Walaia baman grabar munan ulbi sakanka nani ba nahki yus munaia
1. Ulbi sakan wauhkataya nani ba dukiara, ¿dîa natka ra kau yamni wan munaia sip sa?
1 Upla manis jw.org ba wina bîla yamni bara kasak nani liliakira aisi kaikisa (Smas. 12:10). Ban sakuna, ¿walaia dukiara grabar munan nani ba pat yus munram sa ki? Internet ra wan pliska pali ba diara ailal bri sa bara baha sut sip sa walaia. ¿Walaia dukiara grabar munan nani ba nahki sip sa yamni wan munaia?
2. ¿Grabar munan dukia nani ba nahki yus munaia sip sa yawan silp wan stadika bara wan pamali dukiara sin?
2 Yawan silp apia kaka wan pamalika dukiara. Baibil bara wauhkataya wala nani grabar munan ba, impaki ba ra apia kaka yu bani wan warkka dauki ba ra walisa taim, hilp wan muni kabia wan taimka pain yus munaia dukiara (Epe. 5:15, 16). Pamali mayunra ba sip sa sât wala dauki kaia, ulbi sakanka kum wan mihta ra brih muni, sim taimka ra sip sa wali kaia. Walaia dukiara grabar munan nani ba, silp wan stadika ra yus muni taim, hilp tara kum sa kau pain aisi kaikaia apia kaka bîla raya kum lan takisa taim.
3. Smalki tauki pliska ra, ¿ya nani sip sa grabar munan dukia nani ba wina yamnika sakaia?
3 Smalki taukisa taim. Smalki tauki pliska ra, ani upla aisi kaikaia taimka âpu sa kaka, ban kra wilin kabia grabar munan dukia nani ba walaia. Apia kaka yawan ba, bîla tringsar aisi uplika kum wal prawbia bara witin want kabia King Lâka sturka lan takaia sakuna “ai bîla kat” walbia kaka (Ap St. 2:6-8). Plis kum kum ra, walaia ba upla iwanka natka kum sa. Sampla baku, hmong uplika nani ba, pas piua sturka ba, wahma tiara nani ra aisi muni baman laki yabisa bara witin nani ai kiama pri tniki walisa ai sinska ra dingkaia dukiara. África kuntrika ra upla manis ai iwanka natka ba sika, liliakira lan takaia diara taki ba sturka walisa taim.
4. ¿Dîa makabi walanka nani ban kra yawan silp daukaia sa smalki pliska uplika nani ra hilp munaia dukiara?
4 Smalki tauki pliska ra, ¿ban kra yamni kabia ki grabar munan ulbi sakanka kum ba yus munaia utla dawanka nani ai bîla kat walbia dukiara? ¿Upla kum sip kabia ki walaia ulbi sakanka grabar munan ba wina yamnika briaia, correo electrónico bak blîkbia kaka? ¿Walaia ulbi sakanka kum alahbi CD kum ra grabar munaia yawan sip kabia ki? Ban kra imprimir munan wauhkataya ba wal yabia. Buk electrónico aiska bani, wauhkataya tara bara sirpi, apia kaka wauhkataya wala nani upla ra yabi ba, kulkaia sip sa upla mihta ra yaban baku. Walaia dukiara grabar munan nani ba, yawan silp wan stadika briaia dukiara ridi paskan sa baku sin, King Lâka tânka kasak ba saumuk baku mangkaia dukiara (1 Ko. 3:6).