Wãween an Naaj Jem̦l̦o̦k Tarin̦ae im Poktak Ko

ANIJ ENAAJ KO̦KKURE KIEN KO AN ARMEJ

Anij enaaj ko̦kkure kien ko an armej ilo juon iien tarin̦ae me Baibõl̦ ej n̦aetan Armagedon.a (Revelesõn 16:16) Ilo tõre en̦, naaj kakobaiktok “kiiñ ro iaolepen lal̦” ñan “tarin̦ae eo ilo raan eo el̦ap an Anij, eo Ekajoor Bõtata.” (Revelesõn 16:14) Tarin̦ae eo an Anij etan Armagedon, enaaj kabõjrak aolep tarin̦ae ko im eban bar wõr tarin̦ae.

Anij enaaj kõm̦m̦an bwe Aelõñ eo an, ak kien eo an, en bõk jikin aolep kien ko an armej. Kien in an Anij enaaj tõl jãn lañ im ejjãmin bõk ko̦kkure. (Daniel 2:44) Em̦õj an Anij kããlõt eo Nejin, Jesus Christ, bwe en Kiiñ. (Aiseia 9:​6, 7; Matu 28:18) Kien in ej Aelõñ eob me Jesus ear katakin ri-kal̦oor ro an ñan jar kake. (Matu 6:9, 10) Aolep armej ipel̦aakin lal̦ in renaaj bõrokuk ium̦win juon wõt kien im Jesus enaaj aer ri-Tõl.

Jesus enaaj oktak jãn armej ro rej tõl kõnke eban kõjerbal maroñ eo an ñan kowõnm̦aanl̦o̦k kõn̦aan ko an make. Kõnke Jesus ej juon eo ejim̦we wãween an jerbal im ejjel̦o̦k kalijekl̦o̦k ippãn, ejjel̦o̦k juon armej enaaj aikuj inepata el̦aññe eban bõk jipañ kõn an oktak kil eo kilin, aelõñ eo an, ak m̦anit eo an. (Aiseia 11:​3, 4) Im armej ro reban aikuj bait kõn jim̦we im maroñ ko aer. Etke? Kõnke Jesus ej kea el̦aññe em̦m̦an wãween an kajjojo armej ro mour. “Ej lo̦mo̦o̦ren ro ri-jeram̦õl ñe rej kũr ñane, kab ro ri-aikuj im rejool. . . . Ej lo̦mo̦o̦ren er jãn ro relãj rej kaeñtaan er.”—Sam 72:​12-14, UBS.

Aelõñ eo an Anij enaaj ko̦kkure aolep kein tarin̦ae ko ioon lal̦ in. (Maika 4:3) Enaaj bareinwõt ko̦kkure aolep armej ro renana me rem̦akoko in bõjrak jãn aer tarin̦ae ak ko̦kkure an ro jet aenõm̦m̦an. (Sam 37:​9, 10) Aolep em̦m̦aan, kõrã, im ajri reban eñjake aer pãd ilo uwõta jekdo̦o̦n ia eo rej pãd ie ilo lal̦ in.—Ezekiel 34:28.

Enaaj lukkuun em̦m̦an kõjeiien armej ro ilo iien eo kien eo an Anij ej tõl. Enaaj jol̦o̦k aolep men ko me rej kõm̦m̦an an wõr poktak ko ikõtaan armej ro, ãinwõt jeram̦õl, kwõle, im an jabwe jikin jokwe. Enaaj lukkuun lõñ kijen aolep m̦õñã ko reuõne im jikin aer jokwe me em̦m̦an kõjeiier.—Sam 72:16; Aiseia 65:​21-23.

Aelõñ eo an Anij enaaj jol̦o̦k aolep men ko relukkuun nana me rar wal̦o̦k itok wõt jãn tarin̦ae. Men in ekitibuj jorrããn ko ippãn armej ilo ãnbwin ekoba ilo kõl̦mãnl̦o̦kjen̦ im eñjake. Joñan, ro me rar mej renaaj jerkakpeje im mour ijin ioon lal̦. (Aiseia 25:8; 26:19; 35:​5, 6) Baam̦le ko renaaj bar ippãn doon im armej rejjãmin keememej men ko renana rar wal̦o̦k jãn tarin̦ae kõnke “men ko m̦okta rejako.”—Revelesõn 21:4.

ANIJ ENAAJ JOL̦O̦K JERAWIWI

Ium̦win tõl eo an Aelõñ eo an Anij, armej renaaj bõrokuk ilo aer kabuñ ñan Anij eo em̦ool, Jeovac, eo me ej “Anij in yokwe im aenõm̦m̦an.” (2 Korint 13:11) Armej renaaj katak kilen mour ippãn doon ilo aenõm̦m̦an. (Aiseia 2:​3, 4; 11:9) Aolep ro me rej jerbale men ko rej katak kaki renaaj rõl̦o̦k jãn jerawiwi.—Rom 8:​20, 21.

ANIJ ENAAJ KO̦KKURE SETAN IM JETÕB KO RETTOON

Aelõñ eo an Anij enaaj ko̦kkure ro rej wũnjãn tarin̦ae, Setan im tim̦on̦ ro an. (Revelesõn 20:​1-3, 10) Ñe ejako aer kapo armej ro, “enaaj l̦ap aenõm̦m̦an.”—Sam 72:7.

Kwõmaroñ lõke bwe enaaj jejjet kũtien kallim̦ur eo an Anij ñan jol̦o̦k tarin̦ae im poktak ko. Ewõr an maroñ im ekõn̦aan jol̦o̦k tarin̦ae.

• Ewõr an Anij mãlõtlõt im kajoor ñan jol̦o̦k tarin̦ae im jerbal ko rellãj. (Job 9:4) Ewõr an Anij maroñ ñan katõprak men otemjej ekõn̦aan kõm̦m̦ane.—Job 42:​2, UBS.

• Anij edike ñe ej lo an armej ro eñtaan. (Aiseia 63:9) Ej bareinwõt “kõjdate [jabdewõt] eo ej yokwe lãj.”—Sam 11:5.

• Aolep iien Anij ej kajejjet naan ko an; eban riab.—Aiseia 55:​10, 11; Taitõs 1:2.