JINO BWEBWENATO IPPÃN ARMEJ
KATAK 4
Ettã Bõro
Naanin Kakapilõk: “Kom̦win kwal̦o̦k ettã bõro im watõk bwe ro jet reutiejl̦o̦k jãn kom̦.”—Pil. 2:3.
Men eo Paul Ear Kõm̦m̦ane
1. Alwõje PIJAIN ALWÕJ EO, ak riiti Jerbal 26:2, 3. Innem etale kajjitõk kein:
Ewi wãween an kar Paul kwal̦o̦k ettã bõro ke ear kõnnaan ippãn Kiiñ Agrippa?
Ewi wãween an kar Paul lel̦o̦k nõbar ñan Jeova im Naan ko An ijello̦kun an bõktok nõbar ñan e make?—Lale Jerbal 26:22.
Ta eo Jej Katak jãn Paul?
2. Enaaj l̦apl̦o̦k an armej ro itoklimo in roñjake ennaan eo ad ñe jej kwal̦o̦ke ilo ettã bõro im ilo kautiej.
Anõke Paul
3. Kõnono ilo juon wãween ej kwal̦o̦k kautiej. Kõjparok bwe kwõn jab kõm̦m̦an an armej eo l̦õmn̦ak bwe kwõjel̦ã aolep men ak ejjel̦o̦k men en̦ ejel̦ã kake.
4. Lukkuun kaalikkar bwe men ko kwõj kwal̦o̦k naan kaki rej pedped ioon Baibõl̦ eo. Naanin Anij emaroñ tõpar bũruon armej ro im jelõt wãween aer l̦õmn̦ak im eñjake. Ñe jej kõjerbale Baibõl̦ eo, men in enaaj jipañ er ñan kalõk tõmak eo aer ioon pedped eo ejim̦we.
5. Kwal̦o̦k wõt ineem̦m̦an. Jab booje armej eo bwe en tõmake men eo kwõj kajjioñ kwal̦o̦k ñane. Jejjab kõn̦aan akwããl ippãn armej. Kwal̦o̦k ettã bõro ikijjeen am̦ ineem̦m̦an wõt im jel̦ã ñããt eo ekkar ñan am̦ bõjrak jãn am̦ kõnono ippãn armej eo im em̦m̦akũt. (JK. 17:14, UBS; Tai. 3:2) Ñe jej kwal̦o̦k ineem̦m̦an im kõnono ilo juon wãween ej kwal̦o̦k etta bõro, bõlen armej eo enaaj m̦õn̦õn̦õ in bwebwenato ippãd bar juon iien.