Maritkam lâka ba lilia kabia dukiara Gâd ra pliks

Jehovaa Gâd mita pas waitna bara pas mairin ba marit sakan. Baibil wisa witin ba pas mairin ra paski “waitna ra bri balan”. Adam ba lilia pali taki win: “¡Naha lika yang wînki wina wînka sa bara dusi nani wina dusa!” (Blasi Sturka 2:22, 23). Naiwa piua ba kat sin Jehova brin daukisa marit nani ba lilia kabia.

Upla nani marit takisa taim, ban kra witin nani lukisa yu bani ban lilia kabia. Sakuna, raitka pali ba sika marit nani pana pana kau latwan kaiki nani ba kat sin trabil bribia (1 Korint 7:28). Naha wauhkataya ra Baibil smalkanka nani sâkma, baha nani man alki brima kaka hilp tara kabia maritkam lâka bara pamalikam ba lilia takbia dukiara (Lawana Nani 19:8-11).

1 JEHOVA DÎA WARKKA MAIKAN BA ALKI BRIS

BAIBIL DÎA SMALKI BA: Maya waitna ba ai pamalika lalka sa (Epesus 5:23).

Man, maya waitna sma ba Jehova want sa man mita mayam mairin ra latwan lâka wal main kaiki kama (1 Pita 3:7). Witin ba mayam mairin ra paskan man hilpkam kabia dukiara, bara brin daukisa man bui mayam ra kulki latwan kaiki kama ba (Blasi Sturka 2:18). Witin ra latwan kaikaia ba sika, dîa dîa witin nit ba man kau kulkaia sma, man nitkam nani ba purkara (Epesus 5:25-29).

Man, maya mairin sma ba Jehova want sa mayam waitna ra rispik tara munma, baku sin witin ba pamalikam lalka sa, bahamna man hilp munma baha warkka ba witin pain daukbia (1 Korint 11:3; Epesus 5:33). Witin diara daukaia lukan ba man tâ baikma bara brukwan âpu witin ra hilp munma (Kolosi 3:18). Baku daukma kaka, mayam yamni mai kaikbia bara Jehova sin (1 Pita 3:1-6).

DÎA DAUKAIA SIP SMA:

• Maya waitna ba maya mairin ra makabi walaia sa dîa daukaia nit sa maya waitna pain kum kaia dukiara, apia kaka maya mairin ba maya waitna ra makabi walaia sa dîa daukaia nit sa maya mairin pain kum kaia dukiara. Witin bui mai aisi kabia taim, pain wals bara witin dîa mai wi ba trai muns sip sma ba kat alki daukaia

• Wihka bîla kaiki bas. Wâlsut ba lan takaia sa kum bui wala ra lilia daukaia, bara baha dukiara taim nit sa

2 MAYAM NAHKI AI DARA WALI BA LUKI BAS

BAIBIL DÎA SMALKI BA: Mayam yamnika ba dukiara man lukaia sma kan baha ba diara tara sa (Pilipai 2:3, 4). Witin ra pain muns, kupiam krauks Jehova want sa ai uplika nani ba piu bani kupia yamni ba mariki kabia (2 Timoti 2:24). Pain luks dîa aisama ba, kan Baibil wisa: Lukras aisi uplika nani ba “ispara wan sabi ba baku sa, sakuna sinskira nani aisanka ba lika hilp wankisa” (Sins Lâka 12:18). Jehova spiritka holikira ba hilp mai munbia bîla latwankira wal bara yamni lâka wal aisaia (Galesha 5:22, 23; Kolosi 4:6).

DÎA DAUKAIA SIP SMA:

• Man mayam wal diara tara dukiara kau aisaras kainara Gâd ra makas laman lâka maikbia bara diara nani sut ba param lukaia

• Kau aisaras kainara tânkira luki bas dîa wima bara nahki tnatka ra aisama ba sin

3 MAN MAYAM WAL ASLA SMA BA KUPIAM KRAUKS

BAIBIL DÎA SMALKI BA: Upla nani ba marit taki piua ba wina “wâl ba ai wîna kumi baku” takisa (Matiu 19:5). Ban sakuna witin nani ba lukanka sât sât bri ba mita, sam taim sim lukanka ra asla kabia apia. Baku ba ra, nit pali sa man nani lan takma sim lukanka ra bara sim dara walanka nani ra asla kaia (Pilipai 2:2). Man nani diara kum daukaia lukma piua ra, wâlsut asla kaia sma, sim dukia daukma dukiara. ¿Baha ba nahki daukisa ki? Baibil wan kupia kraukisa: yawan dîa daukaia luki paski ba wala nani hilpka ba wal daukisa kaka, diara nani ba pain takisa (Sins Lâka 20:18). Swirka Baibil smalkanka nani ba tâm bribia diara tara kum daukaia lukma taim (Sins Lâka 8:32, 33).

DÎA DAUKAIA SIP SMA:

• Mayam wal diara wala dukiara baman aisapara, man pali nahki damra walisma ba kat aisas

• Man diara kum daukaia kau âu wiras kainara, pas ba mayam wal aisas