Tara kulkan laka yabisa
Jisas Pruan Kupia Kraukanka ba Lih Wainhka kati 17 ra daukan kabia
1. Jisas Pruan Kupia Kraukanka pyua ra, lawana aîulbra baku nahki wan dara walaia sa ki?
1 Jehova latwanka laka tara bara umpira kaikan laka witin ra marikan ba mita lawana aîulbra ba naku win: “Nahki yang Dawan ra aibapi takamna witin yang ra yamni ai munan bamna?” (Law. 116:12). Naiwa pyua ra, Gâd napakanka nani ba blisin ailal bri ba mita tingki lukisa. Mani ailal naha bila nani ulban ningkara, Jehova upla nani ra prisant tara kum yaban: atki sakan laka ba. Jisas Pruanka Lih Wainhka kati ra daukbia ba dukyara ridi takbia kaka, kau tingkikira wan dara walbia (Kol. 3:15).
2. Dia muni atki sakan laka ba dukyara lilia kaia sa ki?
2 Atki sakan laka blisinka nani. Atki sakan laka bak yawan “wan saurka nani sut ban swih tikan” (Kol. 1:13, 14). Naha ba help wan munisa wan kupia dara walra klin kum wal Jehova ra mayunaia (Hib. 9:13, 14). Baku sin, uba lilia wan dara walisa Jehova ra wan pura sunaia (Hib. 4:14-16). Bara ya ya atki sakan laka ra kasak lukbia ba, raya ban kaia laka ba bribia (Jn. 3:16).
3. Nahki tnatka ra Jehova ra wan tingkika laka ba yabia atki sakan laka ba dukyara?
3 Wan tingkika laka marikbia. Jisas Pruan Kupia Kraukanka tanka ba tara kulkisa kaka, baha pyua dukyara tikska nani sut aisi kaikbia bara kasak pali lukbia. La Atalaya wauhkataya, Kuswa kati 1, 2011 manka, “¿Está usted listo para el día más importante del año?” aisanka lalka baha daukaia dukyara help wan munbia. Baku sin, wan pura sunra nani ra Jehova atki sakan laka wankan ba dukyara tingki wiaia sip sa (1 Tes. 5:17, 18). Bara Jisas bila wali witin Pruanka Kupia Kraukanka ba kulkbia kaka, wan tingkika laka sin marikisa (1 Ko. 11:24, 25). Upla ailal ra paiwaia want sa yawan aikuki baha yua kulkbia dukyara (Ais. 55:1-3).
4. Yawan dia daukbia ki?
4 Jehova napakanka nani ba Jisas Pruanka Kupia Kraukanka ba asla aidrubanka wala kum baku kaikras. Witin nani mapara naha asla aidrubanka ba kau tara sa! Baha yua kau lamara ba ra, lawana aîulbra ulban baku yawan lukisa: “Dawan ba yamni sa wimni, solki aiska ba wal; ai yamnika nani kumi sin aiya tikamna apia” (Law. 103:2).