Wãween an Tarin̦ae im Poktak ko Jelõt Kõj Aolep
“Oran poktak ko rej wal̦o̦k ilo lal̦ in kiiõ el̦apl̦o̦k jãn oran poktak ko rar wal̦o̦k ilo Pata eo an Lal̦ Kein Karuo, im 2 pilien armej—25 bõjjããn in armej ro ilo pel̦aakin lal̦ in—rej jokwe ilo jikin ko ewõr poktak ie.”
United Nations Deputy Secretary-General Amina J. Mohammed, Jãnwõde 26, 2023.
Emaroñ kajju oktak im wõr tarin̦ae im poktak ko ilo jikin ko me ewõr aenõm̦m̦an ie. Joñan, tarin̦ae im poktak kein remaroñ bar jelõt armej ro me rej jokwe ilo aelõñ ko rettol̦o̦k. Im meñe enãj jem̦l̦o̦k aer tarin̦ae, ak men ko renana rar wal̦o̦k itok wõt jãn wãween kein remaroñ wõnm̦aanl̦o̦k wõt im jelõt armej ro ak jikin kein. L̦õmn̦ak kõn jet waanjoñak ko:
Jabwe m̦õñã. Ekkar ñan juon doulul etan World Food Programme, “tarin̦ae ej un eo el̦aptata unin an wõr kwõle. 70 bõjjããn in armej ro me rekwõle rej jokwe ilo jikin ko ewõr tarin̦ae im poktak ko ie.”
Jorrããn ko ilo ãnbwin im kõl̦mãnl̦o̦kjen̦. Emaroñ lukkuun l̦ap an armej ro inepata ñe rej l̦õmn̦ak bwe enãj wõr tarin̦ae ilo jikin eo rej jokwe ie. Armej ro me rej jokwe ilo jikin ko ewõr tarin̦ae ak poktak ko ie, ekkã an wõr aer jorrããn ilo ãnbwin im ilo kõl̦mãnl̦o̦kjen̦. Ijoke, ekabũrom̦õjm̦õj bwe ekkã aer jab maroñ taktõ im bõk jipañ eo rej aikuji.
Armej rej aikuj ko jãn m̦õko im̦weer. Ekkar ñan United Nations High Commissioner for Refugees, ilo Jeptõm̦ba 2023 eo, elõñl̦o̦k jãn 114 milien armej ipel̦aakin lal̦ in rar aikuj ko jãn m̦õko im̦weer. Unleplepin men in ej kõn tarin̦ae im poktak ko.
Apañ kõn jããn. Ekkã an tarin̦ae kõm̦m̦an bwe en wõr apañ kõn jããn, ñan waanjoñak emaroñ l̦apl̦o̦k on̦ããn aolep men jãn kar m̦okta. Armej ro rej eñtaan kõnke jããn eo kien en kar kõjerbale ñan jikin taktõ im jikin jikuul̦ ko, rej kõjerbale ñan tarin̦ae. Im ãlikin tarin̦ae, ekkã an l̦ap on̦ããn bar kakõm̦anm̦an jikin ko rar jorrããn jãn tarin̦ae.
Ejorrããn jikin eo kwõj jokwe ie. Armej rej eñtaan ñe ãne ak jikin eo rej jokwe ie ej jorrããn jãn tarin̦ae. Ñe ettoon dãn, mejatoto, im bwidej eo, men in ekõm̦m̦an bwe armej ro ren nañinmej. Im meñe ebõjrak tarin̦ae eo, ak armej remaroñ jorrããn jãn baam̦ ko rar pãdwõt ãlikin aer kar tarin̦ae.
Ejjel̦o̦k pere bwe tarin̦ae ej kõm̦m̦an el̦ap jorrããn im el̦ap on̦ããn.