Yawan pyu bani Jehova Witniska sa
1. Liwahnta un bara Jisas mita mairin kum ra smalkan ba wina, yawan dia lan takisa?
1 Jisas ba pat awar ailal wapi auya kan; bara swapan ai dara wali kan ba mita li sin din dauki kata. Bamna ai disaipelka nani plun atkaia wan bara iwi ris brin, Sameria taunka kir tani kum ra. Jisas baha ra smalkaia dukyara takaskra kan, dis yabal bila bak lui auya kan Galili tasbaia mata, smalkaia warkka dauki ban waia wisi. Ban sakuna, Sameria wina mairin kum li pangkaia balan taim ai kupia wilin mahka smalkata (Jan 4:5-14). Dia muni? Kan witin aima kumi sin Jehova ‘witniska kasak bara diara kasak kat aisi kaia ba’ laka swiras kan (Par.m 3:14). Jisas tnata lukaia want sma kaka pyu bani Jehova Witniska kaia sma (1 Pi. 2:21).
2. Ban wina smalkaia ridi kaia dukyara nahki ridi takaia sip sma?
2 Ridi was. Ban wina smalkaia ridi kaia dukyara wauhkataya sat sat brih waia sma. Muihni-lakri manas ba wauhtaya sirpi nani ba ai mihta ra brisa, bara gias atki pliska ra, diara atkaia suni bri ba watla uplika ra, bara upla wala nani wal sin aikuki prawi bara wauhtaya lupia nani na yabisa (Smas. 11:6). Kristian mairin kum pyu banira impaki tauki ba mita, ya ai lamara iwi ba ra trai munisa mahka smalkaia, baha wisi Baibil kum bara Baibil Smalkisa bukka ba, pyu bani ai pakitka ra mangki brihwisa.
3. Nahki aisanka kum ta krikaia sip sa ki?
3 Aisanka kum ta kriks. Ban wina smalkuma taim, nit apia sma Baibil tanka kum wal ta krikaia. Tanka kum ra kaikaia sip sa Jisas liwahntika un ra, mairka wal aisan taim ta wina lika wiras kan witin ba Misaia kan ba, sakuna li wira diaia baman makaban. Naha walan bara, Sameria mairka ba kau walan daukan (Jan 4:7-9). Jisas nahki aisi kan nina bliki, kristian mairin kum kaikan upla mita witin ra, —sam yua upla tara kulki ba dukyara— lilia luan sapa makabi wali kan taim, yang Jehova Witnis, ba mita baha yua kulkras wiaia watlika ra wi kan: “Au takri sa baha yua tara dan kulkaia apia”. Bara upla ba diara sut nu takaia want ba tawan makabi walisa dia muni, bara mahka witnis aisisa.
4. Dia muni Matyu 28:18-20 ba kupiam bukisa?
4 Jisas na tasba ra dan smalki taukras kabia sin, naiwa kat ban kaikisa yawan smalkaia warkka blikan ba pain daukisa sapa (Mat. 28:18-20). Baku bara, Jisas nina bliki Witnis pain bangwi kap, pyu banira ridi upla sut ra wan kasak lukanka ba wan bila ni aisi mayuni ba sat witniska kaia (Hibru 10:23).