Gâd kupia lâka daukbia
1. Yu Kum Aidrubanka 2012 manka ra daukbia ba, ¿ani ba ai lalka kabia, bara dîa muni aitani sa baha dukiara aisaia?
1 Upla ba Jehova kupia lâka ba mita paskan sa (Par.M 4:11). Baha mita wan rayaka ra lilia bara bîla kaikanka bri kaia dukiara pain kabia nu takaia ani ba Gâd kupia lâka sa bara wan rayaka ra alki daukaia. Naha daukaia ba isi baku kaikaia sip sa, sakuna isi apia sa, kan yawan ba ‘wan wina brinka nani bara wan kupia lukra brinka ba wal piu bani ra aiklabisa’ (Epe. 2:3; 1 Pi. 4:3; 2 Pi. 2:10). Gâd yawan ra hilp wan muni ba mita ‘Dibil ba sip alki wan takaskras kabia, baku sin yawan witin kupia lâka daukras’ (2 Ti. 2:26). Naha 2012 manka ra Yu Kum Aidrubanka ba hilp wan munbia yawan Aisa pura sunra, makabanka yumhpa bâra ba tânka briaia (Mt. 6:9, 10). Lalka ba naku kabia, “Gâd kupia lâka daukbia”.
2. ¿Dîa makabi walanka nani Yu Kum Aidrubanka yua ra ansika yabia?
2 Makabi walanka nani ansika yabia ba. Aisanka nani yabi kabia taim naha makabi walanka nani ansika yabia. Gâd bîla walaia, baha ningkara, ¿dîa wala ba sin daukaia aitani kabia ki? ¿Upla nani dukiara Gâd dîa luki ba nahki muni yawan ban nu takaia sip sa? ¿Dîa muni wilin kaia sa nisan uplika sut ra hilp munaia? ¿Nahki natka ra wan rayaka lilia bara âuyapah lâka wanki ba brih iwaia sip sa? Wahma tiara nani, Jehova pain mai kaikbia dukiara, ¿dîa daukaia sma? ¿Jehova kupia lâka daukisma mita dîa blisinka brima? ¿Dîa muni wan muihni lakri nani ra kupia buki, spirit lâka ra karna daukaia sa?
3. ¿Nahki muni Yu Kum Aidrubanka wina yamnika manis sakaia sip sa?
3 Trai muns Yu Kum Aidrubanka yua bani ra bâra kaia, baku sin smalkanka nani ba aman walaia. Ban kra, Betel wina blikan aisasara, apia kaka impaki pura kakaira kum bâra kabia. Witin bara ai maritka mairin brisa kaka, witin sin wal aisaia trai muns, Aidrubanka tâ krikbia kainara, apia kaka danh takbia ningkara. Bara Aidrubanka wina taki utla ra wabia taim, dîa lan takan ba ‘wan âuya tikaia apia sa,’ wan pamalika wal aisaia trai munbia. Baku sin, aikuki laki kaikaia nahki muni Gâd kupia lâka kau pain daukaia sip sa (Je. 1:25).
4. ¿Dîa muni Jehova kupia lâka ba wan rayaka pas pliska ra mangkaia sa?
4 Naika piua ra ai brinka nina bliki uplika nani ra bara Gâd kupia lâka daukras nani ra sin Jehova mita sauhki tikbia (1 Jn. 2:17). Bamna, ¡uba lilia wan dara walisa Jehova naha Yu Kum Aidrubanka wankan ba mita! Naha ba hilp wan munbia Witin kupia lâka wan rayaka ra pas pliska ra mangkaia.