Smalki taki waia daknika wina, ¿dîa yamnika brisa?
1. ¿Kangrigisan Buk Stadika kan ba wina, ¿dîa yamnika ba ban briaia sip sa smalki taki waia daknika ba wina?
1 Kangrigisan Buk Stadika kan ba wina, ¿dîa ba kau laik kapram? Baha piua ra dakni nani ba sirpi kan ba mita kau âuyapah kan, bara pâna nani daukaia ba isi kan (S.L 18:24). Naha stadika tâ bri kan ba dîa trabilka nani yawan bri kan ba nu kan, bara hilpka ba wanki kan (S.L 27:23; 1 Pi. 5:2, 3). Baha yamnika nani ban naiwa briaia sip sa smalki taki waia daknika wina.
2. Smalki taki waia daknika tilara pâna pain daukaia dukiara, ¿dîa daukaia sip sma?
2 Daukaia trai muns. Smalki taki waia daknika ba sirpi sa, Kangrigisan Buk Stadika kan ba baku. Muihni lakri nani wal “bakahnu” smalkisa taim, pâna lâka pain nani sakisa (Pil. 1:27). ¿Smalkaia daknikam ba wina upla an wal pat smalkaia waram sa? ¡Trai muns daknikam tila wina kumi bani wal taki waia! (2 Ko. 6:13.) Baku sin, sip sma daknikam tila wina muihni lakri kum kum ra plun piaia, apia kaka Pamali Mayunra Tihmika ra paiwaia. Kangrigisan kum kum ra, smalki taki waia daknika nani ba sanska plikisa baha wikka ra aidrubanka ra aisanka yabia uplika ra plun dakakaia paiwisa. Bara daknika ba piu lilia kum luisa, aisasara ba witin nani wal âpu kabia sin.
3. ¿Nahki spirit lâka ra hilp briaia sip sa smalki taki waia daknika ba wina?
3 Naiwa piua ra kangrigisan nani ba wik bilara aima wâl asla takisa. Naha ba tânka apia sa kangrigisan almukka nani wina spirit lâka ra kau hilpka wiria brisa. Dakni kum tâ bri ba, witin muihni lakri nani ra tâ baikaia sa, bara kumi bani ra hilp munaia sa smalkaia warkka ba pain daukbia dukiara. Daknika tâ bri uplika wal kau smalkaia taki waras sma kaka, ¿dîa muni makabras witin wal smalkaia? Baku sin, kati bilara aima kum smalkaia tâ bri ba kristianka waitna dakni kum ra wih pura kaikisa. Bara kangrigisan ba uba sirpi sa kaka, ban kra aima wâl mani bilara wih kaikisa. Naha kristian waitna ba daknikam ra wih kaikisa taim, ¿smalkaia warkka ba tâ baikisma?
4. a) ¿Smalki taki waia aidrubanka nani nahki natka ra daukaia sa? b) ¿Dîa muni wan watla ba lin munaia lukaia sa naha aidrubanka nani daukaia dukiara?
4 Wik tnata ra dakni nani ba sait ra asla taki ba yamnika manis brisa. Pas ba, plis sât sât briaia ba muihni lakri nani ra hilp munisa smalki taki waia aidrubanka ra kaia, bara baku natka ra smalkaia pliska ra kau isti wabia. Baku sin, kau isi sa smalki tataukra nani ra asla dauki smalkaia mahka taki wabia dukiara. Lâs ba sika dakni tâ bri uplika ba dîa nitka bâra ba ai daknika ra yabaia sip sa. Dakni wâl apia kaka kau asla daukaia sip sa smalkaia dukiara. Kangrigisan ba kati bilara pas satadika apia kaka La Atalaya stadika danh takisa taim, sut smalki taki wisa kaka, smalki tataukra ba ai daknika aikuki iwaia sa, bara dakni kum tâ bri uplika ba pura sunra ba daukras kainara asla daukaia sip sa. (“¿Wamtla ba lin munaia sip sma?” bakska ba laki kaiks.)
5. Kangrigisan Buk Stadika aidrubanka nanara daukras, sakuna, ¿dîa ba ban lukaia sa?
5 Kangrigisan Buk Stadika aidrubanka kan ba nanara âpu sa. Sakuna Jehova ban dîa nit ba wankisa ai kupia lâka daukaia dukiara (Hib. 13:20, 21). Witin daukbia diara sut bri kabia (Law. 23:1). Smalki taki waia daknika ba hilp wan munisa blisin manis briaia. Baha mita, yawan lukaia sa “ya ailal mangki ba ailal krikan kabia” (2 Ko. 9:6).
[Wahya 6 Lilkika ba]
¿Wamtla ba lin munaia sip sma?
Kangrigisan kum kum ba dakni sut ba smalkaia dukiara asla daukisa, kan anira aidrubanka daukaia pliska uya âpu sa. Smalki taki waia aidrubanka nani ba kangrigisan smalkaia natka kum sa, baha mita wan watla ra naha sât aidrubanka daukaia ba kulkanka tara brisa. ¿Wamtla ba lin munaia sip sma? Wamtla uba umpira kabia sin, lukpara daukaia sip apia sma. Kangrigisan almukka nani ba laki kaikisa ani pliska ra sa. Baku sin, Kangrigisan Buk Stadika kum daukaia dukiara dîa laki kaiki kan ba yus munisa. Wamtla ba lin munaia want sma kaka, daknikam tâ bri uplika ra maisa paks.