Yabal nani ra smalkaia natka sinskira sa
1. ¿Ani natka ba kau pain sa Jisas nina blikaia?
1 Jisas naha tasba ra smalki kan piua ra namhpa namhpa lukras kan upla nani ra smalkaia yabal ra apia kaka plis wala nani ra (Lk. 9:57-61; Jn. 4:7). Witin ai brinka kan upla sut ra ani anira kabia sin naha sturka yamni ba aisaia. Naiwa piua ra yabal nani ra smalkaia ba natka pain kum sa upla nani ra Jehova sinska lâka smalkaia (S.L1:20). Sakuna naha warkka kau pain daukaia dukiara yawan pas ba upla nani lamara waia sa bara sins lâka marikaia.
2. ¿Yabal ra smalkisa taim nahki natka kum plikisa?
2 Smalkaia natka plikaia. Yawan upla lamara waia sa plis kum ra bui apia kaka iwi kaia sirka ra. Baku sin uplika nakra ra kaikaia bara wan pânika laka marikaia sa. Smalki tataukra wala wal taukisa kaka, kau pain sa upla lamara yakan wih aisaia. Smalkaia natka plikaia hilp wan munisa upla lan takaia brinka bri ba tâ baikaia. Bara sanska bâra sa kaka sip sa uplika ba ra makabi walaia ahkia kli witin wal prawaia. Smalki tataukra ailal ba sim pliska ra smalkisa, baku sanska brisa sim uplika wal ban aisaia, bara upla lan takaia ai brinka bri ba tâ baikaia.
3. ¿Yabal nani ra smalkisa piua ra nahki muni tânkira wal daukisa?
3 Tânkira smalkaia sa. Yabal ra upla nani lamara wih smalkisa piua ra anira buaia bara ya nani lamara waia ba tânkira wal daukaia sa. Baku sin upla an bali ba ra lika smalkras kau pain sa sanska pain kum bâra sa kaka smalkaia. Lamamra dîa taki ba pain laki kaikaia sa. Uplika ba ban kra uba isti taukisa kaka kau pain kabia swika luaia. Yawan diara atki pliska nani ra smalkisa kaka tânkira wal daukaia. Kau pain kabia uplika ba ra smalkaia atki pliska wina taki aula taim, diara atkaia dimi auya ba wal. Upla lamara wabia taim tânkira wal daukbia kaka uplika ba sibrin bribia apia. Bara wauhkataya nani yabisa piua ra sin tânkira daukaia sa. Bara uplika ba walaia ai brinka apia sa kaka, kau pain kabia wauhkataya sirpi lupia kum yabaia.
4. ¿Dîa muni yabal nani ra smalkaia ba natka kau pain bara lilia wan sakisa?
4 Yabal nani ra smalkaia ba sanska pain kum wankisa tânka kasak mâ ba piu kunhku bila ra ailal yakabaia (Smas. 11:6). Naha uplika nani wal prawi ba ban kra yawan utla utla smalkisa piua ra sip wal prawras. ¿Dîa muni kaina manis ridi takras yabal nani ra smalkaia dukiara? ¡Naku daukbia kaka kau yawan ra liliaka wankisa!