2010 ra Yu Kumi Aidrubanka Tara ba nahki kabia
1. a) Pyu luan ra, ani sat smalkanka lalka nani Yu Kumi Aidrubanka Tara ba ra yawan laki kaikan ki? b) Yu Kumi Aidrubanka Tara nani luan ba wina, smalkanka bila kum bara sa man ra help mai munan?
1 “Diara kau tara pliki kulki kaiki bas,” “Syîp daknika kumi baku bapi bui kap,” “Tanka kasak ba dukyara witnis aisi kap,” bara “Yawan slaubla ba, Jehova sika slaubla Papaskra sa” (Pil. 1:9, 10, 27; Jan 18:37; Ais. 64:8). Naha nani sika, Yu Kumi Aidrubanka Tara luan smalkanka lalka nani tila wina kum kum sa. Bara 2010 ra Yu Kumi Aidrubanka Tara daukai ba sin walan mai daukisa ki? Aula ba 1 Korint 7:29 ba wina sakan sa, bara ai lalka bila: “Yawan kau pyu wiria baman brisa”.
2. Yu Kumi Aidrubanka Tara ba ra waia wan kupia nikban kabia wisi, dia daukaia sip sa ki?
2 Pas pali, sip sma Yu Kumi Aidrubanka Tara ba kangrigisankam ra maisapahkan kabia wal baku, baha ra waia dukyara ban aisi kaia. Aisa-yapti kum kum ba dia daukisa luki? Witin nani pamali baku kalindarka kum pami bri bara, Aidrubanka Tara yua ba ulbi mark muni brisa. Baku sin, Aidrubanka ra waia dukyara kumi bani dia dia nit kabia sapa ulbi pami brisa. Bara ba’wina Aidrubanka Tara yua ba kat kulki aula. Pamali Mayunra ba ra sin, man sip sma Yu Kumi Aidrubanka Tara pat luan nani ba dukyara dia ulbi brin ba laki kaikaia. Bara wan kupia ridi kabia dukyara, Benefíciese de la Escuela del Ministerio Teocrático bukka, wahya 13-16 kat laki kaiki help munbia man, pamalikam ba sin Aidrubanka Tara ba ra ‘pain walaia’ (Luk 8:18).
3. Dia help wan munbia wali kabia sut ba wina yamnika sakaia?
3 Lan takram ba alki dauks. Aidrubanka Tara kum dan takan bara, yawan aihkika bila: “Rait pain smalkati!” Bara baku sa, kan Gâd mihta wina yamnika kum sa (Sins.l 10:22). Sakuna dia walan ba wina ma pain krikbia wisi, aman luki kaiki alki briaia sa (Luk 8:15). Yabal ra wamtla ra impaki wama taim, trai muns pamalikam wal, apia kaka man wal auya nani wal dia dia lan takram ba aisaia. Ani tanka bapanka nani smalkaia warkka ba ra yus tara kaia sip ba sin aisas. Baku dauki muni help mai munbia dia walram ba wina pyu wihka kat yamnika sakaia (Jems 1:25).
4. Dia muni wiaia sip sa Yu Kumi Aidrubanka na rait tara kabia?
4 Yawan uba nit kan dukya kum prisant wanki bara, uba pain wan dara walisa. Rait apia Jehova bui Yu Kumi Aidrubanka Tara ba ra dia dia wan wibia ba, yawan uba bila kaiki bangwisa? Yawan pain nu sa tanka sut mapara naha na yus tara kabia. Wan Aisa painkira, Jehova mihta wina prisant kum bila kaikisa. Kasak sika! Witin warkka daukaia dukyara wan kupia buki lan wan dauki prisantka sa! (2 Tim. 4:2; Jems 1:17.)