Men ko Relukkuun Nana Rej Wal̦o̦k kõn Wõt Tarin̦ae
Elukkuun l̦ap an tarin̦ae im poktak ko jelõt armej ro me rej iiooni wãween kein. Ipel̦aakin lal̦ in, rũttarin̦ae ro im armej ro me rej jokwe ilo jikin ko ewõr tarin̦ae ie, relukkuun jel̦ã im mel̦el̦e kõn men ko rekabũrom̦õjm̦õj rej wal̦o̦k itok wõt jãn tarin̦ae.
RŨTTARIN̦AE RO
“Eokkutkut am̦ lo an armej ro mej ak l̦ap an jorrããn ãnbwinnier. Aolep iien kwõj eñjake am̦ pãd ilo uwõta.”—Gary, Britain.
“Kar buuk likũ im meja, im iar lo an elõñ armej ro mej, ekoba ajri ro im lel̦l̦ap im l̦al̦l̦ap ro. Tarin̦ae ej kõm̦m̦an bwe en dikl̦o̦k am̦ kea kõn eñtaan ko an armej.”—Wilmar, Colombia.
“Ñe kar buuki juon armej im̦aan mejam̦, epen am̦ jol̦o̦k men eo ear wal̦o̦k jãn kõl̦mãnl̦o̦kjen̦ eo am̦. Elõñ alen am̦ keememejtok am̦ kar loe im roñ an armej eo eñtaan. Kwõban mel̦o̦kl̦o̦ke armej eo—ñan jidik.”—Zafirah, America.
RO REJ JOKWE ILO JIKIN KO EWÕR TARIN̦AE IE
“Iar l̦õmn̦ak bwe iban bar lo m̦õn̦õn̦õ ilo mour e aõ. Iar mijak bwe inaaj mej, bõtab men eo me el̦apl̦o̦k aõ kar mijake ej an baam̦le eo aõ im ro m̦õtta naaj mej.”—Oleksandra, Ukraine.
“Ke kõmar l̦ain ñan bõk kijemmim m̦õñã jãn 2 awa jibboñ l̦o̦k ñan 11 awa jota, kõmar lukkuun mijak kõnke kõmar epaake juon jikin ewõr tarin̦ae ie im kõmar jaje ñããt eo kõm naaj lel jãn aer bu.”—Daler, Tajikistan.
“Jinõ im jema rar mej kõn wõt tarin̦ae. Kõn men in, iar make iaõ im ejjel̦o̦k en̦ ear lale im kaenõm̦m̦an eõ.”—Marie, Rwanda.
Meñe rein me em̦õj ad kõnono kaki rar iioon wãween ko relukkuun nana kõn wõt tarin̦ae, ak kiiõ em̦õj aer lo aenõm̦m̦an. Ejjab men in wõt, ak relukkuun tõmak bwe enaaj jem̦l̦o̦k aolep tarin̦ae im poktak ko. Naan in Keeañ in enaaj kõjerbal Baibõl̦ eo ñan kõmel̦el̦e ewi wãween an men in naaj wal̦o̦k.