Tâ Bri Daknika Wauhkataya Blikan ba
Muihni lakri latwankira nani:
Wan Aisa heven ra ba, Jehova, latwankira pali sa. Baibil ra wisa: “Gâd latwan lâka sa” (1 Jn. 4:8). Witin laih purara iwisa, sakuna, Baibil ra wiras Witin ba “karnika sa”. Kan, Witin latwan lâka wal king iwisa. ¡Naha ba yawan ra uba lilia wan daukisa!
Jehova taibi wan munras Witin ai kupia lâka daukaia. Witin king tataibra apia sa. Jehova want sa latwan kaiki ba mita Witin ra mayunbia. Yawan naha daukisa taim, marikisa ai Kingka lâka ba want sa, kan nu sa Witin kasakka lâka bara latwan lâka wal king aimakisa. Naha ba tâ pali yua wina kaikaia sip sa.
Adam Iv wal ra Witin bîla walbia dukiara taibras kan, kau ni sanska yaban witin nani silp laki kaikbia. Witin nani dukiara Jehova dîa daukan ba latwan kaikan kata, Sitan mapara buaia kan.
Piu luan ningkara, Moses ai aisanka pîska kum ra Israel uplika nani ra win: “Bara kaiks naiwa man nani mamwanra rayaka bara yamnika ba swisna, prura bara saurka ba, bara ani ba brima” (Kli.S 30:15). Israel uplika nani silp laki kaikaia sip kan nahki iwaia. Sim baku, Jasua witin nani ra win: “Sakuna man nani lika Dawan dukia daukan mai daukras kaka, pliki sâks naiwa man nani ya dukia daukaisma ba”. Bara upla nani pana aisi win: “Yang nani Dawan ba swimna apia, gâd wala bahki dukia daukaia dukiara” (Jos. 24:15, 16). Yawan sim sât wan dara walisa naiwa yua ra. Jehova ra latwan kaiki ba mita, witin ra ‘lulki swibia apia’.
Kangrigisan bilara, yawan pain nu sa dîa tânka sa pri lâka briaia. Sampla baku, kangrigisan almukka nani ba adar brisa wan maisa nihkaia bara lawi wan daukaia, sakuna muihni lakri ra taibi munaia, apia kaka rayaka, kasak lukan lâka ba sin tâ briaia sip apia sa. Apastil Pal ulban: “Luki kapara yang nani bui man nani dîa kasak lukaia sma ba taibi mai munamna, kasak lukan lâka ra man nani aitani kat sma; bamna kau lilia lâka bri banhma dukiara hilp mai munaia want banhwisna” (2 Ko. 1:24).
Diara kum daukaia wan brinka sa taim kau lilia wan dara walisa upla kum mita taibi wan munaia watlika ra. Jehova wan paiwisa diara pain nani daukaia latwan lâka bri ba mita. Naha yawan kaikaia sip sa apastil Pal bîla nani ra: “Dîa brisna ba upla nani ra yuamna kra, bara wîni tara pali na sin angkbia wisi yabamna kra, sakuna latwan lâka âpu sna kaka, baha sut ba bahki baman sa” (1 Ko. 13:3).
Jehova lilia ai dara walisa, kan Witin kaikisa muihni lakri milian milian tasba aiska ra ai kupia aiska wal Witin ra mayunisa.
Jehova ai napakanka nani sut ra latwan kaikisa. Baha nani tilara man nani, wahma tiara nani, Witin ra latwan kaikisma, naha tasba brinka nani nina blikaia watlika ra. Baku sin, yawan ba man nani ra latwan mai kaikisa (Lk. 12:42, 43).
Jehova ra latwan kaiki ba mita, mani luan ra, muihni lakri bara wahma tiara nani ba 1.748.697.447 awar nani daukan smalkaia warkka ra. Bara latwan lâka ra muihni lakri 7.782.346 tasba aiska ra smalkaia warkka tâ baikan. Baku sin, uba lilia wan daukisa 268.777 muihni lakri raya nani ai rayaka Jehova ra yaban ningkara aihtabi takan. Naha tânka sa upla 5.168 aihtabi takisa wik bani ra. ¡Naha sut ba uba lilia wan daukisa!
Naiwa lâs yua nani ra, Jehova uplika nani trabil ailal brisa, sampla baku, nina bliki rau sauhkan lâka, siknis nani, baku sin kum kum ba almuk takaia mapara aiklabisa. ¡Sakuna, yawan ban wan ‘tâura wabia’! Yawan ba uba latwan mai kaikisa (Hib. 10:39; 2 Ko. 4:16).
Muihkam lamkra nani,
Jehova Witniska nani Tâ Bri Daknika ba