‘Pyua kat pata’
1. Yu Kumi Aidrubanka luan ba, man bara upla wala nani ra nahki help munan sa?
1 Yu Kumi Aidrubanka luan ningkara, yawan ban wisa: “Yawan nit pali kan baha walaia!”. Impaki pura kakaira kum bila Aidrubanka smalkanka nani walan ningkara witin pura kaiki daknika wina muihni lakri kum kum mita witin ra win smalkaia warkka ba kau daukaia want kan. Impaki pura kakaira wala kum aisan: “Sut ra help wan munisa param kaikaia ani pyua ra iwisa bara yawan kumi bani ra sanska wankisa, wan rayaka wal dia daukaia ba laki kaikaia”. Impaki pura kakaira wala sin win: “Smalki tataukra ailal tila wina win aidrubanka aisanka nani ba help munan smalkaia warkka ra ai sinska mangkaia.” Bara man ra, Yu Kumi Aidrubanka yua ba nahki help mai munan sa ki?
2. Aidrubanka aisanka nani aula ba dia dahra aisi kabia ki?
2 Naha manka ra smalkaia warkka ta krikbia taim, Yu Kumi Aidrubanka nani ba sin pyua kat pata ba wanki kabia. Aidrubanka lalka ba Lawana 118:8, 9 wina sakan sa, bara aisanka nani kum kum ba, lan wan daukbia nahki Jehova wan yukuwaika sa trabil pyua ra, Jehova bui nahki karnika wankisa, nahki upla wala nani ra help munaia, Jehova tnawa munuhtara yukuwaia, baku sin, nahki upla wala mapara Jehova baku yukuwaika kum kaia bara wahma tyara nani Jehova ra ai pânika pali baku kaikaia help munbia. Wan asla takanka ba spirit laka ra paradais kum sa. Bara dia muni naha ba wan yukuwaika sa.
3. Yu Kumi Aidrubanka wina nahki yamnika sakaia sip kabia ki?
3 Yamnika sakaia. Ahkia yua kabia ba nu munbia wal baku, aidrubanka ra kaia dukyara bara stadikam nani ra sin paiwaia mahka ridi taks. Wan auya tikaia apia sa, ya nani bila smalkanka wali ba ‘ma pain pali saki’ sa (Luk 8:15). Baku bamna, aisanka nani bara aman pali wali bas, bara tanka kum kum help mai munbia lukisma ba wauhtaya ra ulbaia, aidrubanka lubia ningkara, taim saki pamalikam wal ani tanka nani aisan ba wina alki daukaia dukyara aisas.
4. Dia muni uba liliakira Yu Kumi Aidrubanka ba bila kaikisa ki?
4 Aidrubanka aula ba latwan laka ni bara kaina manas wina laki kaikan sa, sim plun auhni pain kum piakan karnika wanki baku sa. Jehova blis munbia aidrubanka ra kaia dukyara trai muni ba ‘pyua kat pata’ ridi daukan ba yamnika briaia. Baha sut, kristian nani dukyara ridi daukan sa (Mat. 24:45).