Pana pana mayam wal kasak bas

Jehova adar wankisa: “pana pana kunin munpara” (Malaquías 2:16). Baha ba diara tara sa, kan marit lâka bilara kasak lâka âpu sa kaka, kunin lâka ba lika bâra kabia. Bara latwan lâka ba pâwbia dukiara pana pana kasak bas.

Naiwa piua ra, marit lâka bilara pana pana kasak luki ba tiwaia sip sa. Maritkam lâka ba main kaikma dukiara, tnatka wâl bâra ba alki daukaia sma.

1 MARITKAM LÂKA BA PAS TÂURA TARA KULKS

BAIBIL DÎA SMALKI BA: “Diara yamni ba pliki sâkma diara sut ra” (Pilipai 1:10). Rayakam ra diara tara nani tila wina maritkam lâka ba kau kulkanka yabaia sma. Baha mihta pas tâura baha pas kulkaia sma.

Jehova brin daukisa man mayam ra baman latwan kaikma, bara man nani liliakira iwma (Smasmalkra 9:9). Witin param aisisa, man mayam ra piu bani main kaikaia sma, bara tnatka plikaia sma nahki mayam ra lilia daukaia (1 Korint 10:24). Yas mayam lukbia man witin ra nit sma ba bara kulkisma ba sin mariks.

DÎA DAUKAIA SIP SMA:

• Chans kum pliks mayam wal taim luaia dukiara, bara baha piua ra witin dîa nit ba yas, bara mai aisi ba kiama pri tniki wals

• Man dukiamra baman lukpara, wâlsut dukiamra luks

2 KUPIAM MAIN KAIKS

BAIBIL DÎA SMALKI BA: “Ya ya mairin kum kaiki, brin pali daukbia kaka, pat witin wal ai kupia ra marit lâka sauhkan sa” (Matiu 5:28). Upla kum rug lâka ra lukisa kaka, ai maritka lâka ba pat sauhkan baku sa.

Jehova wisa wan kupia ba main kaikaia nit sa (Sins Lâka 4:23; Jirimaya 17:9). Baha alki briaia dukiara namkra dîa kaiki ba aman pali kaiks (Matiu 5:29, 30). Prapit Job daukan baku yawan daukaia sa, witin bui tiara nani kaiki brin daukras kan (Job 31:1). Pramis taks pornografía (rug taki lilkika nani) kaikma apia ba. Mayam ra baman latwan kaiks, bara piu kumi ra sin upla wala ra laik takpara.

DÎA DAUKAIA SIP SMA:

• Upla wala nani ra mariks man mayam wal asla pali sma ba

• Mayam nahki ai dara wali ba rispik muns, bara kakairikam kum wal aisama mayam saura kaikisa kaka, isti pali baha uplika wal kli asla takpara