Nu Takan Daukisa

◼ ¿Internet bâk kuntri wala uplika nani ra smalkaia apia kaka Baibil stadika nani yabaia sip sa?

Smalki tataukra kum kum Internet bâk upla nani ra Baibil stadika yabisa, kuna baha uplika nani ra smalki ba smalkaia warkka daukaia adar âpu pliska kum ra iwisa, apia kaka Jehova Witniska nani uya âpu sa. Aima kum kum ra dîa daukan ba yamni takan sa. Sakuna, trabil takaia sip sa upla tringsar kum wal Internet ra correo nani ba pana pana sir munaia, apia kaka Internet bâk maisa pakanka nani ulbi bliki ba wina (Nuestro Ministerio del Reino Pastara kati 2007, wahia 3 ba kaiks). Upla kupia pain nani ra King Lâka sturka brih waia lukanka pain wal daukbia sin, upla daukanka saura bri nani wal pana lâka briaia sip sa, bara tânka kasak ba swih mapara bui uplika nani wal sin (1 Ko. 1:19-25; Kol. 2:8). Baku sin, smalkaia warkka daukaia adar âpu pliska kum, apia kaka wan warkka param daukaia sip apia pliska kum ra tâ uplika nani ba dîa blîkbia ba sut pura kaikaia sip sa. Bamna Jehova Witniska nani baha pliska ra iwi ba ra trabil ra dingkaia sip sa. Baha mita, Internet bâk kuntri wala uplika nani ra plikaia apia sa sturi yamni ba smalkaia dukiara.

Betel apiska wina diara wiras sa kaka, kuntri wala wina tauki uplika kum ra ban wina smalkbia kaka, trai munaia apia sa uplika ba ra pliki aisaia pat ai kuntrika ra wan kaka. Yawan sip sa, jw.org pliska ba uplika ra marikaia, baku witin diara tânka kau lan takaia sip sa, baku sin ani Betel apiska ai kuntrika pura kaiki ba ra ulbaia. Baku sin, Aidrubanka Watla kum ai lamara bâra sa kaka plikbia kupia bukaia sip sa. Bara kau nu takan daukisa kaka, witin ra nahki pliki sakaia natka maikbia kaka ulbi bris bara kangrigisan âiulbra ba ra yas. Bara witin jw.org ba ra dimi Betel apiska ra blîkbia. Uplika iwi pliska ra ani Betel apiska pura kaiki ba kau pain nu sa nahki baha uplika ra hilp munaia, kan baha pliska nahki ba pain kakaira sa (Gâd Warkka Dauki wauhkataya, Lî kati 2014, wahia 7, bara Gâd Warkka Dauki wauhkataya, Yahbra kati 2011, wahia 2 ba kaiks).

Upla kum kli wih kaiki kan ba kuntri wala ra wabia, apia kaka kuntri wala ra iwi uplika kum ra Baibil stadika yabisa bara Internet bâk baman uplika ra kakaira sa kaka, baiki sakanka luan ra wi ba baku daukaia sa. Uplika ra ban smalki kaia sip sa smalki tataukra kum baha pliska ra iwi ba wih kaikbia ba kat. Nanara, uplika ba smalkaia warkka daukaia adar âpu pliska kum ra iwisa apia kaka wan warkka param daukaia sip apia pliska kum ra sa kaka, aman kaiki kabia Baibil tânka kum wauhtaya ulbi blîkbia, telepon bâk aisabia taim, apia kaka Internet bâk maisa pakanka nani ulbisa taim (Mt. 10:16).