Smalkaia dukiara hilpka tara kum
1. “Conversaciones con un testigo de Jehová” ulbanka, ¿nahki natka wâl ra hilp wan munbia?
1 Piua kum kum ra, La Atalaya wauhkataya upla sut dukiara saki ba ra ulbanka lalka kum takisa nina “Conversaciones con un testigo de Jehová”. Naha ba diara wal dukiara ulbi sakisa: Baibil smalkanka ba upla nani dukiara kau prana daukaia bara tânka kum kum ba rispik lâka ni aisaia (1 Pi. 3:15). Kaisa laki kaikaia yawan nahki baha wina yamnika ailal sakaia sip sa.
2. ¿Ani natka kum ba yus munaia sip sa naha ulbanka lalka ba yus munaia dukiara?
2 Smalkaia warkka ra yus tara brisa. La Atalaya wauhkataya nani naha ulbanka lalka bri ba pain kabia wahbi sakaia yus munaia dukiara. Baku, smalkaia warkka ra upla kum kau nu takan dauki ba, apia kaka Baibil stadika kum makabi walanka La Atalaya wauhkataya ra takan ba daukbia taim, naha ulbanka lalka ba uplika ra yabaia sip sa. Bara uplika ba aisi kaikaia want sa kaka, aikuki laki kaikaia sip sa. Naha ulbanka lalka bri wauhkataya nani ba yawan âpu sa kaka, jw.org pliska wina briaia sip sa.
3. ¿Ani natka dauki kaikan ba pain takan sa?
3 ¿Nahki natka ra naha ulbanka lalka ba yus munaia sip sa? Smalki tataukra kum kum ba Jehova Witniska bîla baikra daukisa bara uplika ra paiwisa uplika wala bîla baikra ba dukiara aisi kaikbia. Naha natka isi pali ba hilp wan munisa tânka kasak ba marikaia, kan uplika ba aihka ai dara walras (Kli.S 32:2).
4. ¿Naha hilpka raya na wina yawan dîa lan takaia sip sa?
4 Smalkaia bara lan takaia dukiara pain sa. Naha ulbi sakanka nani aisi kaikbia taim, ani tikska yus muni ba kaiks, smalki tataukra ba dîa samplika bara tânka yus muni ba sin kaiks. Baku sin, laki kaiks dîa sât bîla baikra ba yus munisa uplika wal aisisa piua ra. Baha wina, naha sim samplika ba smalkaia warkka ra yus munaia trai muns (S.L 1:5; 9:9). Kristian mairin kum win: “Naha ulbanka lalka nani aisi kaikaia ba, smalki tataukra ‘kau lankira’ kum ra kaikaia baku sa, kan witin pat nu sa dîa aisaia ba”.
5. ¿Wan stadi tatakra nani ra hilp munaia dukiara dîa daukaia sip sa?
5 Wan Baibil stadi tatakra nani ra smalkaia warkka daukaia dukiara lan daukisa piua ra, naha ulbanka lalka nani ba hilp wan munbia. Witin nani wal aisi kaikaia pain kabia, bara swika smalki tataukra kum baku daukbia. Naha samplika painkira nani wal kaikma nahki witin nani sin tânka kasak ba rispik lâka ni daukaia sip sa (Kol. 4:6). Param sa, naha ba Jehova natka ailal wanki ba tila wina hilpka kum sa smalkaia warkka ba pain daukaia dukiara (2 Ti. 4:5).