Walan dauki nani ra ahkia taim kli wih kaikaia sa?
1. Disaipel daukaia warkka ba tilara, dia dimisa ki?
1 Disaipel daukaia warkka ba tilara, yawan ani uplika Gâd kingka laka dahra walaia want kaikan kaka kli wih kaikaia sa (Mat. 28:19, 20). Upla kli wih kaikaia wisi, ani yua man sip sma ba, bara uplika ba ahkia sip ba sin lukaia sma. Sakuna pyu wihka swirka lubiara. Dia muni?
2, 3. Dia muni isti pali upla kli wih kaikaia sa?
2 Dia muni isti pali kli wih kaikaia sa? “King laka sturka yamni” ba uba pali tasba aiskara smalki taura wan sa, bara naha tasba iwanka tnatka tnata ba pat baila sa (Mat. 24:14; 1 Pi. 4:7). Ban sakuna, ya walaia brin dauki ba dukyara “swaki sakan laka yua” kum ban bara sa. Bahamna, ‘sturi yamni ba kau smalkaia sa’. Bara smalki ba tilara, walaia brinka bri nani ra help munaia dukyara isti pali kli wih kaikaia sa (2 Kor. 6:1, 2; 2 Tim. 4:2).
3 Setan ba ban yapras wark takisa, yaura yawan Gâd Kingka ma ba mangkan ba ra witin kupia wina sakaia trai munisa (Mark 4:14, 15). Baibil tanka walaia want takisa taim pamali nani, bara wark taki uplika nani ba sin ban kra wan lawaska kikbia. Isti pali uplika ra kli wih kaikbia kaka kau isi kabia uplika wal aisaia, kan ai sinska ra dia aisaram ba raya ban brisa. Baha mita upla wala kau ai sinska lakras bara kli wih kaiki kap.
4. Upla ra kli wih kaikaia ba dukyara nahki muni ta wina bapi swisa?
4 Yua bara awarka ba ulbi swis. Kau pain daukaia sip sma ba sika, ta wina ani yua, bara awarka ba, man uplika ra waisma ba bapi swis, baku sin naika kli wama taim laki kaikma dukyara makabi walanka kum swis. Bara taim brisma kaka sip sma uplika ra makabaia yauhkika wala ra kli balaia, apia kaka sim wikka bilara yu wala balaia. Sakuna uplika wark taki ba mita wik tnata yua kum ra sakram kaka, sip kaia sa au takbia wik wala kat man wal kli aisaia. Kasak sika, aitani sa diara sut ulbi pain bri kama kan man uplika ra waia au takram kaka waia sma (Mat. 5:37).
5. Dia muni yawan wiaia sip sa takaskras upla ra kli wih kaikaia warkka daukisa kaka Jisas dia win ba kat daukisa?
5 Diara pain ailal tawan walan dauki nani ra isti pali kli wih kaikaia sa. Wel au, tasba na “kau pyu wiria baman brisa”. Baha mita pat aman pali pyu kunhku kabia kaiki mahka awarka bara yua pali kli waisma ba bapi swis (1 Kor. 7:29). Wel yawan King laka tanka walan dauki nani ra, kau isti pali kli wih kaiki bara, wan warkka ra kau ma saki kabia.