kõnak nuknuk ko ilo ‘kõkõmanmõn im jejadunoij’? (b) Kõnak nuknuk ko einwõt juõn jar in armij ej kautiej Anij’ ej kitibuj ta?

¹⁴ Paul ear bareinwõt kalikar bwe ñe jej naballed jej aikwij ‘kõkõmõmwin im jejadunoij.’ Melelen men in bwe iled en jab kwalok juõn buru e jua, jab lor kain style eo ekailbõkbõk an lal, im jab kabo armij ñan kõmman mour etton, jab kwalok mõttan enbwin ko emo kwaloki iman mejen armij ro jet, ak lor mantin lal in. Bareinwõt, jej aikwij naballed ilo juõn wãwen ej ‘kautiej Anij.’ Ejjab juõn men jej aikwij kalmenlokjen kake ke? Ejjab baj melelen wõt bwe jen kõnak nuknuk ko rekkar ñan kwelok ko an congregation inem tokelik wutiki im jab kakõmõmwin kake ilo ien ko jet. Ien otemjej baotokid en kwalok juõn lemnak in kabuñ, im kautiej kinke jej Christian im ri kwalok ro ilo 24 awa ko ilo juõn ran. Alikar bwe nuknuk in jerbal im school jenaj kõnaki ilo ien ko rekkar. Mekarta, jej aikwij naballed ilo juõn wãwen ewõr inemõn im kautiej ie. Elañe balled ej kalikar tõmak eo ad ilo Anij ien otemjej, jejamin jenliklik in kwalok nan jabdewõt ien emõntok kinke jej jook kin baotokid.​—1 Piter 3:​15.

‘Jab Yokwe Lal’

15, 16. (a) Etke eaorõk bwe jen jab kajeoñe lal in ikijen style in nuknuk ko im ilen? (1 Jon 5:​19) (b) Kin un et eo ekeie jej aikwij kejbãrok kij jen manit ko ikijen balled im iled?

¹⁵ Bareinwõt nan in kakabilek eo ilo 1 Jon 2:​15, 16 ej tel kij ikijen jokãlet eo ad kin nuknuk im iled. Jej konono: “Komin jab yokwe lõl ak men ko ilo lõl. Elañe jabrewõt armij ej yokwe lõl, yokwe [eo an] Jemer e jab ilo e. Bwe men ko otemjej ilo lõl, mõm an kõniek, mõm an mej ko, im wuj wan an mour in, re jab an Jemer a rej an lõl. Im lõl e jokolok im mõm ko an; a eo ej kõmõnmõn ankil an Anij ej berwõt in drio.”

¹⁶ Nan in kakabilek in elukkun jejjet ñan tõrein! Ilo juõn ebeben eo me ijjibed ko jen armij ro relaplok kiõ jen mokta, jen jab kõtlok bwe lal in en tel kij ilo kain nuknuk rot eo jej aikwij kãleti. Style in nuknuk ko im ilen armij rar nanalok ilo yiõ kein. Bareinwõt nuknuk in ri business ro rejjab aolep ien kwalok juõn joñok emõn ñan jelã ta eo emõn ñan Ri Christian ro. Men in ej juõn un elaplok unin ad aikwij kõkõmõnmwin im “jab [etetal] ilo wãwen dri lõl in” elañe jekõnan mour ekkar ñan kien ko an Anij im “kaibujuij katak eo an Anij Dri Lomorer ilo men ko otemjelok.”​—Dri Rom 12:2; Taitõs 2:​10.

17. (a) Ta kajitõk ko jej aikwij kalmenlokjen kaki ñe jej kaikujkuj kin nuknuk ko ak kãlet juõn style in nuknuk? (b) Etke ro bõran family ko rej aikwij lukkun lemnak kake kin baotokin ro uan family ko air?

¹⁷ Mokta jen am wiaik juõn nuknuk, ilo meletlet kwoj aikwij kajitõk ibbam: ‘Etke ij mõnõnõ kin kain style rot in? Kinke juõn ri ikkure eo ebuñbuñ​—eo ij kautieje ej kajerbale ke? Juõn kumi in ire ak juõn kumi eo ej kowõnmanlok juõn jitõbõn anemkwoj, im jumae ej kajerbale?’ Bareinwõt jej aikwij lukkun kalimjek im etale nuknuk eo. Elañe ej juõn nuknuk in kõrã eo ak juõn shirt, ta kin joñan aetokin? Wãwen air mwijiti im kije? Ej juõn nuknuk ekkar, im kautiej ke, ak juõn eo ekankan, jõkkar, im loktõktõk? Kajitõk ibbam make, ‘Nuknuk eo ij kõnake enaj lõkatip ke armij?’ (2 Dri Korint 6:​3, 4) Etke men in ej juõn men jej aikwij lemnak kake? Kinke Bible eo ej ba: “Bwe Kraist bareinwõt e ar jab mõke kabuñburuen.” (Dri Rom 15:3) Ro bõran family in Christian rej aikwij lukkun lemnak kin baotokin ro uan family eo air. Ilo air kautiej Anij eo eaibujuij rej kabuñ ñan e, ro bõran family ko rejjab kõnan ãliklik in lelok nan in kakabilek ko ralikar ilo yokwe ñe ewõr aikwij.​—Jemes 3:​13.

18. Ta eo ej kamakit yuk ñan lukkun lale wãwen nuknuk ko im ilem?

¹⁸ Ennan eo jej kwaloki ej itok jen Jehovah, eo ej joñok eo emõntata in kautiej im kwojarjar. (Aiseia 6:3) Bible eo ej rejañ kij bwe jen kajeoñe e “einwõt ajiri re jitenburu.” (Dri Epesõs 5:1) Nuknuk eo ad im iled remaroñ kautiej ak katton Jemed ilañ. Emol jekõnan kamõnõnõik buruen!​—Jabõn Kennan 27:11.

19. Ta tokjen ko rej itok jen ad kwalok nan kin “men ko relap an Anij” ñan ro jet?

¹⁹ Ewi am lemnak kin “men ko relap an Anij” kwar katak kake? Emol, ej juõn jerammõn elap ibbed ñan katak kin mol eo! Kinke jej jerbale tõmak ilo bõtõktõkin Jesus Christ emwij an katorlok, ej jolok bwid ko air. (Jerbal 2:​38) Tokjen men in bwe, ewõr ad maroñ ñan kebake Anij im konono ibben. Jejjab aikwij mijak kin mij einwõt an ro ejelok kejatdikdik ibbeir rej kõmmane. Jen men in, Jesus ej kallimure kij bwe juõn ran “ro otemjej rej ber ilo lũp ko, re naj roñ ainiken, im naj driojtok.” (Jon 5:​28, 29) Ilo joij Jehovah ej kalikar men otemjej ñan kij. Bareinwõt, ear lutõktok jitõb eo an iod. Inem, kamolol eo ad kin men in letok kein aolep en kar kamakit kij ñan kautiej kien ko an reutiej im nebar e ilo kijejeto, im kwalok nan kin ‘men kein relap’ ñan ro jet.

[Kamelele ko itulal]

Ewi Wãwen Am Naj Uak?

• Ta “men ko relap” armij ro rar roñ kake ilo Pentecost 33 C.E., im kar ewi wãwen air uak?

• Ewi wãwen an kar juõn armij erom juõn ri kaloran Jesus Christ, im mour in ri kalor ej kitibuj ta?

• Etke ej juõn men eaorõk ibbed ñan lukkun etale nuknuk ko ad im iled?

• Ta men ko jej aikwij lemnak kaki ñe jej bebe in kõnak juõn nuknuk ak style in nuknuk?

[Pija eo ilo peij 11]

Peter ear kejelã bwe Jesus ear jerkakbiji jen mij

[Pija ko ilo peij 13]

Ilõm im baotokõm rej kautiej ke Anij eo kwoj kabuñ ñan e?

[Pija ko ilo peij 14]

Ro jemen in jinen ajiri ro rej aikwij bõk itoklimo kin ta eo ilen ro uan family eo air