Smalkaia warkka kau pain daukaia sip sa: nahki upla ra aisabia ban wina smalkaia dukiara

¿Dîa muni daukaia sa? Utla utla ra smalki taukisa taim, piua kum kum ra kaikisa upla nani ba ai watla ra âpu sa. Sakuna, naha uplika nani wal aisaia sip sa upla ailal impaki trukka kum ra auya ba ra, daktar bîla kaiki ba ra, skul apia kaka wan warkka ra ris brisa piua ra bara plis wala nani ra sin. Naha ba Gâd kupia lâka sa, upla sut ba Gâd Kingka lâka sturka nani ba walbia (1 Ti. 2:3, 4). Bamna upla nani ra smalkaia dukiara, piu aihkika ba yawan sika uplika ra wih aisaia sa.

Nahki daukaia:

Tânkira lâka mariks. ¿Uplika ba sturi aisaia brinka mawan brisa? ¿Baha taimka ba sanska yabisa uplika wal pain aisaia dukiara? Smalki tataukra kum kum ba pas uplika mawan ra kaikisa, baha wina ai mawan ba lilia daukisa. Uplika ba kikbia kaka, smalki tataukra ba aisaia trai munisa.
Upla nani wal aisaia sibrin mai daukisa kaka, pura sunra sirpi bara kupiam kat dauks (Nih. 2:4; Ap.St 4:29).
Diara sirpi kum wiaia trai muns, ban kra lakula bîla kum. Jisas Sameria wina mairka wal aisan taim, Gâd Kingka lâka dukiara aisi tâ krikras kan (Jn. 4:7). Sam taim upla kum wal aisaia dukiara, pain sa kupia buki aisanka kum wal tâ krikaia: “¡Luhpiam nani ba daukanka painkira brisa!” Makabi walanka nani daukaia ba hilp munisa upla kum wal aisanka kum tâ krikaia: “¿Nahwala tihmia maisa pakanka nani takan ba kaikram ki?”
Bara uplika wal aisaia tâ krikram sa, sanska kum pliks nahki uplika ra sturi yamni ba smalkaia, sakuna uba isti daukpara, smalkankam ba tawa tawa ban wina takbia swis. Diara pranakira kum aisaia sip sa uplika ba tâ iwbia dukiara, bara baku witin nani makabi walanka daukaia want kabia. Sampla baku, pamali dukiara aisisma kaka, naku wiaia sip sma: “Tuktan nani ra nahki smalki pakaia dukiara, kupia kraukanka nani pliki sakri sa, bara pain sa”. Bara sturi raya kum takan ba dukiara aisisa kaka, naku wiaia sip sma: “Bisi pali sturi yamni kum dukiara wali kapri nahki diara nani ba chens takbia”. Sari takpara uplika ba danh aisaia wan apia sa kaka, kan man smalkanka kum uplika ra yabram.
Wauhkataya sirpi apia kaka ulbi sakanka wala nani brih was upla kum kau nu takan daukisa kaka yabaia dukiara.

Kati kum bilkara daukaia trai muns:

Wik bani trai muns aisanka nani tâ krikaia aima kum pan uplika ra ban wina smalkaia dukiara.