Baibil stadika nani ta krikaia dukyara helpka raya kum
1. Ani ulbanka lalka raya nani, La Atalaya wauhkataya upla ra yabi ba tilara takaisa, bara dia dukyara?
1 Naha kati aula ba wina, La Atalaya wauhkataya upla ra yabi ba tila ra Baibil stadika nani ta krikaia dukyara ulbanka lalka raya kum takbia ba naku kabia; “Enseñanzas de la palabra de Dios”. Smalkaia pliska ra upla kum kum aisi kaikaia ai brinka kabia, sakuna naha ulbanka lalka na upla nani wal laki kaikaia dukyara mangkan sa.
2. Ulbanka lalka raya nani ba nahki kabia ki?
2 Ulbanka lalka raya nani. Naha ulbanka lalka raya nani bara ulbanka baiki sakanka nani sin makabi walanka baku ulban sa, bara watla dawanka wal aisi kabia taim, makabi walaia sip sa. Baibil tikska nani takisa, sakuna ulbanka lika ulbras sa, baha mita upla nani ba lilia kabia Baibil wina lan takaia. Baku sin, tanka kunhku ra upla watla ra auya taim laki kaikaia sip sa. Ulbanka lalka bani ba, Smalkisa bukka dukyara aisisa, bara sanska pain kum bara kabia pyua ra, Baibil stadika kum ta krikaia sip sa.
3. Utla utla ra smalkisa taim, nahki tnatka ra ulbanka lalka raya nani ba yus munaia sip sa Baibil stadika kum ta krikaia?
3 Nahki yus munaia. Wauhkataya nani ba upla mihta ra swibia pyua ra, makabi walanka pain kum ulbanka lalka raya dukyara aisi ba, daukaia sip sa. Sampla baku, Siakwa kati 1 wauhkataya ba, Baibil ba pranakira ba dukyara aisisa. Makabi walaia sip sa: “Baibil ba Gâd wina aula baku kaikisma, apia kaka buk pain kum baman sa? [Ansika maikbia swis.] Naha ra diara painkira kum takisa.” Makabi walanka pas ba mariks, baha wina baiki sakanka kumi ba aisi kaiks, bara tiks nani taki ba pliki saks. Makabi walanka kli aisi kaiks, bara uplika ra makabi wals dia lukisa sapa. Bara makabi walanka tanka kum kum laki kaiks. Watla wina kau taki waras kainara, wauhkataya makabi walanka wala nani swiaia sip sma, bara kli balma taim laki kaikaia. Trai muns wik bani uplika ra wih kaikaia wauhkataya raya nani kau balras kainara. Tnatka wala ba sika uplika ra wiaia Baibil stadika kum yabaia want sma. Baku sin wauhkataya ba yus muni, marikaia sip sa nahki Baibil stadika kum daukisa.
4. Upla ra kli wih kaikaia dukyara, ulbanka lalka raya nani ba nahki yus munaia sip sa?
4 Wauhkataya nani yabisma pliska ra naha ulbanka lalka raya nani sin yus munaia sip sma, apia kaka upla ra kli wih kaikisma pyua ra. Man naku wiaia: “Naha ba La Atalaya ulbanka lalka raya nani sa, bara mai marikaia want sna nahki yus munaia”. Yawan bila kaikisa naha ulbanka lalka nani ba upla ra help munbia “tanka kasak ba kakaira taki bangwbia” (1 Tim. 2:4).