Lan Wan Dauki Aidrubanka ba dukyara Nahki Ridi Takaia Sa
1. Lan Wan Dauki Aidrubanka ba dia dukyara daukan sa, bara help wan munbia wisi yawan dia daukaia sa ki?
1 Lan Wan Dauki Aidrubanka ba sika, smalkaia warkka ba kau pain daukaia dukyara daukan sa. Aidrubanka na ra King laka sturka yamni smalkaia ba, disaipel nani daukaia ba, bara lâ daukbia yua aula maisapahkaia tanka dukyara sin kau pali laki kaikisa (Mat. 28:20; Mark 13:10; 2 Pi. 3:7). Aidrubanka na dukyara yawan pain ridi takisa kaka, rait pali yamni tara sakan kabia.
2. Aisanka kum walaia dukyara nahki ridi takaia sip sa ki?
2 Aisanka. Dia tanka aisai ba sika, aisanka lalka ulban munuhtara, aisasara ra bila prahni ra aisi marikisa. Baha ra tanka aisi ba, bara tikska nani taki ba sin man laki kaikaia sip sma. Bara smalki tauki taim baha tanka mamriki ba nahki yus munma sapa sin luki kaikaia sip sma.
3. Pana pana laki kaikanka kum dukyara nahki ridi takaia sip sa ki?
3 Pana Pana Laki Kaikanka. Aihwakisa wauhkataya stadika ba baku, pana pana laki kaikbia wi taim, ta kriki, prakaia dukyara sin bila prahni ra aisi daukisa. Baiki sakanka kumi banira tanka bapanka nani ba mark muns, bara ridi bas mihtam buki lal kat aisaia.
4. Wali nani sin aisabia laki kaikanka kum dukyara nahki ridi takaia sip sa ki?
4 Wali nani Sin Aisabia. Naha ba aisanka kum baku daukisa. Kuna aisasara ba sip sa wali nani ra tanka kum kum makabi walaia. Tanka bapanka nani mark muni, tikska nani sin kaina wina aisi kaikma sa kaka, tanka makabi walbia taim aisaia sip mai munbia. Kristian waitna mihta ra ba trai munaia sa wali nani helpka ni tanka bapanka nani sut laki kaikaia.
5. Dia help wan munbia marikanka nani ba wina kau yamnika sakaia?
5 Marikanka kum. Tanka laki kaiki kum nahki yus munbia ba marikaia wisi, rait taki marikanka nani yus munisa. Almuk nani ra, Smalki Tataukra lan nani ra, apia kaka Taura Smasmalkra nani ra sin sip sa makabaia nahamuna kum daukbia. Ridi takaia wisi man sip sma marikanka ba nahki daukan kabia sapa kupiam ra paski lukaia. Wauhkataya ni smalki dia wiaia ba dukyara marikanka kum daukuya taim, man kaka nahki daukaia kapram, bara upla sat sat mawanra dia wiaia kapram sapa kupiam ra paski luki kais. Amya tikpara ani ulbi sakanka yus munai ba brih balaia. Pamali Mayunra tihmika ba ra, help tara kabia tila wina marikanka kum kum daukaia.
6. Dia muni Lan Wan Dauki Aidrubanka ba dukyara ridi takaia sa ki?
6 Laki kaikata sut alki daukbia sa kaka lika, pana pana kasak wan ta baikan kabia. Yawan kaina wina ridi taki, tanka pain wiai ba dahra sin lukuya taim, Lan Wan Dauki Aidrubanka ba kau auhni takisa (Rom 1:11, 12). Lan Wan Dauki Aidrubanka ba ra ridi kaia dukyara wan taimka sakisa kaka, smalki warkka ba ra, kasak pali yawan upla lan kabia (2 Tim. 3:17).