MTARA 7
Honge mwanoye
“Noro fotji temba eshi ghuvurame miragho dhino nakukupa dyarero ghudhihonge hanoye.”—Deuteronomium 6:6, 7
Apa Jehova gha turire po didhiko, ghaye kwapire hakuru thirughana thokurera hanuke. (Hakakolose 3:20) Ghatho thirughana thoye mukuru mukuhonga mwanoye gha hake Jehova podigho eshi naye ghakakare mukuru ghomuwa. (2 Timoteghusi 3:15) Wa kona kudimuka eyi gha ghayaranga mwanoye. Mudyo nowe ghuture po thitamenedhi thothiwa. Pakutanga wakona kukuhonga ghothinda mañando ghaJehova ndani shokone kuhonga mwanoye.—Pisalemi 40:9, muBayibili dhoThimbukushu.
1 REDHUPITHERE HANOYE MUKUNINGA ESHI HAGHAMBE NOYE
EYI DHA GHAMBA BAYIBILI: ‘Kehe munu gha kone kuhima wangu kutegherera. Mbadi gha kona kughamba wangu.’ (Jakobusi 1:19) Hanoye hakona kutwayera kughamba noye. Ndani ha kona kuyidimuka eshi ñanyi ghu wa tegherere. Ngeshi mudighumbo thiraro mwa kara, hanuke ñanyi hakushutuke kughamba makuyuvo ghawo. (Jakobusi 3:18) Awo mbadi mbo ha shutuka, ngeshi we ghomukenya. Kudhidhimekere, ndani wa tongwere kehepano eshi wa wahaka.—Mateghusi 3:17; 1 Hakorinte 8:1.
EYI SHO RUGHANE:
Ture po ruvedhe rokutegherera hanoye ngeshi hana shana kughamba noye
Mukuvureke kehepano nohanoye, mbadishi ngeshi maghukukutu ghadipo
2 KWATE DIGHANO EYI HANA TAMBA
EYI DHA GHAMBA BAYIBILI: ‘Munu ghomaghano kutanga tango kughayara ndani ghana kurughana.’ (Yisewe 13:16) Ngeshi mwanoye kuna kughamba mbadi ghu tegherere mañando ghendi vene ene kwate dighano makuyuvo ghendi. Pamaruvedhe ghamweya, hanuke kuyapa kughamba yighayara yawo. “Wa kona tango kuyiyuva ndani ghuna kumuhuthera ngeshi ha ghu piri kuyirughana yo, ghuyero ghoye nodishwahu dyoye ghothinda.” (Yisewe 18:13) Wa pata wangu.
EYI SHO RUGHANE:
Ngeshi mwanoye kuna kughamba, wa mu kwata parudimi endi ghu pate wangu
Vuruke ghodi wa ku yuvire ghapa wa karire ghomwanuke
3 MUKUWE MUYIGHAYARA
EYI DHA GHAMBA BAYIBILI: “Mwanange tegherere eyi hana kukutongwera ha wiho nanyoko.” (Yisewe 1:8) Jehova kwa pa murume nomukamadi thirughana thokurera hanuke. Mwa nyanda kuhonga hanenu hamufumaneke nokumutegherera. (Hakaefesusi 6:1-3) Hanuke kukona kuyidimuka ngeshi hakuru wawo mbadi hakuyuvanga “pofojti muyikara.” (1 Hakorinte 1:10) Mwatura dikanyi kughutho ghohanenu podigho eshi kukona yi wa ningithe hadhire kumufumaneka.
EYI SHO RUGHANE:
Mukuyuve edi shomu kone kuhonga hanenu
Ngeshi ghudi nodighano dimweya dyo kuhonga hanenu, yereke kukwatithako dighano dyamundambo ghoye
4 DIMUKE GHODI SHO HONGE
EYI DHA GHAMBA BAYIBILI: “Honge mwanuke eshi ngepi di sho gha kare.” (Yisewe 22:6) Kushimba ruvedhe mukuhonga mwanuke gha kare munu ghomuwa. Mukuhonga kwa kwatera mo kuthighura. (Pisalemi 127:4; Yisewe 29:17) Kuthighura mbadi kwa kwatera mo kuhumbitha vene, ene wa kona kumughamwena gha kwate dighano miragho edhi mwa tura po. (Yisewe 28:7) Honge mwanoye gha hake maÑando ghaJehova nokukwata dighano miragho dhendi. (Pisalemi 1:2) Ghayo ñanyi yakumughamwene gha kone kutura po matorokoro ghomawa.—Haheburayi 5:14.
EYI SHO RUGHANE:
Ghamwene hanoye ha dimuke Nyambi eshi munu ghoyu ha kona kukurupera
Wa ghamwene hadimuke nokushwenena po yikaritha yoyimango, yira eyi yakara kuIntaneta. Wa honge edi sho ha kone kushwena ngeshi ghumweya ghana kuwahongaghura mukukara panyama
“Honge mwanuke eshi ngepi di sho gha kare”