**Smalkaia warkka kau pain daukaia sip sa: Smalkisa bukka yus muni Baibil stadika kum marikaia**

¿Dîa muni daukaia sa? Upla manis Baibil stadika mana luha yabisa dukiara aisisa taim pain ai tânka briras sa. Ban kra, witin nani lukisa skulka kum ra dimaia sa apia kaka kati bani plis wala wina lisin nani blîkbia taim stadi takaia. Baha mita, Baibil stadika kum yabisa wiaia watlika ra, ¿dîa muni marikras nahki Baibil stadika ba daukisa? Mariks Baibil stadi takaia ba isi pali sa bara yamnika ailal briaia sip sa. Minit kum kum baman ra daukbia bara dur tâ ba kat sin daukaia sip sa.

Nahki daukaia:

Uplika ra man ba ya sma ba wiram taim, makabi wals kaina piua dukiara uba wari takisa sapa.
Wis upla manis ba kaina piua dukiara uba trabil taki lukisa, baha wina Smalkisa bukka wina índice nani ba mariks. Uplika ra wis naha bukka ba isi natka ra kaina piua bara diara wala dukiara sin Baibil dîa smalki ba tânka briaia hilp wan munisa. Baha wina, uplika ra makabi wals tila wina ani saptika ba laki kaikaia ai brinka sa.
Uplika ra buk kum yas bara ani saptika witin wahbi sakan ba ra was. Tânka mariks baha saptika bîla ra baiki sakanka kumi tâ krikras kaina ra, makabi walanka nani tâura taki ba ansika briaia sip sa.
Uplika ra makabi wals baiki sakanka kumi ba aisi kaikaia want sa sapa. Baiki sakanka dukiara makabi walanka dauks bara aikuki ansika ba dukiara aisas. Baibil tikska nani smalkanka tâ baiki ba aisi kaiks bara tânka mariks. Uplika ra mariks nahki man silp bukkam ra ansika nani pliki mark munram ba.
Baiki sakanka wala ba laki kaiks, sakuna nanara uplika ra wis trai munbia ansika ba silp dîa lan takan ba wibia.
Uplika ra kupia buki bîla nani wis, bara saptika danh takaia dukiara uplika wal ahkia kli balaia sip ba dukiara wal aisas.
Sip sa kaka, ¿Baibil stadika nani ba nahki dauki banhwisna? lilkika jw.org pliska wina mariks.

Kati kum bilkara daukaia trai muns:

Jehova ra puram suns Baibil stadika kum tâ krikaia trai muni sma ba blisin mai munbia (Pil. 2:13).
Smalkaia taki wama taim, trai muns aima kum pan upla nani ra marikaia nahki Baibil stadika kum daukaia sip sa Smalkisa bukka wal apia kaka, ¿Baibil stadika nani ba nahki dauki banhwisna? lilkika marikaia.