KATAK 57
Ta El̦aññe Kwaar Kõm̦m̦ane Juon Jerawiwi El̦ap?
Meñe kwõj lukkuun yokwe Jeova im kwõj kate eok joñan wõt am̦ maroñ ñan kõjparok bwe kwõn jab kõm̦m̦ane jabdewõt men me enaaj kõmetak e, ak enãj wõr wõt jet iien kwõnaaj kõm̦m̦an likjab. Bõtab, ewõr jet jerawiwi ko me rekanooj l̦ap. (1 Korint 6:9, 10) El̦aññe kwaar kõm̦m̦ane juon jerawiwi el̦ap, keememej bwe ejjañin bõjrak an Jeova yokwe eok, im bwe em̦õn̦õn̦õ in jol̦o̦k am̦ bõd im jipañ eok.
1. Ta eo jej aikuj kõm̦m̦ane bwe Jeova en maroñ jol̦o̦k ad bõd?
Ro rej yokwe Jeova rej lukkuun bũrom̦õj ñe rej kile bwe em̦õj aer kõm̦m̦ane juon jerawiwi el̦ap. Ak rej bõk kaenõm̦m̦an jãn naanin kallim̦ur kein an Jeova ñan armej ro an ke ear ba: “Meñe bõd ko ami rej ãinwõt bũrõrõ, renaaj mouj ãinwõt jin̦o.” (Aiseia 1:18) El̦aññe elukkuun m̦ool ad ukel̦o̦k, innem Jeova enaaj lukkuun jol̦o̦k ad bõd. Ewi wãween ad ukel̦o̦k? Jej ukel̦o̦k ikijjeen ad lukkuun ajl̦o̦k im bũrom̦õj kõn bõd eo jaar kõm̦m̦ane, im jej bõjrak jãn ad kõm̦m̦ane bõd eo im akwel̦ap ñan Jeova bwe en jol̦o̦k ad bõd. Innem jej kate kõj ñan kõm̦m̦an oktak ilo wãween ad l̦õmn̦ak im imminene ko ad me rar tõll̦o̦k kõj ñan kõm̦m̦ane jerawiwi eo, im jej kate kõj ñan mour ekkar ñan kien ko rerreo an Jeova.—Riit Aiseia 55:6, 7.
2. Ewi wãween an Jeova kõjerbal em̦m̦aan ro rej lale eklejia ñan jipañ kõj ñe jej kõm̦m̦an jerawiwi?
El̦aññe jaar kõm̦m̦ane juon jerawiwi el̦ap, Jeova ej jiroñ kõj bwe jen “kũrtok em̦m̦aan ro rej lale eklejia eo.” (Riit Jemes 5:14, 15.) Em̦m̦aan rein me em̦õj jitõñ er relukkuun yokwe Jeova im jiip ro an. Rein rejel̦ã kilen jipañ kõj ñan jel̦ã ta ko jej aikuj kõm̦m̦ane bwe en bar em̦m̦an kõtaan eo ad ippãn Jeova.—Galetia 6:1.
Ewi wãween an em̦m̦aan ro rej lale eklejia jipañ kõj ñe jaar kõm̦m̦ane juon jerawiwi el̦ap? Enãj wõr ruo ak jilu em̦m̦aan ro renaaj kajim̦we kõj ikijjeen aer kõjerbal naanin kauwe ko jãn Baibõl̦. Renaaj bareinwõt letok naanin rõjañ ko im jipañ kõj kõn men ko jemaroñ kõm̦m̦ani ñan kõjparok bwe jen jab bar kõm̦m̦ane jerawiwi eo. El̦aññe juon ear kõm̦m̦ane juon jerawiwi el̦ap ak ejjab ukel̦o̦k, innem em̦m̦aan ro rej lale eklejia renaaj jol̦o̦ke jãn eklejia eo bwe en jab jelõt ro jet.
KAM̦WILAL̦L̦O̦K AM̦ MEL̦EL̦E
Kal̦apl̦o̦k am̦ mel̦el̦e im kam̦m̦oolol kõn wãween an Jeova jipañ kõj ñe jaar kõm̦m̦ane juon jerawiwi el̦ap.
3. Ad kwal̦o̦k jerawiwi ko ad ej jipañ kõj ñan kakõm̦anm̦anl̦o̦k jem̦jerã eo ad ippãn Jeova
Jabdewõt jerawiwi jej kõm̦m̦ane rej jelõt Jeova, kõn men in, ekkar bwe jen kwal̦o̦k ñane. Riit Sam 32:1-5, innem bwebwenato kake kajjitõk in:
Etke ej juon men em̦m̦an ñan kõj ñan kwal̦o̦k jerawiwi ko ad ñan Jeova ijello̦kun ad kajjioñ n̦ooji?
Kobal̦o̦k ippãn ad kwal̦o̦k jerawiwi ko ad ñan Jeova, enãj em̦m̦anl̦o̦k ad mour ñe jej bar kappok jipañ jãn em̦m̦aan ro rej lale eklejia eo. Kõjo̦e PIJAIN ALWÕJ eo, innem bwebwenato kake kajjitõk in:
Ilo pijain alwõj eo, ewi wãween an kar em̦m̦aan ro rej lale eklejia jipañ Canon ñan an bar jepl̦aak ñan Jeova?
Jej aikuj lukkuun kwal̦o̦k m̦ool ñan em̦m̦aan ro rej lale eklejia kõnke em̦õj likũt er bwe ren jipañ kõj. Riit Jemes 5:16, innem bwebwenato kake kajjitõk in:
Etke epidodol̦o̦k an em̦m̦aan ro rej lale eklejia jipañ kõj ñe jej kwal̦o̦k m̦ool?
Kwal̦o̦k jerawiwi eo am̦, kwal̦o̦k m̦ool ñan em̦m̦aan ro rej lale eklejia, im m̦õn̦õn̦õ in bõk jipañ jãn Jeova
4. Jeova ej kwal̦o̦k an tũriam̦o ñan ro rej kõm̦m̦an jerawiwi
El̦aññe juon armej ear kõm̦m̦ane juon jerawiwi el̦ap ak ejjab kon̦aan l̦oore kien ko an Jeova, eokwe naaj jol̦o̦ke jãn eklejia eo im jejjab aetõl er. Riit 1 Korint 5:6, 11, innem bwebwenato kake kajjitõk in:
Ãinwõt an iij jelõt aolepen pilawã eo, ñe jenãj aetõl im kõm̦m̦ao ippãn juon ri-jerawiwi eo ejjab ukel̦o̦k, ewi wãween an nãj men in jelõt eklejia eo?
Ilo aer anõke tũriam̦o eo an Jeova ñan ro rej kõm̦m̦an jerawiwi, em̦m̦aan ro rej lale eklejia eo rej kate er im jipañ ro me em̦õj jol̦o̦k er jãn eklejia eo. Elõñ iaaer em̦õj aer bar jepl̦aaktok ñan eklejia eo. Etke? Kõnke meñe ekar kõmmetak aer kar jako jãn eklejia eo, ak men in ear jipañ er bwe ren kile joñan bõd eo rar kõm̦m̦ane.—Sam 141:5.
Etke wãween an Jeova kõm̦m̦an ñan ro rej jerawiwi ej kwal̦o̦k bwe ejim̦we an ekajet, etũriam̦o, im el̦ap an yokwe?
5. Jeova ej jol̦o̦k ad bõd ñe jej ukel̦o̦k
Jesus ear kõjerbal juon waanjoñak me ejipañ kõj ñan mel̦el̦e kõn wãween an Jeova eñjake ñe juon armej ej ukel̦o̦k. Riit Luk 15:1-7, innem bwebwenato kake kajjitõk in:
Ta eo men in ej katakin eok kõn Jeova?
Riit Ezekiel 33:11, innem bwebwenato kake kajjitõk in:
Ta buñtõn ne eo eaorõk jej aikuj kõm̦m̦ane ñan kaalikkar bwe em̦ool ad ukel̦o̦k?
Ãinwõt juon jabõt, el̦ap an Jeova kea kõn jiip ro an
JET ARMEJ REJ BA: “Imijak in kwal̦o̦k bõd eo aõ ñan em̦m̦aan ro rej lale eklejia kõnke remaroñ jol̦o̦k eõ jãn eklejia eo.”
Ta eo kwõnãj kar ba ñan juon armej me ej bõk l̦õmn̦ak in?
TARLEP IN KATAK EO ILO TUKADU
El̦aññe jaar kõm̦m̦ane juon jerawiwi el̦ap ak elukkuun m̦ool ad ajl̦o̦k kake im jej jek ippãd make ñan bõjrak jãn ad kõm̦m̦ane men eo enana, Jeova enaaj jol̦o̦k ad bõd.
Ãlij
Etke ej juon men em̦m̦an ñan kõj ñan kwal̦o̦k jerawiwi ko ad ñan Jeova?
Ta eo jej aikuj kõm̦m̦ane bwe Jeova en maroñ jol̦o̦k ad bõd?
El̦aññe jej kõm̦m̦ane juon jerawiwi el̦ap, etke jej aikuj kappok jipañ jãn em̦m̦aan ro rej lale eklejia?
KAL̦APL̦O̦K AM̦ MEL̦EL̦E
Lale wãween an kar juon em̦m̦aan lo tũriam̦o eo an Jeova ãinwõt an kar Aiseia 1:18 kwal̦o̦k kake.
Ewi wãween an em̦m̦aan ro rej lale eklejia kajjioñ jipañ ro rej kõm̦m̦an juon jerawiwi el̦ap?
“Kwal̦o̦k Yokwe im Tũriam̦o ñan Ro Rej Jerawiwi” (Naan in Keeañ, O̦kwõj 2024)
Etale wãween ñan kwal̦o̦k yokwe im tũriam̦o ñan rijjerawiwi ro me rejjab ukel̦o̦k.
“Jipañ Ro Em̦õj Jol̦o̦k Er jãn Eklejia Eo” (Naan in Keeañ, O̦kwõj 2024)
Ilo bwebwenato eo etan “I Needed to Return to Jehovah,” lale etke juon em̦m̦aan me ear jebwãbwe jãn m̦ool eo, eñjake bwe Jeova ear bar karuwaakl̦o̦k e ñan E.