THIHONGA 19
Yidye mupika ghomutawedhi noghomaghano?
Twaheya kukuhongera ko yoyiwa kughudimuki wetu wokuhatera kwaNyambi
Kughutho ghafe Jesusi, aye kwa ghambire nohahongwa wendi, Peturusi, Jakobusi, Johannesi ndani naAndreyasi. Apa gha ghambire yidimukitho yomayuwa hendi gho ghuhura, aye kwepure dipwero dyomudyo eshi: ‘Mupika munye ghomuhunga endi ghomutawedhi noghomaghano, oyu mbo gha paka hekudyendi kwawapikendi hamweya eshi, gha wape yidya munako dhokurikanya?’ (Mateghusi 24:3, 45; Markusi 13:3, 4) Jesusi kwa karire ‘hekudya’ wa wahongwa wendi mukuwatoyedhera eshi, aye ne ñanyi gha ku torore hakuthi ho kukona kutapa yidya yopamupepo paruvedhe ropaghuhura. Hadye hadi mo mumbunga dhi dhomupika?
Awo ne hakuthi haJesusi wa ha pwa kuwetha. “Mupika” kutapa ghudimuki wokuhatera kwaNyambi panako dhokurikanya kwawa kareri haJehova. Atwe kwa kurupera mwa mupika ghomaghano gha tupe kehepano “yidya munako dhokudya.”—Lukasi 12:42.
Awo kuyenditha dighumbo dyaJehova. (1 Timoteghusi 3:15) Jesusi kwa pire mbunga dhi dhawapika ngcamu dhokuyenditha yirughana yopamuve yombunga dhaJehova, awo kutakamitha yirughanitha yombunga, kuyenditha yirughana yokuyuvitha, ndani nokutuhonga kupitera mumakongano ghetu. Mukutupa eyi yanyandiwa po paruvedhe rwayo, ‘mupika ghomutawedhi noghomaghano’ kuna kutapa ghudimuki wokuhatera kwaNyambi kupitera muyimbapiratjangwa eyi tuna rughanithanga mukuyuvitha, ndani kupitera muyighamba eyi tuna yuvanga kumakongano nokuyigongi yetu.
Mupika yu ghadi noghutawedhi kughushemwa ghomuBayibili ndani noyirughana yokuyuvitha mbudhi dhodhiwa, ndani ye ne gha dimuka kutakamitha mbunga dhaKristusi pano pamuve. (Yitenda 10:42) Jehova ne kutapa fighaghudhi kuyirughana yagho ndani aye kuwaghamwena ha tupe ghudimuki wokuhatera kwaNyambi.—Jesaya 60:22; 65:13.
Yidye gha wethire Jesusi mukupa hahongwa wendi ghudimuki wokuhatera kwaNyambi?
Mumayira munye gha kara mupika ghutawedhi ndani nomaghano?