Gâd Bîla ba karnika brisa
1. ¿Mani 2014 ra Yu Kumi Aidrubanka lalka ba ani kabia?
1 Upla nani dîa dauki ba sut ba mistik lâka brisa, sakuna Baibil ba karnika brisa wan rayaka aiska ba chens munaia. Sampla baku, lukanka pain nani bara nahki Jehova kupia lâka kat iwaia hilp wan munisa. ¿Nahki Gâd Bîla ba karnika tara brisa? ¿Nahki naha karnika ba wan rayaka ra briaia sip sa? Wan walka ra kupia bukaia dukiara, ¿nahki naha karnika ba yus munbia ki? Yu Kumi Aidrubanka mani 2014 ra naha ansika painkira nani bribia. Naha aidrubanka lalka ba naku kabia: “Gâd Bîla ba karnika brisa”, bara Hibru Nani 4:12 ba wina sakan sa.
2. ¿Ani makabi walanka nani ba aman walaia sa?
2 Naha makabi walanka ansika nani pliks. Aidrubanka piua ra trai muns naha makabi walanka ansika nani ba ulbaia.
• ¿Dîa muni Gâd Bîla ba yawan kasak lukaia sa? (Law. 29:4.)
• ¿Nahki muni Gâd Bîla karnika ba silp wan rayaka ra bribia ki? (Law. 34:8.)
• ¿Smalkaia warkka ra nahki Gâd Bîla karnika ba marikbia? (2 Ti. 3:16, 17.)
• ¿Sitan karnika ba kunin wan munbia apia dukiara nahki wan kan kahbaia sip sa? (1 Jn. 5:19.)
• Wahma tiara nani, ¿nahki spirit lâka ra kau pain pâwaia sip sma ki? (Jir. 17:7.)
• ¿Nahki muni yawan spirit lâka ra karnika bribia swapni wan dara walbia taim? (2 Ko. 12:10.)
• ¿Dîa ba hilp wan munbia lukanka saura bara daukanka saura nani bri ba chens munaia? (Epe. 4:23.)
3. ¿Yu Kumi Aidrubanka walbia ba wina dîa dukia wala sin daukaia sip sa yamnika sakaia dukiara?
3 ¡Naha tânka painkira nani walbia ba wina kasak yamnika bribia! Yu Kumi Aidrubanka, Yu Wal Aidrubanka bara Aidrubanka Kau tara ba sanska wankbia wan pânika lâka ba kangrigisan wala muihni lakrika nani wal marikaia (Law. 133:1-3; 2 Ko. 6:11-13). Pânikam almuk nani wal aisas, baku sin trai muns pana raya nani daukaia. Aisanka yabi uplika kum paiwan bâra sa, sampla baku dakni tara pura kakaira ba apia kaka Betel watla wina balan uplika, Yu kum Aidrubanka ra sa kaka, witin nani bara ai maya ra yamni balanka yabaia sip sa. ¡Rait pali yawan diara ailal tâwan naha aidrubanka ra kaia want sa!