Jisas Pruan Kupia Kraukanka paiwanka ba Kakamuk kati 17 ra yabia
1. ¿Kakamuk kati 17 wina dîa daukbia?
1 Jisas Pruan Kupia Kraukanka mani bani dauki ba witin pruanka wan kupia kraukisa (1 Ko. 11:26). Baku sin, yawan want sa upla wala nani sin Jehova latwanka lâka tânka ba walbia, kan Witin atki wan sakan (Jan 3:16). Naha mani upla nani ra paiwbia Jisas Pruan Kupia Kraukanka ra waia bara Kakamuk kati 17 wina daukbia. Baha mita, ¿man ridi sma smalkaia warkka ra kau daukaia?
2. ¿Paiwanka ba yabisa taim, dîa wiaia sip sa?
2 ¿Dîa wiaia sip sa? Marikanka prahni kum dauki naku wis: “Naksa. Yang naha paiwanka maikaia want sna, kan paiwanka ba tasba aiska ra yabisa bara Jisas Pruan Kupia Kraukanka ba Lih Wainhka kati 5 ra daukan kabia. Baku sin Baibil aisanka kum yabia bara marikbia Jisas pruanka tânka bara nanara witin dîa daukisa. Naha paiwanka ra takisa anira pliska ra daukbia bara awarka ba sin”. Satadi bara sandi ra naha paiwanka yabisa taim, La Atalaya bara ¡Despertad! wauhkataya nani ba sin yabaia sip sa.
3. ¿Nahki muni upla sut ra paiwaia sip sa?
3 Upla sut ra paiwaia. Yawan wan brinka sa upla sut ra paiwaia. Baku sin, Baibil stadika, skul pânika, yawan wal wark taki nani ra, bara wan lama iwi uplika nani ra sin paiwaia sa. Kangrigisan almukka nani ba wibia nahki muni smalkaia warkka ba daukbia. Jisas Pruan Kupia Kraukanka dukiara upla ra paiwaia ba wina yamnika manis sakisa. Mairin kum aidrubanka watla bilara wapi auya kan taim, sir yabi kristianka waitna kum mita hilp munaia want kan paiwan uplika ra pliki sakaia. Sakuna, mairin ba win upla kumi sin kakaira takras kan bara baha titanka ra muihni lakri nani utla utla ra smalki tauki kan taim witin ra paiwan.
4. ¿Dîa muni paiwanka nani ba takaskraskira yabaia sa?
4 Ban kra upla kum Jisas Pruan Kupia Kraukanka ra wabia yawan paiwanka kum yaban ba mita. Upla nani ba waras kabia sin, yawan trai munan baha warkka daukaia. Bara paiwanka nani yabia ba marikisa Jisas ba King karnakira kum sa. Takaskraskira smalkisa kaka, Jehova ra, muihni lakri ra bara upla wala nani ra sin marikbia yawan atki sakan lâka ba dukiara tingkikira lukisa (Kol. 3:15).