Lisamra tara wina swakwi takan

UPLA nani ba naha tasba ra kau ailal taki kan piua ra, saurka lâka bara lâ krikanka lâka kau pâwan. Ban kra Henoc baman Gâd napakanka kan baha piua nani ra. Witin win Gâd mita upla saura nani ra sauhki tikbia. Sakuna upla nani ba bîla walras kan, kau ni ban saura dauki kan. Baha wina, Gâd insalka kum kum ba Jehova mapara buan bara ai pliska heven ra kan ba swin. Naha tasba ra balan, upla baku taki ai laikka ba kat mairin ailal wal marit takan. Insal nani mairin wal marit takan taim, luhpa tarka tara nani baikan. Naha waitnika karnakira nani ra Nefilim nina mâkisa. Witin nani ba uba saurakira kan. Gâd naha sut kaikan taim ai kupia ra sari lâka tara brin.

Henoc pruan ningkara, waitna wala Gâd kupia lâka daukan. Ai nina ba Noa. Naha waitnika bara ai pamalika wal Gâd kupia lâka dauki kan. Yu kum, Jehova aitani lukan lisamra tara kum brih balaia upla saura nani sut sauhki tikaia dukiara. Sakuna Gâd want apia kan Noa bara daiwan nani sin prubia. Baha mita Noa ra win ark kum paskbia, naha ba, baks tara kum baku kan. Bahara Noa ai pamalika wal bara daiwan nani ba sin dimbia swaki takbia dukiara. Noa ba Gâd bîla walan. Baha mita mani 40 apia kaka 50 baku bilara baha arkka ba paskan. Baha piua nani ra, Noa “upla nani ra smalkan” (2 Pita 2:5). Witin upla nani ra maisa pakan lisamra tara aula ba dukiara, sakuna upla nani ba bîla walras kan. Piua ba aimakan taim, Noa bara ai pamalika wal ark bilara diman bara daiwan sât sât nani dingkan. Baha wina, Gâd ark durka ba prakan bara lî ba mahka auhan.

Kakna bara tihmia 40 bilara lî karna auhan bara tasba sut lisamra dingkan. Upla saura kumi sin swakwi takras kan. Kati nani luan ba ra, lisamra ba kau buhni taki kan, bara ark ba il kum purara takaskan. Noa bara ai pamalika wal ark wina takan taim, mani kum pat luan kan. Noa ba uba ai tingkika lâka marikaia dukiara Gâd ra sakripais kum yaban. Gâd ba Noa ra pramis munan kli lisamra kum wal tasba na sauhki tikbia apia. Bara ai pramiska tnata aimakaia dukiara kumadura kum yaban. Upla nani ba kumadura ba kaikbia taim ai auya tikbia apia Jehova dîa pramis munan ba.

Lisamra luan ningkara, Gâd upla ra lâ raya nani yaban. Sampla baku, Gâd win upla nani ba sip kan daiwan nani wîna piaia, sakuna tala lika apia. Baku sin win upla nani ba luhpa sahwi tasba na banhbia. Sakuna upla ailal ba Gâd mapara bûi tawan tara kum ra asla takan. Bara waitna kum ai nina Nimrod ba Babel tawanka ra —piu luan ba ra, Babilon nina mâkan— tawer tara kum paskan. Sakuna Gâd mita baha warkka takaskan. ¿Nahki muni? Gâd daukan baha uplika nani ba ban wina bîla aisanka wala wala aisabia. Witin nani ba pana pana sip ai tânka briras kan ba ra, tawer ba danh paskras kan, bara upla sut ba plis wala wala ra wih iwan.

(Blasi Sturka sapta 6 wina 11 bara Judas 14, 15 wina sakan sa.)