MUTARA 6
Kambututu kakundama yiyeka
“Hatutughurughana, yitapa yaFumu.”—Pisalemi 127:3
Mushamurukero ghokambututu kureta kuhafa ene pa kara thirugahana thothikuru. Mukukara mureti ghomupya, ñanyi mwa kunongonone eshi nako nongcamu dhenu ñanyi mwa kudhirughanithe mukupakera thinga mwanuke. Kupira kurara turo tokurikanyapo ndani nothinga kureta ghukukutu muyiyeka yenu. Nowe namundambo ghoye mwa kona kutura po marundurukero edi shomurere mwanuke nokutaneritha yiyeka yenu. Ngepi miragho dhomuBayibili shodhi kughamwene mukukudhidhimikira maghukaro ghokenge yo?
1 KWATE DIGHANO EDI KAMBUTUTU SHO KAKUNDAME YIPARA YOYE
EYI DHA GHAMBA BAYIBILI: “Ruhakitho ne ghudhughutjima, ruhakitho ne ghunongo.” Ndani ruhakitho “mbadi rwa kutokomena rothinda, aro rwa pira ghupata.” (1 Hakorinte 13:4, 5) Mureti ghomupya, ghowe ñanyi wa kudhemenene mukupakera thinga kambututu. Ene mukafumu ghoye kukona ghakuyuve eshi ghuna muthigherera, podigho eshi wa kuvurama eshi naye ghana kunyanda. Mukukara nomi dhokukudhidhimekera noruhakitho, muneghedhe eshi naye ghuna mu nyanda ndani naye mutawedhere mukupakera thinga kambututu.
Bayibili kughamba eshi: “Mwatutughuru, mwa kona kupara pofotji thiwana nawakamadi wenu.” (1 Petrusi 3:7) Wa kona kuyikwata dighano eshi mukamadi ghoye gha rughanitha ngcamu dhendi mukupakera thinga kambututu. Thirughana tho thothipya kukona thimuretere kughaya, thinga nokuguva. Paruvedhe rumweya kukona ghapate, ene wa kona kukumbirupitha yoyishi ‘kukara mudhidhimeki kwa pitakana kukara nongcamu.’ (Yisewe 16:32) Mbadi ghu pate, ene kwatitheko mukamadi ghoye.—Yisewe 14:29.
EYI SHO RUGHANE:
Wiha: Vatere mukamadi ghoye mukupakera thinga kambututu ghuthiku. Fupipithe ruvedhe oru wa rughanithanga kuyinu yayonayo, podigho eshi ghu kare pofotji namukamadi ghoye namwanoye
Nyina: Ngeshi mukafumu ghoye ghana shana kukughamwena kupakera thinga kambututu, tambure maghamweno ghendi. Ngeshi mbadi ghana kuyikumitha mo thiwana, wa pata ene mu neghedhe noyikara yoyiwa
2 TANARITHE MAKUKWATATHANO GHENU
EYI DHA GHAMBA BAYIBILI: “Mughuwadi wawo hana kukara yofotji.” (Mateghusi 19:5) Ngambi mu kare nokambututu wa kona kudimuka eshi nowe namundambo ghoye shime yirama “yofotji.” Podigho eshi rughane thikumanena mutanarithe makukwatathano ghenu.
Hakamadi, mutambure maghamweno kwawakafumu wenu. Mañando ghenu ghomawa ghokutapa matumero “kwirukitha.” (Yisewe 12:18) Hakafumu, mutongwere hakamadi wenu eshi mwa wa haka ndani awo mudyo thikumenena. Nokuwatanaghura koyi hapakeranga thinga madhiko ghenu.—Yisewe 31:10, 28.
Bayibili kughamba eshi: “Gha shana munu yokumuroghera thinda, ene yokwamuyendhendi ndani.” (1 Hakorinte 10:24) Rughanene kehe pano mundambo ghoye yoyiwa. Mukukara hakakukuyeka mwa kona kukuturera po ruvedhe rokukuvureka, kukutegherera nokukupa matumero. Kuhatera kukuwanekera panyama wa kondjera ngenyu koye ghothinda. Bayibili kutongora eshi: “Mwa shwena kukupirukera. Shimengwa nomakuyuvero ghomunako.” (1 Hakorinte 7:3-5) Podigho eshi ghambe namundambo ghoye ghomu ghuna kukuyuva kuhatera kukuwanekera panyama. Kukudhidhimekera nokukwata dighano mundambo ghoye ñanyi yakutanarithe makuyuvo ghenu.
EYI SHO RUGHANE:
Ture po ruvedhe rokukara pofotji namundambo ghoye
Tume mbudhi kwamundambo ghoye endi mughurere ghushwi podigho gha kuyuve eshi wa mu haka
3 KUHONGA KAMBUTUTU
EYI DHA GHAMBA BAYIBILI: “Karo wa dimuka kutunda kuwanuke ghoye Yitjanga yokupongoka. Ayo ya kona kukudimukitha nokukutwara kumakomweneno.” (2 Timoteghusi 3:15) Mukuvureke edi sho muhonge mwanenu. Ngambinga shime mudira ghadi, kambututu kukona kuyuva diywi dyoye nomakuyuvo ghoye. Mu toyere ngambi aye shime kambututu. Ngambi ka dhire kukwata dighano eyi ghuna kukatoyera, ñanyi yakamuningithe gha ka shane katoya apa gha kakura.
Kambututu kuyuva apa wa ghambanga kuhatera Nyambi. Podigho eshi raperere nendi. (Deuteronomium 11:19) Ngeshi kuna kupepaghura nendi, mu ghambaghure kuhatera eyi gha vareka Nyambi. (Pisalemi 78:3, 4) Thikadi ghana kukura, ñanyi ghakudimuke ruhakitho roye rokuhaka Jehova ndani naye ñanyi yakumutumangedhe gha mu hake.
EYI SHO RUGHANE:
Kumbere kwaJehova gha ku pe maghano edi sho honge mwanoye
Hukuruke mañando nomaghano agha sho gha kone kukuhonga mwanoye aye shime kambututu