PÎSKA 3

Trabil nani ba nahki wapni daukaia

“Diara sut purkara, pana pana uplikam ra latwan kaiki bas, kan latwan lâka ba mita saurka ailal ban swih tikisa bamna” (1 Pita 4:8).

Waitna kum wihki mairin kum wal marit takisa taim, trabil sât sât takisa, ban kra witin nani lukanka bara nahki ai dara wali ba sim sât apia sa, apia kaka witin nani ra nahki pakan tnatka ba sin sât wala sa. Baku sin, trabil nani ba diara wala wina balaia sip sa, apia kaka bîla kaikras trabilka kum takaia sip sa.

Isi sa trabil nani wina plapaia, sakuna Baibil ba wan kupia kraukisa trabil nani ba pura luaia (Matiu 5:23, 24). Baibil smalkanka nani ba alki daukma kaka, trabilkam nani wapni daukaia sip kama.

1 TRABILKA BA DUKIARA AISAS

BAIBIL DÎA SMALKI BA: “Aisaia piua ... bâra sa” (Smasmalkra 3:1, 7). Taimkam sâks trabilka ba dukiara aisaia; mayam ra kupiam wina aisas nahki damra walisma bara dîa lukisma ba sin. Witin ra param aisas kunin lika munpara (Epesus 4:25). Praut takma sin, trai kaiks unsabaia apia. Mayam ra pana diara aisama taim, kupiam lamni wal aisas, bara baku trabil sirpi kum wina unsaban tara takbia apia (Sins Lâka 15:4; 26:20).

Mayam diara luki ba baku man sip lukras kama sin, piu bani yamni lâka ba witin ra mariks, latwan lâka bara rispik lâka ba sin (Kolosi 4:6). Trai muns trabilka ba isti wapni daukaia bara piu bani pana pana mayam wal aisas, sâp takpara (Epesus 4:26).

Marit lâka kum ba pana pana aisisa trabil kum dukiara

DÎA DAUKAIA SIP SMA:

Piua yamni kum pliks trabilka ba dukiara aisaia
Mayam ba turi mai aisi kabia taim, witin bîla dakpara. Man aisaia taimkam briaisma

2 PAIN WALS BARA TRABILKA TÂNKA BRIS

BAIBIL DÎA SMALKI BA: “Man nani muihkam ra, lamkra ra baku pana pana latwan kaiks, pain kulki yamni ba yabi bas” (Roman 12:10). Upla turi mai aisi ba, man nahki walisma tnatka ba diara tara sa. Trai muns mayam nahki luki ba tânkam briaia, Baibil bila “pana pana sin aikuki muihkam baku latwan kaiki”, bara “bawikira” kaia sa (1 Pita 3:8; Jems 1:19). Mayam mai aisisa taim, walisma baku pulpara. Sip sma kaka, diara daukisma ba swis bara taimkam sâks mayam ra walaia, apia kaka witin ra makabi wals tisku aisaia sip sa sapa. Mayam ba waihlam apia sa, pâmnika baku kaikisma kaka isti pali kupiam sauhkma apia (Smasmalkra 7:9).

DÎA DAUKAIA SIP SMA:

Mayam dîa aisi ba man laik apia kama sin, wilinkira wals
Mayam dîa tânka aisi ba luki bas dîa pali mai wiaia want ba. Laki kaiks ai wîna tara nahki dauki ba bara ai bîla baikra ba sin

3 PIU BANI TRAI MUNI BAS

BAIBIL DÎA SMALKI BA: “Wark sut daukan bani wina mâ sakisa, sakuna wan bîla nani bahki man aisin bani mita, umpira wan sakisa” (Sins Lâka 14:23). Trabil kum nahki wapni dauki nu takaia baman aitani apia sa. Alki daukaia nit sma. Ban kra karna trai munaia sma, sakuna mâ yamni sâkma (Sins Lâka 10:4). Man nani asla trabilka ba pura luma kaka “mana kau yamnika” sâkma (Smasmalkra 4:9).

DÎA DAUKAIA SIP SMA:

Man nani kumi bani luki kaiks dîa daukaia sip sma trabilka ba wapni daukaia dukiara
Piua kum lubia taim man nani laki kaiks nahki pain taki auma ba