Ngepi tuna ghamwenanga hatawi hayendhetu wa hadi noyitokota?

Pakuhokoka mayipithero ghongandji, Hashupi waJehova kughamwena hatawi hayendhagho wa hadi mughukukutu gho kemo. Yirughana yokemo kuneghedha ruhakitho roshemwa kwawayendhetu. (Johannesi 13:​34, 35; 1 Johannesi 3:​17, 18) Mumayira munye tuna kughamwenanga?

Atwe kutapa masherenyi. Apa mwa karire diyerenge dyodikuru muJudeya, Hakriste homuAntiyokiya kwa tumine masherenyi kwaWakriste hayendhagho. (Yitenda 11:​27-30) Yina kupitura, apa twa yuvanga eshi hatawi hayendhetu hokumatunga ghawo nagho hadi mughukukutu, atwe kutuma masherenyi kupitera muyitapa yomumbungakriste podiyo eshi hatawi hayendhetu hayirughanithe.​—⁠2 Hakorinte 8:​13-⁠15.

Atwe kughamwena kutunderera kumutjima. Hakuru hombunga homu dyango dyoyihokoka yokemo hakona kudimukitha eshi hatawi hayendhetu hana wawana ndani mumaghamweno ghongandji hadi. Komitiye dhokughamwena kukona kutapa yidya, meyu, yivata, mararo ndani noghuwanga. Hatawi hayendhetu awa hakara noghudimuki wo kumba, kuyenda hakaroghuthure mayimbo noYikota yoghuFumu. Makongano agha tuna haferanga pofotji mumbunga dhetu ndani noghudimuki oghu twa wana pakurughanena pofotji kutughamwena turughane thinu wangu-wangu pamayuwa ghomaghukukutu. Ngambi ngepi twa tapanga maghamweno “kwawatawi hayendhetu” atwe shime kughamwena haguva hagho-nagho awa hadhira kuhatera kughukareri wetu.​—⁠Hakagalasiye 6:⁠10.

Atwe kutapa matjokedhero ghomuBayibili. Hanu wa ghakundama mayipithero gha ha kone kuwa hengaghura. Mumaruvedhe gho kemo, atwe kuwana ngcamu kutunderera kwaJehova, “yoNyambi gha hengaghura mukehe maghukukutu ghomahe.” (2 Hakorinte 1:​3, 4) Atwe kutongwera ko noruhafo hanu hokuguva kuhatera matoyedhero ghomuBayibili, kuwa hengaghura noghuFumu waNyambi eshi tamba wa ka ghurithe po maghukukutu ghomahe kenge yira tjitju ndani nokunyanda.​—⁠Yihokora 21:⁠4.

• Pashanye Hashupi waJehova hana ghamwenanga wangu wa hadi nomaghukukutu?

• Mahengawero munye ghomuBayibili twa tapanga ngeshi mayipithero ghadipo?