Jisas Pruan Kupia Kraukanka ra paiwaia ba Kakamuk kati 1 wina tâ krikbia
1. ¿Ahkia wina Jisas Pruan Kupia Kraukanka paiwanka yabia, bara dîa muni naha mani kau taim bâra kabia?
1 Kakamuk kati 1, praidi yua wina upla nani ra paiwanka wahia nani ba yabia Jisas Pruan Kupia Kraukanka ra wabia dukiara. Naha kulkanka ba Kakamuk kati 26 ra kabia, baha mita naha mani kau taim bâra kabia paiwanka nani ba yabaia dukiara. Naha upla ra sanska yabia naha paiwanka briaia, bara kau pali wan kangrigisanka ba smalkaia pliska tara kum brisa piua ra.
2. ¿Paiwanka nani wahbi briaia dukiara dîa daukaia sa bara nahki smalkaia warkka ba daukbia?
2 Ridi takaia. Kangrigisan almukka nani ba laki kaikbia smalkaia pliska sut smalkbia sapa, baku sin laki kaikbia paiwanka nani ba upla âpu watla nani ra yabisa sapa. Yawan utla utla ra smalki taukisa taim paiwanka kum kum wan takaskbia kaka, ban kra upla nani yabal ra wapi ba ra yabaia sip sa. Smalkaia warkka tâ bri ba laki kaikaia sa ulbi sakanka nani yabi ba pliska ra bâra sa sapa. Baku natka ra muihni lakri nani ba sip kabia kum kum wahbi briaia, sakuna paiwanka nani sut bâra mangkaia apia. Yawan paiwanka nani wik bilara upla mihta ra swibia ba baman wahbi briaia.
3. ¿Paiwanka nani yabi kabia piua ra dîa lukaia sa?
3 ¿Yawan dîa wibia? Kau pain sa wan aisanka kunhku daukaia, naha hilp wan munbia kau upla ailal ra smalkaia. Wahia 4 ra sampla kum takisa yawan smalki ba pliska ra yus munaia sip ba. Sakuna, uplika ba kau aisaia want sa apia kaka ai pânika lâka wan marikisa kaka yawan nit apia sa isti mahka waia. Bara satadi apia kaka sandi ra smalkisa kaka, wauhtaya nani upla mihta ra swiaia. Kakamuk kati 2 wina, pas satadika ra Baibil stadika nani tâ krikaia watlika ra paiwanka wahia nani yabia.
4. ¿Dîa muni paiwanka nani upla ra yabia warkka tâ baikaia sa?
4 Yawan bîla kaikisa Jisas Pruanka Kupia Kraukanka ra upla ailal wabia. Bahara aisanka kum ra Jisas ba ya rait pali sa tânka marikbia (1 Ko. 11:26). Baku sin witin pruanka nahki hilp wan munisa smalkbia (Ro. 6:23). Bara wan marikbia dîa muni Jisas dukiara wan kupia kraukaia sa (Jn. 17:3). ¡Naha paiwanka nani upla ra yabaia warkka tâ baikbia!