Jisas Pruan Kupia Kraukanka dukiara liliakira ridi taks
1. ¿Jisas Pruan Kupia Kraukanka piua ba dîa dukiara sa?
1 Jisas Pruan Kupia Kraukanka tiusdi yua, Kakamuk kati 26 ra kabia. Bara naha ba sanska painkira kum sa wan liliaka marikaia Jehova swaki wan sakan ba mita (Ais. 61:10). Naha yua kau balras kainara, lilia lâka ba mita yawan ridi takbia. ¿Nahki muni?
2. ¿Dîa muni Jisas Pruan Kupia Kraukanka dukiara ridi takaia sa?
2 Ridi takaia. Dawan Tutnika Pata ba kulkanka painkira kum sa. Baha mita, kaina manis ridi takaia ba hilp wan munisa dîa daukaia ba wan auya tikbia apia dukiara (S.L 21:5). Awarka bara pliska ba ridi bri kaia sa. Wain bara britka ba sin wahbi briaia sa. Bara pliska ba klin bara ridi kaia sa. Aisasara ba ai aisanka ridi bri kaia sa, bara sir yayabra nani ba dîa daukbia ba nu kaia. Yawan kasak lukisa naha warkka aihkika ba pat daukan kaia sa. Atki sakan lâka ba mita tingki luki ba tâwan naha yua dukiara pain ridi takaia sa (1 Pi. 1:8, 9).
3. ¿Nahki wan kupia ridi daukaia sip sa Jisas Kupia Kraukanka dukiara?
3 Wan kupia ridi daukaia sa. Jisas Pruan Kupia Kraukanka tânka briaia dukiara wan kupia ridi daukaia sa (Esd. 7:10). Naha daukaia dukiara asla taki iwaia sa baha yua ra Jisas ai rayaka lâs ra dîa daukan ba laki kaikaia dukiara. Baku sin, lukaia sa Jisas sakripaiska ba wan kupia bukbia spirit lâka ra kau daukaia dukiara (Gal. 2:20).
4. Atki sakan lâka wina blisinka nani bri ba, ¿ani ba lilia lâka wankisa?
4 Jisas pruanka ba Jehova king aimakaia raitka bri ba tâ baikisa. Baku sin, prura bara saurka wina pri wan sakisa (1 Jn. 2:2). Naha ba hilp wan munisa Jehova wal pâna lâka kum briaia dukiara bara naika piua ra raya ban kaia lâka briaia (Kol. 1:21, 22). Bara naha ba karnika wankisa Jehova ra dîa pramis munan ba daukaia bara Jisas disaipilka nani baku ban bûi kaia (Mt. 16:24). Jisas Pruan Kupia Kraukanka dukiara ridi takisa bara, bahara wabia kaka, wan liliaka lâka kau tara bribia.