MUTARA 8
Ngeshi dihudhi dina hokoka
“Yinyanda yetu yomumoyo ghuno ne yipu no yina kupwa. Ene yo yina kuturetera ghuwa ghokupiterera yoyihe.”-2 Hakorinte 4:17
Ngambi kukutura mo thikuma mukukara noyiyeka nodidhiko dyokuhafa, ene yinu kuhokoka pawangu-wangu eyi sho yi kuretere kuguva. (Muudisi 9:11) Nyambi kutughamwena ngeshi nomaghukukutu tu di. Ene ngeshi ghaghukuthu miragho dhoBayibili edhi dhina kuranda ko, nowe nodidhiko dyoye ñanyi mukudhidhimekere maghukukutu ghomakuru.
1 KURUPERE MWAJEHOVA
EYI DHA GHAMBA BAYIBILI: “Mu tape yitokota yenu yoyiheya kukwendi. Yoyishi Aye ne yo gha mu kunga.” (1 Petrusi 5:7) Vuruke eshi, Nyambi mbadi yo gha retithanga po dihudhi. (Jakobusi 1:13) Ngeshi gha ghuhenyena pepi nendi Aye ñanyi gha kukughamwene. (Jesaya 41:10) Bayibili kutongora eshi: “Mu tape mitjima dhenu kughutho wendi.”—Pisalemi 62:9, muBayibili dhoThimbukushu.
Ñanyi wakuwane mahengawero ngeshi ghutoye nokukuhonga Bayibili kehe diyuwa. Munyima mbo ghuna kumonena omu Jehova “gha tu hengaghura mu kehe maghukukutu ghomahe.” (2 Hakorinte 1:3, 4; Hakaroma 15:4) Aye gha toghedhera mukukupa ‘thiraro thendi ethi thapiterera maghano ghomahe.’—Hakafilipi 4:6, 7, 13.
EYI SHO RUGHANE:
Raperere kwaJehova gha kughamwene ghukuture podigho eshi ghu ghayare thiwana
Ghayare ko thikuma nokutokora thiwana eyi sho kone kurughana
2 KUPAKERE GHOTHINDA THINGA NDANI DIDHIKO DYOYE
EYI DHA GHAMBA BAYIBILI: “Hakamaghano kukuroyithera yikuhonga.” (Yisewe 18:15) Wane maghukenu ghomahe. Dimuke kehe yino hana nyanda hakadidhiko dyoye. Ghambe nagho nokuwategherera.—Yisewe 20:5.
Ngepi ngeshi ghuna fitha? Wa kara nowoma ghokudira. Vureke eshi Jesusi naye “gha dirire.” (Johannesi 11:35; Muudisi 3:4) Mudyo thikuma mukuturumutha nokuwana turo totuwa. (Markusi 6:31) Ayo ñanyi yakukughamwene mukukudhidhimekera maghukukutu ghoye.
EYI SHO RUGHANE:
Ngeshi haghukara noyikara yokukuvureka kehe pano nodidhiko dyoye, ñanyi yakuwaredhupere kughamba noye ngeshi ghukukutu ghuna hokoka
Ghambe nohamweya ghowa hapita mumaghukukutu ghokengeyo
3 WANE MAGHAMWENO
EYI DHA GHAMBA BAYIBILI: “Munu namughendhendi kukuhaka, ene hanu naminendi hoharume ne kwa karera po hakughamwene mumaghukukutu.” (Yisewe 17:17) Hashere ghoye kukona hakughamwene, ene kukona hapire kuyidimuka edi sho ha yirughane. Wa kara nowoma kuwatongwera eyi ghuna nyanda. (Yisewe 12:25) Ndani rombe kowa ha kara noghudimuki ghoghushemwa kuhatera kuBayibili. Maghamweno ghomuBayibili agha sho ha kupe ñanyi ghakughamwene.—Jakobusi 5:14.
Ñanyi mbo wane maghamweno ngeshi kukukwatathana pofotji nowa ha kara nomatawero kwaNyambi ndani nomakurupere mumatoghedhero ghendi. Mbo hana kuhengaghura ngeshi nowe kuhengaghura haghendhoye. Tongwere ko haghendhoye kuhatera matawero ghoye ghokwaJehova nomatoghedhero ghendi. Kuture mo mukughamwena ogho hana nyanda maghamweno, ndani wa kutunditha kowo hakuhaka nokukupakera thinga.—Yisewe 18:1; 1 Hakorinte 15:58.
EYI SHO RUGHANE:
Tongwere ko mughendhoye oyu wakutwayera nendi thikuma ndani mu tawedhere ghakughamwene
Mutongwere ghushemwa eyi ghuna shana