Unin an Tarin̦ae im Poktak ko Wõnm̦aanl̦o̦k Wõt

JERAWIWI

Anij ear kõm̦anm̦an rũtto ro jibwid im jim̦m̦aad jinointata, Adam im Iv, ilo nemãmeen wõt E. (Jenesis 1:27) Mel̦el̦ein bwe enaaj kar piktokier ñan kwal̦o̦k kadkad ko an Anij, ãinwõt kadkadin yokwe im aenõm̦m̦an. (1 Korint 14:33; 1 Jon 4:8) Ijoke, Adam im Iv rar jab pokake Anij im rar jerawiwi. Tokjãn men in, kõj aolep jaar jolõt jerawiwi im mej. (Rom 5:12) Kõnke jaar jolõt jerawiwi, ekkã ad bõk l̦õmn̦ak ko renana im eñin unin elõñ armej ro rej kõm̦m̦ani men ko renana im relãj.—Jenesis 6:5; Mark 7:​21, 22.

KIEN AN ARMEJ

Anij ear jab kõm̦anm̦an kõj bwe jen tõl kõj make. Baibõl̦ ej ba: “Ejjab an juon armej eo ej etetal bwe en jineet buñtõn neen.” (Jeremaia 10:23) Eñin unin kien ko an armej rejjab maroñ lukkuun jol̦o̦k tarin̦ae im kowadoñ.

SETAN IM JETÕB KO RETTOON

Baibõl̦ ej ba bwe “aolepen lal̦ in ej pãd ium̦win pein ri-nana eo.” (1 Jon 5:19) “Ri-nana eo” ej Setan Tepil̦ eo, im ej juon ri-uror elukkuun lãj. (Jon 8:44) Meñe jejjab loe, ak Setan im jetõb ko jet rettoon rej ro me rej kõm̦m̦an bwe en wõr tarin̦ae im poktak ko.—Revelesõn 12:​9, 12.