Aisanka pain kum yus muns
1. Patitara kristianka nani nahki smalki kan ba wina, ¿yawan dîa lan takisa?
1 Patitara kristianka nani ba sturi yamni ba nisan sât sât wina bara rilidian wala uplika nani ra smalkan (Kol. 1:23). Witin nani diara kum dukiara baman smalki kan: Gâd Kingka lâka ba. Sakuna, natka sât sât ra dauki kan. Sampla baku, apastil Pita Ju uplika nani ba Ulbanka Holikira nani ra rispik tara muni kan ba mita, witin prapit Joel bîla aisanka dukiara smalkan (Ap.St 2:14-17). Sampla wala, kaiks nahki apastil Pal ba Grik uplika nani ra smalkan. Naha ba Apastil Nani Sturka 17:22-31 ba kat takisa. Naiwa piua ra, plis kum kum ra upla nani ba Baibil ra kulkanka tara yabisa. Baha mita, yawan utla utla ra smalkisa taim, Baibil ba yus munaia sip sa. Sakuna, yawan tânkira kaia sa upla nani Baibil wina lan takaia ai brinka apia sa, apia kaka rilidian nani ra kasak lukras uplika nani ra, baku sin kristian apia rilidianka nani tilara ba uplika nani ra smalkisa piua ra.
2. ¿Ulbi sakanka nani ba nahki yus munaia sip sa upla nani Baibil ra kasak luki, apia kaka Baibil ra uya lukras nani ra hilp munaia dukiara?
2 Ulbi sakanka nani pain yus munaia. Ulbi sakanka nani ba naha mani Wîs kati wina yus munbia ba kati wâl bani chens munbia. Bara wauhkataya nani, wauhtaya sirpi bara tara nani ba marikbia. Yawan smalkisa pliska ra upla nani Baibil wina lan takaia ai brinka apia sa kaka, ban kra yawan ulbi sakanka kum yabaia sip sa ai lukanka nani chens munbia dukiara. Baibil tikska kum, apia kaka uplika ra pas trip smalkisa piua ra Baibil tikska kum dukiara yawan aisaras kabia sin, uplika ba kau lan takaia ai brinka brisa kaka, kli balaia sip sa. Baku uplika ra yawan hilp munbia wan Papaskra bara Baibil ra kasak lukaia. Sakuna, yawan smalkisa pliska ra upla nani ba Baibil ra kulkanka tara yabisa kaka, ulbi sakanka nani Baibil dukiara aisi ba swiaia sip sa. Sampla baku, Smalkisa bukka, apia kaka Gâd bîla wals, baku sin Gâd bîla wals bara ban kaia ra iwma wauhkataya nani ba piua sut ra marikaia sip sa. Ban kra baha kati ra ulbi sakanka upla mihta ra yabaia lukras kabia sin, diara kau tara ba sika aisanka kum pain yus munaia.
3. ¿Nahki natka ra upla kupia ba tasba wal praki kaikaia sip sa?
3 Upla kupia ba ridi dauks. Upla kupia ba tasba wal praki kaikaia sip sa (Lk. 8:15). Plis kum kum ra kau saumuk mangkras kainara, tasba ridi daukaia nit sa. Baku natka ra saumuk nani ba pain pâwbia. Patitara kristianka nani ba tasba sâtka ailal ra spirit lâka ra saumuk nani mangkan ba pâwan. Bara naha ba witin nani ra lilia lâka yaban (Ap.St 13:48, 52). Yawan sin lilia kaia sip sa smalkisa piua ra wan aisanka ba pain pali daukisa kaka.