‘Naha ban dauki bas’ Jisas Pruan Kupia Kraukanka ba
Lih Wainhka kati 5 ra daukbia
1. ¿Dîa muni Jisas Pruan Kupia Kraukanka ba kulkanka tara brisa?
1 “Naha na yang ra luki, dauki bas” (Lk. 22:19). Naha bîla nani wal Jisas ai disaipilka nani ra blikan witin pruanka ba kupia kraukaia. Atki sakan lâka tânka tara kum bri ba mita kristian nani mapara yua kau tara ba Jisas Pruan Kupia Kraukanka sa. Naha manka ra Jisas Pruan Kupia Kraukanka ba Lih Wainhka kati 5 ra kau lamara ba ra, ¿nahki muni wan tingkika lâka Jehova ra marikaia sip sa? (Kol. 3:15.)
2. ¿Jisas Pruan Kupia Kraukanka dukiara lukaia bara stadi takaia ba nahki hilp wan munisa wan tingkika lâka marikaia?
2 Ridi taks. Yawan ba diara tara nani dukiara ridi takisa. Sim baku wan kupia ridi daukaia sip sa Jisas Pruan Kupia Kraukanka dukiara bara pamali baku Jisas pruaia lamara kan dîa takan ba ra luki kaikaia sip sa (Esd. 7:10). Jisas ra dîa takan tânka kum kum ba Examinando las Escrituras diariamente wauhkataya ra, baku sin almanak ra takisa. Sakuna kau nu takaia dukiara El hombre más grande bukka, saptika kum kum ba La Atalaya wauhkataya, Kuswa kati 1 ba ra 2011 manka, wahia 23, 24 laki kaikaia sip sma.
3. Smalkaia warkka ra kau daukaia ba, ¿nahki hilp wan munisa Jisas Pruan Kupia Kraukanka dukiara wan tingkika lâka marikaia?
3 Smalks. Wan tingkika lâka marikaia sip sa smalkaia warkka ra kau dauki ba wal (Lk. 6:45). Kakamuk kati 17 ba wina tasba aiska ra upla sut ra paiwbia Jisas Pruan Kupia Kraukanka dukiara. ¿Taimkam laki kaikaia sip sma smalkaia warkka ra kau daukaia dukiara? Ban kra tâ baiki smasmalkra kaia sip sma. ¿Dîa muni Pamali Mayunra Tihmika ra pamalikam aikuki naha laki kaikras?
4. ¿Jisas Pruan Kupia Kraukanka ba wina dîa yamnika sakisa?
4 ¡Jisas Pruan Kupia Kraukanka ra kaia ba wina yamnika manis sakisa! Wan liliaka lâka bara latwanka lâka ba sin kau tara takisa Jehova kupia pihnika lâka wal ai Luhpia kumi baman bri kan yaban ba dukiara yawan lukisa taim (Jn. 3:16; 1 Jn. 4:9, 10). Naha hilp wan munisa yawan dukiara baman lukaia apia (2 Ko. 5:14, 15). Baku sin Jehova dukiara smalkaia ba wan kupia bukisa (Law. 102:19-21). Rait pali, Jehova uplika nani ba liliakira sanska ba yus munbia Lih Wainhka kati 5 ra ‘Jisas pruanka dukiara aisaia’ (1 Ko. 11:26).