Uplika yamnika ra lukisma ba mariks

Jisas dîa daukan ba

LILKA: Jisas liwanhta kum ra mairin kum wal aisisa

1. LILKA ba kaiks, apia kaka Jan 4:6-9 aisi kaiki, naha makabi walanka nani laki kaiks:

1. ¿Baha mairka wal kau aisaras kainara, Jisas diaura ai sinska mangkan?

2. Mairka wal aisaia tâ krikaia dukiara, Jisas win: “Lî wirâ aik diaia”. ¿Dîa muni baha ba tnatka pain kum kan ki?

¿Jisas dîa daukan ba wina yawan dîa lan takaia sip sa ki?

2. Upla kum wal aisaia tâ krikisa taim, witin kau dîa luki ba dukiara yawan aisaia tâ krikisa kaka, pana pana kau pain aisaia sip kabia.

Jisas daukan baku dauks

3. Dîa daukaia want sma ba kat daukaia lukpara. Upla kum wal aisaia tâ krikaia dukiara, man dîa luki sma ba dukiara baman aisaia nit apia sma. Kau pain kabia, uplika dîa luki ba dukiara aisama kaka. Baha mita lukankam chens muns, bara naha makabi walanka nani ra silp luks:

1. “¿Tilivisan apia kaka radiu ra dîa sturka raya nani takisa?”.

2. “¿Laimara iwi uplika nani, skul watla ra, apia kaka warkki pliska ra upla nani ba dîa sturka aisi banhwisa ki?”.

4. Kainam kir ra dîa taki ba aman kaiks. Naha makabi walanka nani ra luks:

1. “¿Uplika ba dîa daukisa? ¿Diaura ai sinska mangki brisa?”.

2. “Uplika kwalka dimra, mawan, bara ai watla ba, ¿witin diaura kasak luki ba bara ai iwanka tnatka dukiara dîa ai marikaia sip sa ki?”.

3. “¿Na’minit witin wal aisaia sip sna ki?”.

5. Aman wals.

1. Man baman aisapara.

2. Uplika ra aisaia sanska yas. Nit sa kaka, makabi walanka nani dauks.