Jisas Pruan Kupia Kraukanka paiwaia dukiara Kakamuk kati 22 wina tâ krikbia

Naha manka ra, Jisas Pruan Kupia Kraukanka upla nani ra paiwaia dukiara satadi, Kakamuk kati 22 wina tâ krikbia. Sut ra kupia bukisa naha warkka ba tâ baikaia. Wik tnata ra sip sa kaka, wauhkataya nani ba sin upla mihta ra swibia. Lih Wainhka kati pas satadika ba, Baibil stadika nani tâ krikaia watlika ra upla nani ra paiwaia warkka ba daukbia. Sakuna, kau nu takaia want uplika kum wal prawbia kaka, yawan sip sa witin wal Baibil stadika kum tâ krikaia. Smalkaia warkka pura kaiki ba, wibia upla ailal bâra pliska nani ra paiwanka wauhkataya ba swiaia pain kabia sapa. Kaina manis wina, ani uplika ra paiwaia luki ba nina ulbaia sa, sampla baku: wan pamalika nani, wal wark taki uplika nani, skul pânika nani, bara kli wih kaiki uplika nani sin. Paiwaia piua ba tâ krikbia wal baku, naha uplika nani ra paiwanka wauhkataya kum yabia. Bîla kaikisa upla ailal balbia, bara aikuki latwan lâka tara marikanka wâl ba wan kupia kraukaia (Jn. 3:16; 15:13).