Yinye wa ka wana ko kumakongano ghetu ghoThikriste?

Haguva hohengi ha shayeka kuyenda kumangirishe ghawo yoyishi mbadi ha wana mahuthero kumepwero ghawo. Pashanye sho yendere kumakongano ghoHashupi waJehova? Yinye wa ka wana kumakongano ghawo?

Ghowe ñanyi wa ka hafe mukukara mukatji kohanu hohawa hothiraro. Muruvedhe rwawapostoli, Hakriste nga ha kongananga pofotji hakarere Nyambi nokukuhonga matjangwa ndani kukutjokedha-tjokedha. (Heburayi 10:​24, 25) Mukukongana pofotji, awo ngaha kuyuvanga yira nawayendhagho hadi. (2 Hakatesalonika 1:⁠3; 3 Johannesi 14) Natwe kukutha thitamenedhi thawapostoli yoyishi kuwanena mo yishamberera yokukupitura.

Ghowe ñanyi wa kukuhonge edi sho ghu kumithemo miragho dhoBayibili. Pakare-kare, hakafumu nohakamadi ndani hanagho ngaha kongananga pofotji. Hahongi hohawa kurughanitha Bayibili hatu ghamwene tu kumithemo miragho dhoBayibili. (Deuteronomium 31:​12; Nehemiya 8:⁠8) Mukutapa mahuthero nokwimba pofotji kuneghedha makurupero gha twa kara nagho.​—⁠Haheburayi 10:⁠23.

Makurupero ghoye mwaNyambi ñanyi gha kutanare. Mupostoli Paghulusi kwa tongwere mbungakriste eshi: “Ame kuna kumurura kumumona mwe. . . no pakukutjokedha makonganeno ghomatawero. Ame papenu namwe papange.” (Hakaroma 1:​11, 12) Kukara kumakongano pofotji nohatawi hayendhetu, kutanaritha makurupero ghetu karo kutughamwena tu tokomene kupara kukuwa nomiragho dhomuBayibili.

Tuna kwitha, kumakongano ghetu nokumonene ghothinda maghuwa gha tuna ghamba. Mbadi twa futithanga ngeshi ghu neya kumakongano ghetu.

•  Thitamenedhi thadye twa kuthanga kuhatera makongano ghetu?

•  Ngepi edi sho tu wanenemo ghuwa mukuyenda kumakongano ghoThikriste?