Ban wina smalkaia ridi sma ki?
1. Ani tanka marikisa ban wina smalkaia ba yus takaia sip sa?
1 Ban wina smalkaia ba yus takaia sip sa. Baibil ra tanka ailal bara sa ban wina smalki pain takan ba dahra (Jan 4:7-15). Naha sat smalkaia dukyara nahki ridi takaia sip sa?
2. Aisaia ta krikaia dukyara dia help wan munaia sip sa?
2 Wan kwalka dimra. Wan kwalka dimra satka wal pain wan dara walras kaka, ban kra smalkaia trai kaikbia apia (1 Tim. 2:9, 10). Baku sin, Witnis kum baku wan kwalka dimras kaka, ban wina upla ra smalkaia wan takaskbia kaia sa. Sakuna wan kwalka dimra aitani bri kaka, wan kaiki uplika ba sin lukbia dia muni yawan sat wala sapa. Marit Witnis kum ra baku takan, witin nani musulman rilidianka waitnika kum lamara iwi impaki auya kan. Waitnika ba Witniska nani kwala pain klin tauki kan ba kaiki ta iwan, bara makabi walan witin nani kristian bangwisa sapa, bara baku aisi ta kriki, awar yuhmpa aisi bangwan.
3. Jisas daukanka nina bliki, nahki muni aisaia ta krikaia sip sa?
3 Aisaia ta kriki. Jisas mita Jekob liwahntika ra Sameria mairka ra aisan taim, tnatka isi kum ra aisaia ta krikan: Li wira makaban. Yawan sin, aisaia ta krikaia dukyara, sip sa dis tanka kum, apia kaka makabi walanka sirpi kum wiaia. Sam taim aisaia srinhka wankbia, sakuna Jehova helpka ra kasak luki “sibrin apu” aisaia ta krikbia (1 Tes. 2:2).
4. Ban wina smalkaia dukyara nahki ridi takaia sip sa?
4 Aisaia tnatka pliki. Smalki tataukra kum kum ba, ban wina smalkaia tnatka sat sat sakan baku, man sin sakaia sip sma. Rayakam ra daukisma ba laki kaiks. Ba’ wina yu bani aisisma uplika ra luki kaiks. Ulbi sakanka kum kum, bara sip kaka, Baibil ba sin ban twilki bas. Diara sut kaikaia lan bas, bara uplika nani ra luki bas. Baku lika, pat kaina wina dia takbia sut ba luki kaikisi, smalkaia dukyara pain ridi kama (Pil. 1:12-14; 1 Pi. 3:15).
5. Dia muni ban wina smalkaia ba pasa ra swiaia apia sa?
5 Diara wal tawan yawan ban wina smalkaia sip kabia bani ba daukaia sa: Gâd ra latwanka, bara wan walka ra latwanka (Mat. 22:37-39). Bara wan warkka isti nit pali ba mita sin, naha sat smalkaia ba pasa ra swiaia apia sa. Pyua ba kunhku sa. Baha mita yawan aima banira upla ra King laka sturka smalkaia dukyara ridi kaia sa (Rom 10:13, 14; 2 Tim. 4:2).