SMALKANKA 02

Baibil ba bîla kaikanka yamni wankisa

Print munan dukia ba lilka baku kaikaia

Tasba aiska ra, upla nani ba trabil nani mapara aiklabisa. Baha tâwan, sari ai dara walisa, wari takisa, bara panis wahwisa. ¿Man ra sim baku mai takan sa ki? Ban kra, siknis kum tâka pât wahwisma, apia kaka man latwan kaikisma uplika kum pruan, bara ban kra silp mamkabi walisma, yu kum diara nani ba pain takbia sapa. Baibil ba bîla kaikanka painkira wankisa.

1. ¿Baibil ba dîa bîla kaikanka wankisa?

Baibil ba tânka wan marikisa, dîa muni tasba aiska ra trabil ailal bâra ba. Baku sin, wan maisa pakisa, naha sât trabilka nani yawan wahwi ba tisku danh takbia. Baibil pramiska nani ba “bîla kaikanka aihwa kum” maikaia sip sa (Jirimaya 29:11, 12 aisi kaikma). Baha pramiska nani ba trabil nani pura luaia, bara lukanka yamni kum bri kaia dukiara hilp wan munisa. Baku sin, yawan ban kaia ra lilia iwaia sip ba kasak lukaia sip sa.

2. ¿Naika piua ba dukiara Baibil nahki tânka marikisa?

Baibil ba wisa, tisku pali “prura kau âpu kabia, inanka, pura mata inaia lâka, latwanka sin” danh âpu kabia (Param Marikan 21:4 aisi kaikma). ) Umpira lâka, kasak apia lâka, siknis nani bara prura baku, wan sarka paski trabilka nani sut ba danh âpu kabia. Baibil ba pramis munisa, naha tasba paradais painkira kum kabia taim, ban kaia ra upla sut ba rayaka liliakira kum bribia.

3. ¿Baibil pramiska nani ra kasak lukaia dukiara dîa ba hilp mai munaia sip sa ki?

Upla nani ba diara nani ba kau pain takbia bîla kaikisa. Kuna baha ba rait takbia sapa nu âpu sa. Ban sakuna, Baibil pramiska nani ba rait aimakbia. Yawan “Ulbanka nani ba [wibia sa kaka, Baibil] tânka pliki” kaikisa kaka, Baibil pramiska nani ra kasak lukaia sip sa (Apastil Nani Sturka 17:11). Baku daukma kaka, naika piua dukiara Baibil dîa pramis muni ba kasak lukaia sip sma.

KAU LAN TAKS

Naika piua dukiara Baibil pramiska kum kum laki kaikbia, bara baha bîla kaikanka nani ba naiwa piua ra upla nani ra nahki hilp munan ba sin kaikbia.

Lilka nani: Lilka nani na marikisa naiwa piua nahki saura ba, an nahki kabia painkira naika piua ra. Kli baha kaikisa mâyara.

4. Baibil ba ban kaia ra rayaka sunu wal iwaia bîla kaikanka wankisa

Naha Baibil pramiska nani ba laki kaiks. ¿Ani pramiska ba kau painkira kaikisma ki, bara dîa muni?

Naha pramiska kumi bani dukiara Baibil tikska nani taki ba aisi kaiki, naha dukiara aisi banhma:

¿Man lukisma naha tikska nani ba bîla kaikan lâka maikisa? Pamalikam bara pâmnika nani ra luki, ¿naha tikska nani ba witin nani ra hilp munaia sip sa ki?

Naha sât tasbaya kum ra iwisma baku luks:

UPLA KUMI SIN...	UPLA SUT BA...
... pât wauhbia apia, almuk takbia apia bara prubia apia (Aiseya 25:8)	... ai uplika latwankira nani raiti wina naha tasba ra kli bubia ba kaiki banhbia (Jan 11:25)
... siknis takbia apia, bara wîna tara trabilka wala nani sin bribia apia (Aiseya 33:24; 35:5, 6)	... wîna tara yamni bribia, bara wahma tiara kum baku karnika bribia (Job 33:25)
... upla wala mita saura munbia apia (Aiseya 32:16, 17)	... plun ailal bribia, ai watla pain kum, bara wark pain kum sin (Lawana Nani 72:16; Aiseya 65:21, 22)
... war tâka pât wahbia apia (Lawana Nani 46:9)	... rait kupia kumi lâka ba bri, ai âuyapah pali kabia (Lawana Nani 37:11)
... sari takbia apia, bara diara saura nani takan piua dukiara, ai kupia kraukbia apia (Aiseya 65:17)	... ban kaia ra rayaka painkira kum bribia (Lawana Nani 37:29)

Tukta lupia kum pas taim siknis kan sakuna ai yapti ra alkisa.

Waitna kum pas taim almuk kan sakuna nanara carretilla kum tukbisa dus mâ ailal aibanhwi.

5. Baibil bîla kaikanka wanki ba wan rayaka kau pain kabia hilp wan munisa

Upla manis naha tasba ra trabil ailal bâra ba mita, sari ai dara walisa, apia kaka ai kupia baikisa. Upla kum kum ba ai taimka aiska mangkisa trabilka nani ba wapnika mangkaia dukiara. Baibil pramiska nani ba naiwa piua ra upla manis ra nahki hilp muni ba kaiks. LILKA ba kaikma, bara naha dukiara aisi banhma:

LILKA: Kasak apia lâka ba wapni takbia dukiara aiklabi kapri (4:07)

Lilka nani: lilka nahara takisa video ‘Upla ra lâ kat yamni munbia aiklabi kapri.’ 1. Rafika wahmuk nasla dakisa witin tuktan kan taim ai nisanka uplika aikuki. 2. Rafika pas trip Jehova witnis aidrubanka ra diman taim lilia tâ iwisa nahki upla nisan sât sât asla lâka ra iwi ba.

Lilkika ra kaikan baku, ¿kasak apia lâka ba kaiki Rafika ba nahki ai dara wali kan ki?
Kasak apia lâka witin kaiki kan ba danh takras kan kuna, ¿Baibil ba witin ra nahki hilp munan ki?

Baibil bîla kaikanka wanki ba, wan kupia turbanka nani bara trabil nani pura luaia hilp wan munisa. Sins Lâka 17:22 bara Roman 12:12 aisi kaikma, bara naha dukiara aisi banhma:

¿Baibil bîla kaikanka wanki ba rayakam kau pain daukaia sip sa lukisma ki?

UPLA KUM KUM NAKU LUKISA: “Baibil dîa pramis muni ba painkira sa, kuna rait aimakbia sapa upla kumi sin nu âpu sa”.

Baibil pramiska nani ba rait aimakaisa kaka, ¿tânka ba stadi muni kaikaia aitani sa ki, bara dîa muni baku lukisma?

DÎA LAN TAKRAM

Baibil ba pramis wan munisa yawan rayaka lilia kum bribia. Baha pramiska ba bîla kaikanka wankisa, bara trabil nani bri kabia kra sin, wan tâura waia dukiara hilp wan munisa.

Wan kupia krawaia

¿Dîa muni upla nani ba bîla kaikanka briaia nit sa ki?
¿Naika piua dukiara Baibil ba dîa wisa?
¿Bîla kaikan lâka ba naiwa piua ra nahki hilp mai munaia sip sa?

Smalkanka na danh takan yua ba:

Naha na trai muns

Baibil pramiska nani ban sinskam ra bri kama dukiara, naha saptika ra taki kan Baibil tikska nani sut ba kli aisi kaiks.

Naha sin trai muns:

Diara wala daukaia lukisma ba

KAU PLIKI KAIKS

Bîla kaikanka lâka nahki hilp mai munaia sip ba lan taks.

“Bîla kaikan lâka: ¿ani wina sakaia sip sa?” (¡Despertad! abril 22, 2004)

Rawaia sip apia sikniska bri uplika nani ra bîla kaikan lâka ba nahki hilp munan ba kaiks.

“¿Siknis kum mapara bapi buaia dukiara Baibil ba hilp wan munaia sip sa ki?” (jw.org ra kaiks)

Naha lawana lilkika kaikma taim, Baibil ra pramis muni ba baku, pamalikam wal paradais ra lilia banhwisma ba luki kaiks.

Gâd pramiska nani ra lukisna (3:37)

Naha tasba trabilka nani wapnika mangkaia dukiara aiklabi kan waitnika kum ra, Baibil pramiska nani nahki hilp munan ba kaiks.

“Tasba trabilka nani wapnika mangkaia dukiara aiklabaia danh nit apia sna” (La Atalaya julio 1, 2013)