Smalki taki waia aidrubanka ba tânka tara brisa

1. ¿Dîa muni smalki taki waia aidrubanka nani ba daukisa?

¹ Yu kum, Jisas ba ai disaipilka 70 asla dauki bara smalkaia blikan (Lk. 10:1-11, Traducción del Nuevo Mundo de las Santas Escrituras). Jisas witin nani ra kupia bukan bara win yakan wark taki kabia apia, kan Jehova “wark Dawanka” ba tapahki kabia. Baku sin, Jisas witin nani ra lan daukan ai warkka pain daukbia dukiara, bara “wâl wâl ra” saki smalkaia blikan. Naiwa, smalki taki waia aidrubanka nani ba sim natka ra daukisa: wan kupia bukaia, lan wan daukaia bara asla wark takaia.

2. Lih Wainhka kati wina smalki taki waia aidrubanka nani ba, ¿piua an ra dauki kabia?

² Naiwa, smalki taki waia aidrubanka kum ba 10 apia kaka 15 minit daukisa, baha sim piua ra dakni nani asla daukisa, ani ra smalkbia ba sakisa bara pura sunra sin daukisa. Nanara Lih Wainhka kati wina smalki taki waia aidrubanka ba 5 apia kaka 7 minit ra daukaia sa. Bara kangrigisan aidrubanka kum luan ningkara smalkaia takisa kaka, taimka ba kau dakbaia sa, kan taki wabia uplika nani ba pat spirit lâka ra yamnika ailal brin sa. Naha aidrubanka nani ba kunhku daukbia kaka, smalkaia warkka ra kau daukaia sip kabia. Baku sin, tâura smasmalkra nani, apia kaka smalki tataukra wala aidrubanka daukras kaina wina smalkaia taki wan kaka dis minit kum kum baman lus tiwbia.

3. Smalki tataukra nani ra luki, ¿ani natka kau pain kabia smalki taki waia aidrubanka nani ba daukaia?

³ Smalki taki waia aidrubanka nani ba smalki tataukra yamnika ra luki daukbia. Kangrigisan manis ba kaikan sa kau pain sa dakni bani ba plis sât sât wina taki waia. Baku smalki tataukra nani ba smalkaia pliska kau lamara bribia bara sim piua ra smalki taki waia aidrubanka ra kaia. Smalki tataukra nani ba kau isti asla takbia bara smalkaia daknika tâ bri ba mapara ai uplika nani ra hilp munaia sip kabia. Kangrigisan almukka daknika ba, nitka laki kaikbia ba ra wibia dîa ba kau pain sa daukaia. Aidrubanka danh takaia dukiara pura sunra sirpi kum daukras kaina ra, sut ba pain nu kaia sa ya wal takbia bara ani pliska ra wih smalkaia ba.

4. ¿Dîa muni smalki taki waia aidrubanka ba sim kulkanka bris aidrubanka wala nani ba wal?

⁴ Aidrubanka wala nani baku sim kulkanka brisa. Naha aidrubanka nani ra dis smalkaia auya uplika nani baman, sakuna kangrigisan ul lika apia. Sakuna baha ba tânka apia sa naha aidrubanka nani ba mâyara kulkbia aidrubanka wala bri ba wal. Wan aidrubanka wala nani baku, smalki taki waia aidrubanka nani ba Jehova wina bali sa bara sanska wankisa pana pana wan walka nani ra latwan kaikaia bara diara yamni nani sin dauki kaia (Hib. 10:24, 25). Baha mita aidrubanka tâ bribia uplika ba pain ridi takaia sa dîa aisabia ba Jehova ra kulkanka yabia dukiara bara balan uplika nani ra sin yamni munbia. Piu bani sip sa kaka, smalki tataukra nani smalkaia takbia ba naha aidrubanka ra kaia trai munaia sa.

Smalki taki waia aidrubanka nani ba mâyara kulkbia apia aidrubanka wala bri ba wal

5. a) Smalkaia warkka tâ brabrira ba, ¿nahki wala nani ra hilp munisa smalki taki waia aidrubanka ba daukaia? b) ¿Nahki kristian mairin kum ba naha aidrubanka tâ bribia?

⁵ Tâ bribia ba nahki ridi takaia sa. Kangrigisan ra aisanka kum pain ridi daukaia dukiara, kaina manis wina uplika ra maisa pakan kaia sa. Smalki taki waia aidrubanka wal sim sât takisa. Smalkaia daknika ba plis sât sât wina taki wisa taim, dakni kum tâ brabrira ba apia kaka ai hilp mamunra lakrika ba naha aidrubanka ba sâkbia. Sakuna kangrigisan ul ba sim pliska wina taki wabia kaka, smalkaia warkka tâ brabrira ba pain laki kaiki wibia ya naha aidrubanka ba sâkbia. Smalkaia warkka tâ brabrira kum kum ya nani smalki takaia aidrubanka daukbia ba programa kum ulbi yabisa, baku sin kangrigisan ra ulbi sabaia tatka ra sabi swisa kaikaia dukiara. Naha aidrubanka tâ bribia uplika ba smasmalkra kum pain kaia sa bara upla nani ra asla daukaia lan kaia sa. Baha mita tânkira lâka yus muni pain wahbi sakaia sa baha warkka yabaia dukiara. Piu kum kum ra Kangrigisan almukka kum, hilp mamunra kum, apia kaka kristian waitna lankira kum naha aidrubanka sakaia âpu sa kaka, smalkaia warkka tâ brabrira ba kristian mairin kum lankira kaka wahbi sâkbia naha aidrubanka sâkbia dukiara. (“Kristian mairin kum tâ brisa kaka” pîska ba kaiks.)

6. ¿Dîa muni smalki taki waia aidrubanka sâkbia uplika ba pain ridi takaia sa?

⁶ Nahki Smalkaia ba Skulka ra apia kaka Gâd Warkka Daukaia Aidrubanka ra aisanka kum brisa taim, yawan mapara tara kulkisa bara pain ridi sa. Yawan bîla kaikbia apia sa aidrubanka ra aula ba ra lukaia dîa aisabia ba. Smalki taki waia aidrubanka sakaia ba wal sim sât takisa. Nanara aidrubanka nani kau kunhku kabia ba mita, pain kabia ridi takbia yamnika ailal sakaia dukiara bara piua kat sin sakaia dukiara. Pain ridi takaia ba sin tânka sa ani ra smalki taki wabia ba aidrubanka kaina ra nu kaia.

7. ¿Smalki taki waia aidrubanka nani ra dîa dukiara aisaia sip sa?

⁷ Dîa dahra aisaia. Plis bani ra nitka sât sât brisa, “alba kasak sinskira ba” ulbanka kum paski sakras sa yua bani ra daukbia dukiara. Bakska “smalki taki waia aidrubanka ra dîa aisabia” hilpka kum kum marikisa. Piua aihkika wali nani ra aisabia sanska yabia. Piu kum kum ra sip kabia marikanka kum ridi daukaia apia kaka jw.org wina lilkika pain kum saki marikaia. Smalki taki waia aidrubanka ridi daukbia uplika ba lukaia sa nahki baha yua ra smalkaia taki wabia nani ra kupia bukaia bara lan daukbia.

Smalki taki waia aidrubanka ridi daukbia uplika ba lukaia sa nahki baha yua ra smalkaia taki wabia nani ra kupia bukaia bara lan daukbia

8. ¿Wik tnata lâs ra dîa laki kaikaia pain kabia smalki taki waia aidrubanka nani ra?

⁸ Satadi yua ba, smalki tataukra manis ba La Atalaya bara ¡Despertad! ba upla mihta ra swisa. Wauhkataya nani ba bîlam aisanka ra âpu sa, bara smalkisa pliska ra upla manis Ispail aisisa, baku sin Ispail kangrigisanka kum âpu sa kaka, wauhkataya nani ba upla mihta ra swiaia sip kabia. Bamna, kau pain kabia kangrigisan dîa bîla aisi ba baman ulbi sakanka nani upla ra yabaia. Muihni lakri manis satadi ra dauki ba wik bilara sip daukras sa. Baha mita, dîa Pamali Tihmika ra praptis munan ba ban kra ai kupia krawras. Baha mita pain kabia, smalki taki waia aidrubanka tâ bribia ba Gâd Warkka Daukaia wauhkataya ninara marikanka nani taki ba laki kaikbia. Diara wala daukaia sip ba sika, marikanka nani wal nahki trabil kum takan ba dahra, holi yua kum, apia kaka liliaka kum dukiara marikanka nani yus muni upla wal aisaia sip sa. Baku sin, sip sa tânka marikaia nahki upla kum ra kli wih kaikaia wauhkataya nani brin kaka. Smalki tataukra tila wina kum ba kati ra wauhkataya yus muni nani ba wal pat wark takan kaka, tânka prahni ra aisabia nahki daukaia sip sa apia kaka sturi painkira kum brisa kaka yas aisabia. Sandi yua ra, sim sât daukaia sip sa kati bîla ra wark taki ulbi sakanka nani ba wal. Stadi takaia ulbi sakanka nani, Sturka yamni nani bara Gâd bîla wals apia kaka Baibil Smalkisa bukka ba piu bani ra upla mihta ra swi ba mita, smalki taki waia aidrubanka dauki ba sip sa laki kaikaia nahki baha ulbi sakanka nani ba upla mihta ra swiaia.

9. Kangrigisan ba paiwanka nani yabaia warkka tara daukisa piua ra, ¿wik tnata lâs ra smalkaia warkka dukiara dîa aisabia?

⁹ Kangrigisan ba wik tnata lâs ra paiwanka apia kaka wauhkataya sirpi yabaia warkka tara daukisa piua ra, laki kaikaia sa nahki sip sa La Atalaya bara ¡Despertad! ba wauhkataya sirpi bara paiwanka nani aikuki wik tnata lâs ra yabaia, apia kaka upla kum kau lan takaia ai brinka sa kaka dîa daukbia. Bara sip sa sturka painkira kum aisaia paiwanka nani yabi kan piua ra dîa takan ba.

10, 11. ¿Dîa muni pain kabia smalki tataukra nani ba aidrubanka dukiara ridi takbia?

¹⁰ Smalki tataukra nani ba nahki ridi takaia sa. Aidrubanka ba pain kabia dukiara nit sa smalki tataukra nani tâ baikbia. Smalkaia warkka dukiara kaina manis ridi takaia sip sa Pamali Mayunra Tihmika ra. Baku witin nani sip kabia aidrubanka ra sturi yamni ba aisaia. Yawan ridi kaia dukiara, aidrubanka daukras kaina ra ulbi sakanka nani sut bri kaia sa. Baku daukbia kaka let wan alkbia apia smalkaia pliska ra waia dukiara.

¹¹ Aidrubanka wala nani ra piua kat balaia trai muni baku, smalki taki waia aidrubanka nani ra sin minit kum kum tâ krikras ba ra kaia sa. Yawan let wisa kaka ambuk munbia, baku sin nahki wark takaia lukan ba sauhkaia sip sa. ¿Nahki sauhkaia sip sa? Tâ bri ba uplika daknika nani nahki wark takbia ba pat laki kaikan sa. Sampla baku, upla wiria man balan sa kaka, ban kra plis kum sirpi bâra dakni ba smalkaia blikisa. Bara smalkaia pliska kum ba uba laihura sa kaka, ban kra truk bri uplika nani bara âpu wal blikaia sip sa. Smalkaia auya pliska ba upla saura uba bâra sa kaka, ban kra kristian waitna kum kum ra makabia mairin lamara smalkbia apia kaka aikuki wark takbia. Smalki tataukra kum kra siknis sa kaka, uli bal iwi yabalka kum ra blîkbia apia, baku sin tips âpu watla nani ra blîkbia. Apia kaka sip sa smalki tataukra raya ba kau lankira nani wal blikaia. Baha mita, let wabia kaka naha sut ba nahki asla takan ba kli daukaia tawisa. Yawan sut ban kra let wan alkisa trabil kum tara wan mapara brin ba tâwan. Sakuna piu bani let taukisa kaka, ban kra naha sât aidrubanka ba ra kulkanka yabras, apia kaka yawan kau pain ridi takaia nitka brisa sapa laki kaikaia sa.

12. Sim uplika wal baman smalki taukisa kaka, ¿dîa daukaia aitani kabia?

¹² Smalki tataukra nani ba sip sa kaina manis ya wal takbia ba pliki sakaia apia kaka aidrubanka ra kum yabia bîla kaikaia. Sakuna sim muihni lakri wal baman takisa kaka, ¿smalki tataukra wala nani wal sin taki waia sip sa? (2 Ko. 6:11-13.) Smalki tataukra raya kum wal taki waia sip sa bara baku hilp munaia smalki tataukra lankira kaia (1 Ko. 10:24; 1 Ti. 4:13, 15). Aidrubanka ra kabia taim, dîa aisabia ba pain walbia, sampla baku ani wina smalkaia tâ krikbia ba. Aidrubanka danh takbia taim, dîa pat ridi swin ba sins munaia apia trai munbia bara isti pali smalkaia pliska ra mahka waia.

13. Yawan kumi bani ridi takbia kaka, ¿smalki taki waia aidrubanka nani ba nahki hilp wan munbia?

¹³ Jisas upla 70 ra smalkaia blikan kata ba, “liliakira kli tawi balan” (Lk. 10:17). Param sa, kainara Jisas witin nani wal aidrubanka kum daukan ba mita pain ai warkka dauki banhwan. Smalki taki waia aidrubanka nani yawan dauki ba sim hilpka yabisa. Yawan sut ba pain ridi takisa kaka, naha aidrubanka nani ba wan kupia bukbia, lan wan daukbia bara “tasba aiska ra smalkan kabia” (Mt. 24:14).

Kristian mairin kum tâ brisa kaka

Kristian mairin sa kaka, ai lal srukbia, bara smalki taki waia aidrubanka dauki kabia piua ra iwi kaia sa. Kristian waitna kum naha aidrubanka dauki ba baku daukbia. Witin lan dauki uplika baku pulbia apia, sakuna tânka kum saki wali nani wal laki kaikaia sip sa. Bara kristian mairin wala ra pura sunra ba daukbia makabisa kaka, wala ba sin ai lal srukbia. Kristian mairin ba aidrubanka daukisa piua ra kristian waitna kum balbia kaka, mairin ba swibia kristian waitna ba aisanka tâ bribia. Smalkaia warkka pura kakaira ba kaina manis laki kaikaia sa dîa dukia nani ba aihka takaia sip sa, bara tâ bribia uplika nani ra maisa pakbia dîa daukaia baha nani takbia apia dukiara. Sampla baku, kristian waitna wahma lupia kum aidrubanka ra kaia sip sa bara kristian mairin aidrubanka ba tâ brisa. Kangrigisan almukka nani ba ban kra lukisa naha wahma lupia ba aidrubanka kum tâ briaia ridi apia sa, sakuna pura sunra ba lika daukaia sip sa. Baku takisa taim smalkaia warkka pura kakaira ba kaina manis wâlsut ra maisa pakbia kristian mairin ba aidrubanka tâ bribia bara wahma lupia ba pura sunra ba daukbia. Ban kra naha takaia sip sa, kristian waitna kum tila ra sa, bara kangrigisan almukka nani baman nu sa dîa muni naha ba tâ briaia bara pura sunra daukaia sip apia sa. Kangrigisan almukka nani ba wibia apia dîa muni naha kristian waitna ba sip daukras ba, sakuna kristian mairin ra wibia aidrubanka tâ bribia bara pura sunra sin daukbia kristian waitna ba bâra kabia sin. Baku sin, kangrigisan almukka nani naha kristian waitna ra wibia ahkia yua ra kristian mairin nani ba smalki taki waia aidrubanka ba tâ bribia.

Smalki taki waia aidrubanka ra dîa aisabia:

Gâd Warkka Dauki wauhkataya wina marikanka nani.
Jw.org wina lilkika pain kum smalkaia dukiara.
Upla wal nahki aisi tâ krikaia marikanka kum apia kaka, nahki upla ra kli wih kaikaia tânka marikaia, apia kaka wan ulbi sakanka nani ba atkras sakuna prisantka kum yabaia sip ba dukiara aisaia.
Tikska kum wan kupia buki ba apia kaka smalkaia ra yus munaia sip ba.
Tawan ra takan sturka painkira kum apia kaka ulban ba wina saki aisaia.
Gâd Warkka Dauki wina ulbanka painkira kum.
Tânka pain kum Gâd Warkka Daukaia Aidrubanka ra bisi laki kaikan ba.
La Atalaya stadika wina tânka kum smalkaia dukiara aisi ba laki kaikaia.
Benefíciese bara “Ven, sé mi seguidor” bukka nani wina tânka kum smalkaia warkka ra yus munaia sip ba.
Smalkaia warkka ra nahki jw.org yus munaia.
Traducción del Nuevo Mundo Baibilka natka raya bri ba nahki smalkaia warkka ra yus munaia sip sa, bîlam aisanka ra sa kaka.
Upla kum wisa Gâd âpu sa, diara sut ban wina takan wibia kaka, hindú uplika kum, budista uplika kum kaka, nahki aisaia laki kaikaia sip sa.
Wan alki takaski bîla nani wan aisabia kaka dîa daukaia.
Nahki wan yula kahbi uplika ra hilp munbia smalki tataukra kum pain kaia.
Upla kum bîla aisanka wala aisisa kaka dîa daukaia.
Upla nani bîla aisanka wala nani ra nahki plikaia, Teléfono bâk smalkaia, upla ailal bâra pliska nani ra smalkaia, upla nani ra kli wih kaikaia apia kaka Baibil stadika nahki tâ briaia.
Nahki wan kan kahbaia sip ba tânka marikaia, nahki wan kupia alki takaskaia bara diara yamni dukiara lukaia, wan daukanka pain nani marikaia.