LISIN 4

Dîa wiaia Baibil tikska kum kau aisi kaikras kainara

Matiu 22:41-45

BÎLA PRAHNI RA: Baibil tikska kum kau aisi kaikras kainara, wali nani kupia ba ridi dauks.

Pain tânka bris dîa muni tiks kum aisi kaikma. Aisi kaikras kainara, tikska ba tânka tara bri ba aisas, baha wal mai wali nani ba dîa wiaisma ba lukaia sip kabia.

Borska wala nani baha dukiara dîa wi ba sin nu bas. Tikska ra ya diara aisan ba wis bara Baibil bukka ya mita ulban ba sin.
Baibil ba plamaika baku yus muns. Gâd ra kasak luki uplika nani wal aisama taim, tânka mariks Baibil ba Gâd Bîla sa, baku bamna, sins lâka kau tara ba brisa.
Mai wali nani ba Baibil tikska ba dukiara kau nu takaia brinka bribia dauks. Makabi walanka kum dauks ansika ba tikska ra sâkbia dukiara, trabil kum dukiara aisas bara nahki tikska wal wapni mangki ba mariks apia kaka Baibil sturka kum wina dîa smalkanka saki ba wis.

Lukaia sma mai wali nani ba tikska bara aisisma ba dukiara dîa pat nu sa. Tikska nani ba uba kakaira kabia sin upla laik takbia tnatka ra mariks, bara hilp muns kau pain tânka bribia apia kaka diara raya nani ba nu takbia.