Hadhinguri hombunga ngepi edi hana tu ghamwenanga?

MuBayibili hatoya mo kuhatera Barnabasi namupostoli Paghulusi. Awo kwa karire hadhinguri hombungakriste. Pashanye? Yoyishi kwa karire nothinga kwawatawi hayendhagho. Paghulusi kwa shanine kuhuka gha ka mone hayendhendi eshi ‘ngepi edi yina kuwayenda.’ Aye ne kwa yendire ndhira dhodhire dhokawatjokedha. (Yitenda 15:​36) Ruhakitho ru rodiyo hakara naro hakakudhingura mambunga pashadyarero.

Awo kwiya nohatutjokedhe. Kehe mudhinguri ghombunga kudhingura mambungakriste ghokukuma pa 20 ruwadi mumwaka, aye kudhingura kehe mbungakriste muthivike rofotji. Atwe kuwanenamo ghuwa mughudimuki wohadhinguri owa pofotji nohakamadi wagho. Awo kuyereka kudimuka hamurereya, hakuru ndani kuyenda netu muyirughana yokuyuvitha podiyo eshi hakamone wa twa kuhonganga nagho Bayibili. Hadhinguri wa kuyenda pofotji nohakuru hombunga hakadhingure ndani hakatjokedhe hamweya homumbungakriste, karo awo kutapa yighamba yokututjokedha kumakongano nokuyigongi yetu.​—⁠Yitenda 15:⁠35.

Awo kuneghedha ruhakitho kwa kehe yu. Hadhinguri hombunga ha shana eshi hanu ghomumbungakriste ha tanarithe makukwatathano ghawo naJehova. Awo kukara nothigongi pofotji nohakuru hombunga ndani nohaghamweni hombunga hawa tjokedhe nokudimuka eyi yina kuhokoka mumbunga. Awo kughamwena hayuvithi hokukarerera edi sho yi wa tomboke muyirughana yokuyuvitha, ndani wo kuyihafera shemwa mukudimuka hohapya mumbunga ndani nokuyuva marundurukero gha hana kutura po. Hadhinguri hombunga wo ne ‘harughani hayendhetu hokutughamwena.’ (2 Hakorinte 8:​23) Natwe tutemune thitamenedhi thawo thomatawero noghutawedhi wagho kwaNyambi.​—⁠Haheburayi 13:⁠7.

• Thitambo munye hadhinguri hombunga hana dhinguranga mambungakriste?

• Ghuwa munye sho wanenemo mumadhinguro awo?