Nu Takan Daukisa

◼ Jehova Witniska nani ba aisanka kopika bara grabar munan ba upla ra laki yabaia sip sa ki?

Baibil aisanka nani ba wan maisanihki bara wan kupia bukisa (W.n 15:32). Baha mita, ya sip walras kan ba ra baha aisanka kupia buki ba mahka laki yabaia want sa. Tasba sinska laka pawi aula ba wal nana ra aisanka kum ba, kau wiria kaka sim minitka ra grabar muni bara upla wala ra laki yabaia sip sa. Upla kum kum ba, ai watla ra aisanka grabar munanka sat sat ba suni brisa, mani ailal luan dukia kabia sin ban brisa, bara saura lukras ai panika nani ra len munisa, apia kaka kopika kum saki yabisa. Wala nani lika Internet bara plis kum ra mangki swin sa bara ya aisanka kum want sa kaka baha wina sakaia sip sa.

Trabil apu sa ya ai pamalika apia kaka ai yuska dukyara aisanka kum grabar munaia want sa kaka. Baku sin kangrigisan almukka nani ba muhni lakri nani siknis bara aidrubanka nani ra sip waras muni ba dukyara sip sa baha sat aisanka nani ridi dauki yabaia. Sakuna, diara ailal tawan aisanka kopika bara grabar munan ba, wala nani ra yawan laki yabaia apia sa.

Kan aisanka nani paski ba, kangrigisan bani nitka ra luki ridi daukan sa, bankra yawan aisanka dia nitka dukyara daukan ba nu apu sa, bara wala nani ra laki yabisa kaka, aisanka kum dahra ba tanka wahra bribia. Baku sin, ya aisanka ba yaban, bara ahkia wina aisan ki? Naha ba raya apia kaka tanka ba kasak sapa nu takaia karna kabia (Luk 1:1-4). Bara, diara wala ba sika, ya aisanka kopika bara grabar munan ba, laki yabisa kaka kum kum ba sip sa kulkanka aitani apia ba briaia apia kaka yabaia (1 Kor. 3:5-7).

Alba kasak sinskira ba wark karna takisa spirit pata ba ‘pitka kat’ bara “pyua kat” yabi kaia dukyara (Luk 12:42). Jehova Witnis aidrubanka ra aisanka nani yabi ba baha pata sat tilara sa bara Internet www.jw.org pliska ra suni swin ba wina saki bri ba sin. Yawan kasak lukaia sip sa alba kasak sinskira bara ai Ta Bri Daknika ba kasak lukan laka ra dutki kaia dukyara dia nit kabia ba witin nani wangki kabia (W.n 16:4, 5).