¿Macedonia bâk luaia sip sma?
1. ¿Nahki muni Pal bara ai pânika nani Macedonia ra bal takaskan?
1 Mani 49 yawan piua ra, apastil Pal ba Antiok wina taki Epesus tawanka ra wan impaki pura kakaira kum baku. Baha piua ra, Asia Menor sait ra tawan wala nani ra wan. Sakuna spirit holikira bâk paiwanka kum brin ‘Macedonia bara lui balaia’. Witin bara ai pânika nani ba paiwanka ba liliakira brin, baku sin baha tani ra pas kangrigisanka ba bapan (Ap.St 16:9, 10; 17:1, 2, 4). Naiwa piua ra spirit lâka ra mâ dâkaia piua kum bâra sa, baha mita wark tatakra ailal nit sa (Mt. 9:37, 38). ¿Man wilin sma baha warkka daukaia?
2. ¿Upla kum kum ba dîa muni lukbia kuntri wala ra wih tâ baikaia sip apia sa?
2 Ban kra man sin lukma apastil Pal misan warkka nahki daukan baku daukaia, sakuna kupiam ra sanska kum bâra kabia lukras sma kuntri wala ra wih iwaia. Ban kra sanska kum âpu misan uplika nani skulka ra waia, ban kra mankam ba aitani apia sa, apia kaka kristian mairin yakan kum sma, yakan luhpiam nani pakisma. Baha mita kuntri wala ra waia lukanka âpu sma, kan sip apia mai munbia bîla wala nani lan takaia. Baku sin lukaia sip sma sip apia sma baha lan takaia, kan lalah trabilka karna ba mita man kuntri wala ra iwisma bara sip apia mai munisa kuntri wala ra waia. Sakuna puram sunra nani bâk hilp mai munbia pain luki kaikaia, kuntri wala nani nitka bri ba ra wih hilp munaia.
3. ¿Dîa muni misan skulka ra waia nit apia sa kuntri wala ra wih tâ baikaia dukiara?
3 ¿Misan skulka ra waia nit sma ki? Apastil Pal bara ai pânika aikuki ai warkka pain daukan, baku sin spirit holikira bara Jehova ra kasak lukan (2 Ko. 3:1-5). Baha mita sanska âpu kama misan skulka ra waia, sakuna kuntri wala ra wih tâ baikaia ba uba tara kabia. Baku sin kupiam kraukaia sma, Nahki Smalkaia Skulka, bara Gâd Warkka Daukaia Aidrubanka ba hilp wan munisa diara ailal lan takaia. Misan skulka ra waia lukisma, apia kaka skul sâtka wala dimaia lukisma kaka, pain kabia kuntri wala ra wih iwaia, baku lan takaia sip sma misan uplika nani nahki iwi ba, bara skulka dimma taim pat diara ailal tânka briram kabia.
4. Kristian nani pat almuk takan ba, ¿dîa muni lukaia apia sa kuntri wala ra wih hilp munaia sip apia sa?
4 Kristian nani pat almuk takan ba. Kristian almuk nani spirit lâka ra pâwan ba ai wîna yamnika ba pain kum brisa kaka, kuntri wala nitka tara bri ba ra wih tâ baikisa. Kampani ra, ¿danh wark takras sma? Kristian nani pat almuk takan kum kum ba Gabamint mita lalahka yabi ba yus munisa kuntri wala ra wih hilp munaia dukiara, ban kra bahara, sîka nani ba kau sipar sa ai kuntrika ba wal.
5. Kristian waitna kum ai warkka swih kuntri wala ra wan dukiara aisas.
5 Kristian waitna kum inglis bîla aisisa baku sin kangrigisan almukka kum sa bara tâura smasmalkra kum sa. Kampani warkka taki kan ba swin bara Esia kuntrika ra wan baha ra dakni kum inglis aisi bâra kan bara smalki tataukra 9 bri kan. Bara witin nani ba 30.000 tringsar uplika nani ra smalkaia kan. Mani wâl bilara aidrubanka nani ra kau pâwan, 50 upla nani baku wi kan. Kristianka waitna ba win: “Naha pliska ra balri mita blisinka kau ailal briri sa rayaki ra. Naha sturka aisaia tnata âpu sa”.
6. Kristian mairin kum kuntri wala nitka tara bri kan ba ra wan ba mita, ¿dîa blisinka nani brin?
6 Kristian mairin mayas. Jehova kristian mairin nani ra yus munisa kuntri nitka tara bri ba wih sturi yamni ba smalkaia (Law. 68:11). Kristian mairin tiara kum ba trai kaikan kuntri wala ra waia smalkaia warkka kau daukaia dukiara, sakuna ai aisika nani ba uba wari taki kan, ban kra baha pliska ra trabil kum kum bâra kabia dukiara. Baha mita tiara ba kuntri kum wahbi sakan lalah trabilka uya âpu bara pulitik trabilka sin âpu ba. Baha wina Betel apiska ra ulban, bara witin nani pana kuntrika tânka dukiara ulbi blikan. Witin 6 mani baha kuntrika ra iwan ba ra blisinka ailal brin. Witin bila: “Yang kuntriki ra sanska âpu kaia kapri Baibil stadika nani tâ briaia. Sakuna, kuntri wala ra nitka tara bri ba ra wari mita Baibil stadika ailal briaia sip kapri, baku sin kau pain smalkaia lan takri”.
7. Kuntri wala ra wih smalkan pamalika kum sturka aisas.
7 Pamali nani. Ban kra luhpa brisma kaka lukma kuntri wala ra King lâka smalkaia sip apia sma. Pamali kum luhpa wâl bri kan ba, —tuktika nani 8 bara 10 mani bri kan— kuntri wala nitka bri ba ra wan. Yaptika ba naku win: “Uba lilia sna luhpi nani nahara pâwan ba mita, kan baha ba witin nani ra sanska yaban misan uplika nani, bara piu aiska smalki tataukra nani wal pâna takaia. Kasak lukisna kuntri wala ra wih smalkaia ba wan rayaka lilia daukan sa”.
8. Kuntri wala ra wih tâ baikaia dukiara, ¿bîla raya kum lan takaia sma ki? Tânka mariks.
8 Bîla raya kum lan takaia. ¿Bîla raya kum lan takaia si brisma ki? Ban kra man aisisma bîla ba kuntri ailal ra aisisa bara bahara sin smalki tataukra nani sin nitka ailal bâra kabia. Marit kum inglis bîla aisi ba ispail aisi kuntrika kum ra wan, kan bahara inglis aisi uplika ailal bâra kan. Betel apiska wina maisa pakan kangrigisan ailal inglis bîla aisi kan bara nitka tara bri kan. Witin nani kangrigisan kum wahbi sakan bara taim wâl ra wih kaikan. Ningkara, ai watla ra kli wih banhwan bara kati bilara lalah nitka nani ba laki kaikan baku sin mani kum bilara lalah apahki banhwan. Bara kuntri wala nitka bri ba ra waia ridi kan taim bahara tawan, bara muihni lakri nani ba hilp munan utla sipar kum sakaia dukiara.
9, 10. Ai kuntrika swin nani ba, ¿dîa daukaia sip sa, bara dîa muni?
9 Ai kuntrika swin nani ba. ¿Baibil tânka kau lan takras kainara, kuntri wala ra tawram ki? Ban kra man kuntrikam ra smalkaia dukiara nitka tara bâra sa. ¿Kuntrikam ra wih smalkaia dukiara pat lukram ki? Ban kra mampara kau isi kabia bahara wark kum sakaia, apia kaka anira takaskaia kau isti sâkma upla tringsar kum ba wal, baku sin ban kra bâra aisi bîla ba nu sma. Baku sin upla nani ba kau wilin kabia mai walaia upla tringsar kum ra walaia ba wal.
10 Albania wina waitnika kum Italia kuntrika ra wan. Bara wark pain kum saki lalah win takan bara ai pamalika ra bliki kan. Piu luan ba ra Baibil tânka ba lan takan, bara Betel apiska ba makaban witin piu aiska smalki tataukra nani ra Albania bîla lan daukbia kan witin nani ba bahara takaskaia luki kan. Kristian waitna bila: “Yang kuntriki swiri ba ra witin nani auya kan, Albania bîla aisaia nu âpu kan, sakuna lilia kan bâra waia. Baha mita kupi ra lukri, yang ba Albania kuntrika wina sna bara baha bîla sin aisisna, Italia kuntrika ra ¿dîa daukisna?”. Kristian waitna ba kli ai kuntrika ra wan sturi yamni ba smalkaia. Witin win: “Yang sari lukras sna warkki ba swiaia, baku sin lalah kau wiria win takaia. Wark kau pain ba Albania kuntrika ra sakri. Kan yang maipara wark kau yamni ba sika Jehova kupia lâka daukaia yawan diara sut bri ba wal”.
11, 12. Kuntri wala ra wih tâ baikaia luki uplika nani ba, ¿dîa daukaia sa?
11 Nahki daukaia. Pal bara ai pânika nani kau Macedonia ra waras kainara, lalma tani ra auya kan. Sakuna spirit holikira bâk nu munan ba mita yahbra tani ra wan (Ap.St 16:6). Witin nani Bitinia tawanka lamara kan ba ra Jisas kaina dakban (Ap.St 16:7). Jehova smalkaia warkka ba ai Luhpia bâk tâ brisa (Mt. 28:20). Baha mita kuntri wala ra waia lukisma kaka, Jehova ra makas tâm bribia (Lk. 14:28-30; Je. 1:5; naha ulbanka ba sin kaiks “¿Nahki nu takaia sip sa kuntri kum ra waia luki ba nitka brisa sapa?”).
12 Dîa daukaia lukisma ba kangrigisan almukka nani wal aisas, apia kaka spirit lâka ra pâwan kristianka waitna bara mairin nani ra makabi wals dîa lukisa (S.L 11:14; 15:22). Ulbi sakanka nani ra kuntri wala ra nitka bri ba dukiara dîa aisi ba laki kaiks, baku sin waia want sma kuntrika tânka pliki kaiks. ¿Baha kuntrika ra waia sip sma bara piua kum bahara takaskaia? Bahara wih iwaia lukisma kaka, Betel apiska ra ulbaia sma, bara witin nani mai wibia dîa daukma ba. Naha manka Anuario bukka ra sin hilp plikaia sip sma. Baku sin, Betel apiska ra wauhkamtaya blikaia watlika ra, kangrigisan almukka nani ra yas, kan witin nani ba sin dîa luki ba ulbia (Organizados para hacer la voluntad de Jehová bukka, wahia 111 bara 112 ba laki kaiks).
13. Betel apiska ba nahki muni hilp mai munaia sip sa sakuna, ¿dîa dukia nani man silp daukaia sma?
13 Betel apiska ba ulbi mai wibia man waia want kuntrika ba dukiara, baha wina man laki kaikma. Sakuna bahara waia dukiara wauhkataya nani nit sma ba maikbia apia. Sampla baku, visa kum, bâra takaskaia dukiara wauhkataya nani. Baku sin anira yapaia pliska kum sakaia hilp mai munbia apia. Kuntri wala ra waras kainara, man naha sut silp daukaia sma. Baku sin man silp lengstar apiska —embajada— nani ra waia nit kama visa kum sakaia dukiara, apia kaka kuntri ra wark takaia want sma kaka, witin nani wina adar makabaia sma. Ya ya kuntri wala ra waia lukisa kaka, silp ai nitka nani tâ baikaia sa (Gal. 6:5).
14. Smalkaia adar âpu kuntrika kum ra waia, apia kaka iwaia lukisma kaka, ¿dîa daukaia sma?
14 Smalkaia adar âpu kuntrika nani. Kuntri kum kum ra, muihni lakri nani ba tânkira lâka wal smalkaia sa (Mt. 10:16). Baha mita baha kuntrika ra wih kristianka nani ba tânkira apia sa kaka, sip sa muihni lakri nani bahara iwi ba ra pât ra dingkaia, apia kaka smalkaia warkka ba ra trabil munaia. Baha mita man baha sât kuntrika kum ra iwaia lukisma kaka, kangrigisankam almukka nani bâk Betel apiska ra wauhtaya kum ulbi blikaia sip sma.
15. Ban kra kuntri wala ra waia sanska âpu kapram sakuna, ¿nahki smalkaia warkka kau tâ baikaia sip sa?
15 ¿Kuntri wala ra waia sip apia kaka? Kuntri wala ra waia sip apia sma kaka, sari kapara. Ban kra spirit lâka ra “sans tara pain kum bâra sa, Dawan warkka pain pali daukaia dukiara” (1 Ko. 16:8, 9). Ban kra impaki pura kakaira ba nu sa ani kangrigisanka nitka tara brisa. Apia kaka, bîla wala aisi kangrigisanka kum lamara ba ra tawaia sip sma. Baku sin, man kangrigisankam ra kau smalkaia sanska brisma. Kupiam krauks, anira kabia sin yawan Jehova ra mayunaia sa wan sulka aiska ba wal (Kol. 3:23).
16. ¿Nahki ansika pain kum yabaia sip sa upla kum kuntri wala ra wih hilp munaia want sa kaka?
16 ¿Kristian waitna kum kakaira sma kuntri wala ra wih smalkaia luki ba? Baku sa kaka kupia buki, tâ baiks dîa sip ba kat. Apastil Pal Antiok Siria tawanka wina taki wan taim, Rom kuntrika ra tawanka tara yumhpa bâra kan pas ba Rom, Alejandria bara yumhpika ba Antiok Siria pliska kan. Baha pliska ba uba tara kan mita kangrigisan nani ba Pal hilpka ba nit pali kan. Baha dukiara Baibil ra wiras baha piua ra kristianka nani mita Pal ra taibi munan takaskaia. Sakuna witin nani ai tânka brin “nasla ba lika naha tasbaya” (Mt. 13:38).
17. ¿Dîa muni aitani sa luki kaikaia ‘Macedonia ra waia’ paiwanka ba?
17 Pal ai pânika nani aikuki blisin ailal brin Macedonia pliska ra wih ai warkka pain daukan mita. Pilipai tawanka ra Lidia wal witin nani kakaira takan, “Dawan mita ai kupia ba ilingkan, Pal dîa aisi ba aman pali walaia” (Ap.St 16:14). Nanara luki kaiks, Pal bara ai pânika nani aikuki nahki lilia takan ba Lidia ai watla bîla uplika sut aikuki tahbi daukan piua ra. Kuntri ailal ra upla nani bâra sa sim Lidia kupia bawikira kan baku, ban kra King lâka sturka ba walras. ‘Macedonia ra waia’ paiwanka ba kau lan takma kaka, sanska painkira nani sâkma upla nani ra pliki saki hilp munaia.
[Wahya 5 Lilkika ba]
“¿Nahki nu takaia sip sa kuntri kum ra waia luki ba nitka brisa sapa?”
• Anuario bukka ba aisi kaiks, smalki tataukra kumi bani mihta ra upla an bâra sa smalkaia.
• Índice wahia ba yus munaia aitani sa, kuntrika sturka ulbanka bara rayaka ra takan sturka ba nu takaia.
• Smalki tataukra kum kum pat baha pliska ra wan, apia kaka bara iwi kan wal sip sma aisaia.
• Bara silp bîlam kat smalkaia want sma kaka, sip sma Internet ra tânka pliki kaikaia baha kuntrika bara sim bîla aisi sapa.